இவரும் இவர் கதைகளின் படமும் : மண்ட்டோ

Manto எனும் பெயரில் நந்திதாதாஸ் எழுத்து & இயக்கத்தில் ஆங்கில சப் டைட்டிலுடன் கூடிய இந்தி படம் கடந்த 21 ஆம் தேதியிலிருந்து தலா ஒரு காட்சிகள் வீதம் சென்னை எக்ஸ்பிரஸ் அவென்யூ, லூக்ஸ் திரையரங்கில் ஓடிக் கொண்டிருக்கிறது.nandita dos initiatives நிறுவனம் படத்தை சிலருடன் இணைந்து தயாரித்திருக்கிறது.

புதுமைப்பித்தன் பிறந்து ஆறாண்டுகளுக்கு பின் பிறந்து , 1955 ஆம் ஆண்டில் 43 வயதில் இறந்து போன படைப்பாளி சாதத் ஹசன் மண்ட்டோ.பிரிட்டிஷ் இந்தியாவின் பஞ்சாப் லூதியானாவில் பிறந்தவர். வாழும் பொழுதே தென்கிழக்காசியா நாடுகளின் புகழ்பெற்ற உருது சிறுகதை படைப்பாளராக அறியப்பட்டவர்.இலக்கியம் ,இதழியல்,சினிமாஉலகில் பெரிதும் பேசப்பட்டவர் மண்ட்டோ

மண்ட்டோ  கதைகள் பாலியல் ஆபாசம் என்பதற்காக பிரிட்டிஷ் அடசியில் இவர் மீது வழக்குகள் தொடுக்கப்பட்டன .குடும்பம் நட்பு வட்டங்களில் தன்  கதைகளுக்காக கடுமையாக விமர்சிக்கப்பட்டவர் .தீராத குடிப்பழக்கத்திற்கு ஆளானவர் .அதனாலேயே இளவயதில் மரணம் அடைந்தவர் சாதத் ஹசன் மண்ட்டோ .இந்திய விடுதலையும் பிரிவினையும் தொடங்கி வைத்த இஸ்லாம் மக்கள் மீது தொடுக்கப்பட்ட தாக்குதல்களின் வலிகளின் இலக்கிய ஆவணமாக மண்ட்டோ கதை விளங்குகிறது .மதவெறிக்கு எதிராக மானுட நேயத்தை தன படைப்புகளின் வழியாக முன் வைத்தவர் .

இவரைப் பற்றிய படமும் இவர் கதைகளின் படமுமாக அற்புதமான முறையில் படமாக்கப்பட்டுள்ளது மண்ட்டோ .படைப்பாளியும் கதாபாத்திரமும் சந்திக்கும் உத்தியை படத்தில் நந்திதாதாஸ் கலாபூர்வமாகப் பயன்படுத்தி இருப்பார் .மண்ட்டோ பம்பாய் நிலத்த்தின் வழியாக உலகை தரிசித்தவர் என்ற புரிதலை , பழுப்புநிறக் காட்சிகளின் வழியாக 40 களிலான பம்பாயில் மண்ட்டோவின் வாழ்வை பார்வையாளர்களுக்கு  அழகியலாக  உணர்த்தி  இருப்பார் இயக்குநர் .

மண்ட்டோவின் திற ,சில்லிட்ட சதைப்பிண்டம்,டோபா டேக் சிங் கதைகலின் பாத்திரங்கள் மண்டோவோடு சக பாத்திரங்களாக இணைக்கப்பட்டு ,எழுத்தும் சினிமாவும் முயங்கும் காட்சி தரிசனத்தை நமக்கு நந்திதா தாஸ் கையளித்திருப்பார்  .வரலாற்று காலக்கட்ட படம் என்பதற்கான பழுப்பு டோனில் கார்த்திக் விஜய் படமாக்கி இருக்கிறார் .ஸ்ரீகர் பிரசாத்தின் படக்கோர்வை மிளிர்கிறது .நவாஸுதீன் சித்திக்  மண்ட்டோவாக வாழ்ந்திருக்கிறார் .அவரின் மனைவியாக  ரசிகா சாந்தமான இயல்பான உடல்மொழியில் வசீகரிக்கிறார்

படத்தில் இடம் பெற்ற ஒரு பாடலோடு , படம் முடிந்து டைட்டில் ஓடும் பின்புலமாக இசைக்கப்படும் பாடலும் மனதை வசீகரிக்க சினேகா கான்வால்கர் காரணம். பின்னனி இசை சஹிர்ஹுசைன்  என டைட்டில் பெயர் வருகிறது.அது தபேலா சாஹீர் ஹுசைனா  என தெரிய வேண்டும் .

இந்து இஸ்லாம் எனற பிரிவினைகள் மேலும் மேலும் அதிகரிக்க செய்யப்படும் காலத்தில் ,அவைகளை எதிர்க்க மானுட நேசம் கொண்ட சாதத் ஹசன் மண்ட்டோ நமக்கு மேலும் மேலும் தேவைப்படுகிறார் .அதன் திரைமொழியே மண்ட்டோ .வாழ்த்துக்கள் நந்திதா தாஸ்.

தமிழ்த் தேசிய சலனப்படம் 100 ஆண்டு

இயக்குநர் எஸ்.பி.ஜனநாதன் தலைமையிலான உலகாயுதா அமைப்பு, சர்வதேச தொழிலாளர் தினமான மே1 அன்று , சென்னை காமராசர் அரங்கில், தமிழ்த் திரைப்பட நூற்றாண்டு விழாவை, தமிழ்த் தேசிய சலனப்படம் 100 ஆண்டு என கொண்டாடியது.

தமிழ்சினிமாவின்  மூத்தத் தொழிலாளர்கள்  நூறு பேருக்கு அவர்களின் திரைத்துறைப் பங்களிப்பை பாராட்டும் விதமாக, ஒவ்வொருவருக்கும்  ஒரு சவரன் தங்க நாணயம் வழங்கும் விழாவாக நடைபெற்றது. விழா தொடக்கத்தில் FEFSI ஐ நிறுவிய முன்னோடிகள் நிமாய்கோஷ், எம்.பி.சீனிவாசன் படங்களை இயக்குநர் முக்தா சீனுவாசன், எடிட்டர் மோகன் திறந்து வைத்துப் பேசினார்கள்.

நடிகர் விஜய் சேதுபதி வழங்கிய தங்க நாணயங்களை அவரின் அம்மா சரஸ்வதி காளிமுத்து, விஜய் சேதுபதியை அறிமுகம் செய்த, இயக்குநர் சீனுராமசாமிக்கு வழங்கி , இந்த நிகழ்வை தொடங்கி வைக்க், பின் நூறுபேருக்கும் திரைத்துறை ஆளுமைகள் ரோஹிணி,எடிட்டர் லெனின், எடிட்டர் மோகன்,இயக்குநர் சேரன்,இயக்குநர் அமீர், இயக்குநர் ஸ்டான்லி,இயக்குநர் செல்வமணி என தொடர்ந்து தங்க நாணயங்களை வழங்கிப் பாராட்டினார்கள்.

கவிஞர் பரிணாமன் எங்களைத் தெரியலையா பாடலைப் பாடி அனைவருக்கும் மே நாள் வாழ்த்துகள் சொன்னார்.

விஜய்சேதுபதி பேசும் பொழுது,  “ எனக்கு எல்லாமே தமிழ் சினிமாதான். எனக்கான அடையாளம் சினிமாதான்.இயக்குநர் ஜனநாதன் இந்த விழாவின் தேவையை சொன்ன பொழுது, நூறு தங்க நாணயங்களை வழங்கி,எனக்கு அடையாளம் தந்த தமிழ் சினிமாவிற்கு , என் நன்றிக் கடனை செய்திருக்கிறேன் “ என்றார்.

விழாவிற்கு இயக்குநர் அமீர் தலைமையேற்க , இயக்குநர் கரு.பழனியப்பன் நிகழ்வை தொகுத்து வழங்கினார்.

என்னை விழாவில் பங்கேற்க இயக்குநர் ஜனநாதன் அழைத்திருந்தபடியால், நானும் பங்கேற்று ,ஜனநாதன் அவர்களுக்கு வாழ்த்துகள் சொன்னேன். தமுஎகச சார்பில் கி.அன்பரசன், பேராசிரியர் அண்ணதுரை போன்றோரும் நிகழ்வில் பங்கேற்றனர்

திரைக்காதலன் பாலுமகேந்திரா

இயக்குநர் பாலுமகேந்திரா அவர்களின் உதவியாளர் ரோஸ்லின் பிப்ரவரி 9 ஆம் தேதி காலையில் போன் செய்து, 13 ஆம் தேதி நம்ம சாரோட மூணாவது நினைவுநாள். வரணும் என்றார்.அவசியம் வருவேன் என்று பிப்ரவரி 13 காலை 11 மணிக்கு சென்னை ஏ.வி.எம் பிரிவியூ தியேட்டர் 1  சென்றேன். போகும் பொழுது இயக்குநர் பாலுமகேந்திரா  குறித்த டாக்குமெண்ட்ரி( இயக்கம் வசந்த்) ஓடிக் கொண்டிருந்தது.ஒன்றரை மணிநேரம் ஓடியது டாக்குமெண்ட்ரி.அருமையான முயற்சி.

பின்னர் பாலுமகேந்திரா குறித்த ஞாபகப்பதிவு. இதில் பாலுமகேந்திரா மகன் சங்கிபாலுமகேந்திரா,இயக்குநர் சீனுராமசாமி, எழுத்தாளர் எஸ்.ராமகிருஷ்ணன், நடிகர் அர்ச்சனா, ஓவியர் வீரசந்தனம், ஒளிப்பதிவாளர் மூர்த்தி, ஜூனியர் பாலையா, இயக்குநர் மீரா கதிரவன், நிழல் திருநாவுக்கரசு, இரா.தெ.முத்து,ரோஸ்லின் என் பங்கேற்றுப் பேசினோம்.

சங்கி தனக்கு  ”தன் அப்பா  நண்பர் ”   என்றார். சீனுராமசாமி ” தன் உதவியாளர்களை மிகுந்த தோழமையோடு நடத்தியவர் சார்’  என்று நெகிழ்ந்தார். ”தன் ஞானத்தகப்பன் பாலு சார்” என்று குறிப்பிட்டார் எஸ்.ராமகிருஷ்ணன்.நடிகை அர்ச்சனா பேசும் பொழுது “ சினிமாவில் பலரால் மறுக்கப்பட்ட சுதா என்கிற என்னை சினிமாவில் அறிமுகப்படுத்தி எனக்கு வாழ்வும் முகமும் தந்தவர் சார் ” என்றார்.

  “பாலுவை மகத்தானக் கலைஞன் என்று கொண்டால் அவரின் பிறகுணங்கள் காணாமல் போகும் “ என்று விமர்சனங்களுக்கு பதில் தந்தார் வீர சந்தானம்.  ” பொருத்தமான பாத்திரங்களில் தன்னை நடிக்க வைத்தவர் பாலுமகேந்திரா” என்றார் ஜூனியர் பாலையா. “நானும் சாரின் மாணவர் “ என்று மகிழ்ந்தார் மீரா கதிரவன்.

 “பாலுமகேந்திராவிற்கும் எங்கள் தமுஎகச அமைப்பிற்கும் எனக்கும் முப்பதாண்டு நட்பு என்றும், எதையும் வெளிப்படையாக எங்களோடு விவாதித்து, உடன் நின்று செயற்படும் நல்ல நண்பர்; ஆசிரியர் என்றும், அவர் நடத்திய சினிமாப் பட்டறை கட்டிடத்தில் அவருக்கான படைப்புகளை அவர் புழங்கிய நூல்களைக் கொண்ட காப்பகம் ஒன்றை அமைக்க ஷங்கி உள்ளிட்டு அனைவரும் முயற்சிக்க வேண்டும் என்றும், அவர் காலத்திலேயே அழிந்து போன அவரின் சினிமாக்களை போல் அல்லாமல் , தமிழின் மிச்சமுள்ள சினிமா படைப்புகளை திரை ஆவணக் காப்பகம் உருவாக்கி அதில் வைத்து தமிழ்நாட்டு அரசாங்கம் பராமரிக்க நாம் குரல் கொடுக்க வேண்டும் “ என்றும் நான் ( இரா.தெ.முத்து ) பேசினேன்

அய்யப்பமாதவன் எனும் கவிஞன் கட்டித் தழுவும் ஒரு சதுக்கப்பூதம்:

அய்யப்ப மாதவன் அழைத்ததை ஒட்டி அவரின் புத்தனின் விரல் பற்றிய நகரம் கவிதை நூல் வெளியீட்டிற்குப் போயிருந்தேன்.இரண்டு காரணம் அவர் அழைத்தார்;அடுத்தது கவிதைப் பற்றி என்ன கருதுகோளை நிலைப்பாட்டை வைத்திருக்கிறார்கள் என்பதை அறிந்து கொள்ள. அவருக்கு நெருக்கமான அவரின் கவிதையோடு பரிட்சயம் கொண்ட ஒரு ஐம்பது பேர் நிகழ்வில் இருந்தோம்.

பேசிய பலரும் கவிதைக்கு இங்கு இடம் என்னவாக இருக்கிறது என்றும் ,காலமும் சமுகமும் கவிஞனை கையேந்த வைத்திருக்கிறது என்று கவலையைப் பதிவு செய்தனர். மாதவன் வெளியைப் பற்றி பசியைப் பற்றி சொந்த அனுபவ மொழியில் எழுதிருப்பதையும் பேசியது மகிழ்ச்சியே. மாதவனின் ஏற்புரை எனக்குப் பிடிக்கவில்லை.

அவர் பேசிய பல விசயங்களால் கவிஞர்கள் இப்படி விசயஞானம் இல்லாமல் இருக்கக் கூடாதே என்று ஆதங்கம் கொள்ள வைத்தது. தேர்ந்தெடுக்கப்பட்ட கவிதை என்பதினால் தம்பி பூபதியின் கனிவில் நல்ல தள்ளுபடியில் 454பக்கம் கொண்ட நூலை பணம் கொடுத்து வாங்கிக் கொண்டேன்.

வாசித்தக் கவிதையில் சாம்பிளுக்கு இரண்டு.
அய்யப்ப மாதவனின் கவிதையில் படிமஅழகும் சமுகக் கோபமும் இருப்பதிற்கான இரண்டு அது.இருள்,மரம்,காற்று,நிலா, பனி,இலை,உதிர்தல் இப்படியாக வெளியைச் சொல்லும் பொழுது

`விடிவிளக்கென நிலா/பறவைக் கூடுகளில் படிந்திருந்தது’ என்கிறார்.

இந்த வரிகள் விவரணைக்கு அப்பாற்பட்ட புலனால் உணரத்தக்க காட்சியின் உணர் அனுபவத்தை கிளர்த்தி அடடா என பரவசம் கொள்ளச் செய்தது. அடுத்தது பாசிசம் என்கிற கவிதையில் பசியும் வறுமையும் ஒருவரை ஓர் உள்நாட்டுப் போராளியாய் மாற்றிவிடக் கூடும் என அச்சப் படுகிற கவிதையின் இடத்தில்` அரசாங்கப் பணிக்காக கையூட்டு வாங்கும்/அதிகாரிகளின் அமைச்சர்களின் தலைகளைத் துண்டாடும் சமுக சேவகனாய் மாறக்கூடும்’ என்கிற அரசியல் கவிதையின் குறிப்பிட்ட இடத்தின் கவிதாவேசம் அய்யப்பனை முதுகில் தட்டி தொடர்ந்து எழுது மாதவா என்று சொல்லத் தோன்றுகிறது.

ஆனால் இவர் , கலைஞர்களை படைப்பாளிகளை மதிக்கத் தெரியாத சினிமாவின் கரங்களுக்குள் தன்னை சிறைப்படுத்திக் கொள்ளும் குரூர முயற்சியை விவரித்துச் சொல்லி ஏற்புரையில் தன் கவிதை-இது கொண்டாடப்படும் இடம்-இதன் அழகு-இதன் கோபம் என எதுவும் பேசாமல் தேர்ந்தெடுத்த தன் 300 கவிதைகளை சினிமா உலகின் முன் விசிட்டிங் கார்டாய் விரித்து நின்ற பரிதாபத்தை சினிமாவின் வசீகரத்தை என்ன சொல்ல? (சினிமா வெறுப்பு எனக்கில்லை; அழைக்கும் சினிமாவைக் கொண்டாடலாம்)

நிகழ்வில்அய்யப்பமாதவன்,கருணாபிரசாத்,சூர்யதாஸ்,பாரதிகிருஷ்ணகுமார்,அழகியசிங்கர்,பா.கிருஷ்ணன்,ரவிசுப்ரமணியன்,விஜயபத்மா,
அப்பணசாமி, தேவேந்திரபூபதி,யவனிகாஸ்ரீராம், சீனுராமசாமி,தோழமை பூபதி,ஆதிரா முல்லை,சந்திரா, நாச்சியாள் சுகந்தி, வேல்கண்ணன்,கே.என்.சிவராமன்,மதிராஜ்,தம்பி யுவகிருஷ்ணா என தோழர்கள்-நண்பர்களின் சந்திப்பு நேற்றைய மழை பெய்த அந்திப்பொழுதை மேலும் அன்பால் ஈரப்படுத்திக் கொண்டே இருக்கிறது.

இயக்குநர் ஆர்.சி.சக்தி

மனிதரில் இத்தனை நிறங்களா? சிறை,கூட்டுப்புழுக்கள் என்று வந்த 
அவரின் படங்களைப் பார்த்து,அவர் மீது மரியாதை வந்த காலம் அது.
தர்மயுத்தம் படம் பெருவெற்றி பெற்றதோடு,அந்த தங்க ரதத்தில் பொன் மஞ்சள் நிலவு என்று வரும் மலேசியாவின் பாடலை எங்கு கேட்டாலும் உணர்வலை புரளும் படத்தை தந்தவர்.
அவரை 96 வாக்கில் சாய்நகர் வீட்டில் பல முறை சந்தித்து பேசியிருக்கிறேன்.
சினிமாவின் சாயலை எப்போதும் சொந்த வாழ்வில் படிய விடாத எளிய மனிதர்.
அவரின் பிள்ளைகளும் அப்படியே.என் வழியாக பல ஊர்களின் கலைஇரவிற்கு வந்து மனசில் உள்ளதை பளிச்சென்று பேசி மனங்களைக் கவர்ந்தவர்.
அவரின் மறைவிற்கு அஞ்சலியும் வணக்கமும்

தமிழ்த் திரைப்படங்கள் உறவும் ஊடாட்டமும்

1970 களிலிருந்து தமிழ்த் திரைப்படத்தை பார்த்துக் கொண்டும் பேசிக் கொண்டும் இருக்கிறேன்.ஞானஒளி நான் பார்த்த முதல் திரைப்படம்.சிவாஜிகணேசன்,சாரதா,மேஜர் சுந்தர்ராஜன் நடித்தப் படம்.பி.மாதவன் இயக்கிய படம்.நான் கேட்ட முதல் திரைப்பாடலும் இந்த படத்தில் இடம் பெற்று டி.எம்.எஸ் பாடிய `தேவனே என்னைப் பாருங்கள் என்பதுதான்.நான் சமீபத்தில் பார்த்தப் படம் பா.ரஞ்சித் இயக்கிய மெட்ராஸ்

ஞானஒளிக்கும் மெட்ராஸிற்கும் இடையில் நாற்பது ஆண்டுகள் ஓடிவிட்டன.இந்த நாற்பது ஆண்டுகளில் குத்து மதிப்பாக மூவாயிரம் தமிழ்த் திரைப்படங்கள் வந்திருக்கலாம்.நானும் குத்து மதிப்பாக ஆயிரத்து ஐநூறு படங்கள் பார்த்திருப்பேன்.

தமிழ்த் திரைப்படத்தை தென்னக அளவில் இந்திய அளவில் பிரபலப்படுத்திய கலைஞர்கள்,இயக்குநர்கள்,தயாரிப்பாளர்கள் நம்மிடையே உண்டு என்ற பெருமையும்,அவர்களோடு நாம் வாழ்ந்திருக்கிறோம்,பழகியிருக்கிறோம் என்ற கூடுதல் பெருமையும் உண்டு.

இந்தியத் திரைப்படத்திற்கு நூற்றாண்டு கால வரலாறு உண்டு என்பதினுள் தமிழுற்கும் இந்த நூற்றாண்டு பெருமை உண்டு.தமிழ்நாட்டில் திரைப்படம் வந்து நூறாண்டு ஆகி விட்டது.தாதா சாகிப் பால்கே தயாரித்த மவுனப்படமான ஹரிச்சந்திரா வந்த அடுத்த மூன்றாண்டில் சென்னை ஆர்.நடராஜமுதலியார் எடுத்த மவுனப் படம் கீசகவதம்.இது வெளிவந்த ஆண்டு 1916.

இந்த நூற்றாண்டில் தமிழ்த் திரைப்படத்தின் முகமும் மொழியும் வளர்ந்து வந்திருக்கின்றன. உலகெங்குமான திரைப்பட விழாக்களில் தமிழ்த் திரைப்படங்கள் பங்கு பெறுகின்றன.அடையாளம் பெறுகின்றன.கதை மொழியும் காட்சி மொழியும் உடல்மொழியும் மாறிக் கொண்டே வந்திருக்கின்றன.உலகப் படங்களோடு,இந்தி,வங்கம் போன்ற இந்திய மொழிப் படங்களோடு தமிழ்த் திரைப்படங்களுக்கான உறவும் ஊடாட்டமும் தொடக்க கால முதலே இருந்து வந்திருக்கின்றது.

கலைவாணர் நடிப்பில்,கருத்தில் சாப்ளினின் பின்புலம் இருக்கும்.பீம்சிங் படங்களில் சாந்தாராம் அணுகுமுறை இருக்கும்.சிவாஜியின் நடிப்பில் மார்லன் பிராண்டோவின் நுட்பம் இருக்கும்.ராஜா ராணி படத்தின் மூலம் ரோமன் ஹிஸ்டரி படமல்லவா?அறுபதில் மறைந்து போன அமெரிக்க இசைஞன் நேட்கிங் கோலின் பாதிப்பு தமிழில் இல்லையா?சத்யஜித் ராய்,ரித்விக் கட்டக் போன்றோர் தமிழ்ப் படங்களுக்கு நெருக்கமான ஆளுமைகள் அல்லவா?ரிதுபர்ன கோஷ் பெயரை தமிழ்த் திரைப்பட ஆர்வலர்களும் அறிந்தே வைத்திருக்கிறார்கள்.

ஸ்ரீதர்,எஸ்.பாலசந்தர்,கே.பாலசந்தர்  வழியாக மாறத் துவங்கிய தமிழ்த் திரைப்படம் ஜெயபாரதி,தேவராஜ் மோகன்,பாரதிராஜா,மகேந்திரன்,பாலுமகேந்திரா,அரிகரன்,ஜான் ஆஃப்ரகாம்,சிங்கிதம் சீனிவாசராவ்,துரை போன்றோரின் படங்கள் ஃப்ரான்ஸ் புதிய அலையின் ட்ரூபோ,கோதார்த் பெயரை இவர்களின் படங்களை அறியாமலா மாறி வந்திருக்கும்.எங்க பாட்டன் சொத்து,ரிவால்வர் ரீட்டா போன்ற ஜேம்ஸ்பாண்ட் படங்களின் மூல ஹீரோ சீன் கானரி,ரோஜா மூர் தானே?

இந்த உறவும் ஊடாட்டமும் இயற்கைக்கும் சமூகத்திற்கும் அவசியமானது போலவே இயற்கையின் ஒர் அங்கமான மனிதர்களுக்கும் இவர்களின் கலையாக்கத்திற்கும் அவசியமாகிறது.ஊடாட்டமும் பரிவர்த்தனையும் பண்பாட்டுத் துறையில் ஒன்றை ஒன்று பாதித்து புரிதலையும் வளர்சியையும் சாத்தியமாக்குகிறது.ஏனைய துறைகளைப் போலவே திரைப்படத் துறையிலும் ஊடாட்டம் அவசியமாகிறது.

 பார்க்கத் தவறுகிற அல்லது பார்க்காத ஒரு கோணத்தை ஒரு மொழி படம் சொல்லும் பொழுது,அது இன்னொரு மொழி சார்ந்த படைப்பாளியின் உணர்தலை தொட்டுப் பேசி  விரிவாக்குகிறது.எங்கே நிற்கிறோம்?அடுத்து என்ன?என்பதை படைப்பாளி உணர்ந்த கோணம் தொட்டு துலக்குகிறது.புதிதாய் கிடைக்கும் புரிதல் அசலிலிருந்து இன்னொரு அசலை தம் மண் சார்ந்து,தம் மொழி சார்ந்து தம் சூழல் சார்ந்து உருவாக்குகிறது.  அசலின் சாயல் மூலக் கதையின் கருவாய் இருக்கும். ஆனலும் அது அசல் அல்ல.மூல அசல் தந்த விளைவில் தம் சூழல் சார்ந்து கதையில் வந்திருக்கும் இன்னொரு அசல் என்பதே சரி.

இப்படியான புதிய அசல்களை நம் திரை உலகம் உருவாக்கி வந்திருக்கின்றது.இந்த உருவாக்கம் தமிழின் திரை முகத்தையும் புதியதாய் உருவாக்கி இருக்கிறது.இந்த புரிதல் அல்லாவிடில் விஜய்யின் தெய்வத் திருமகள் ஐ ஆம் சாம் படத்தின் காப்பி என்பார்கள்.மிஷ்கினின் நந்தலாலா கிருசிரொ என்ற ஜப்பானிய படத்தின் தழுவல் என்பார்கள்.

வெற்றிகரமாக ஓடிய நலன் குமாரசாமியின் சூது கவ்வும் படம் தமிழில் புது முயற்சி.மேலோட்டமாகப் பார்த்தால் இதில் என்ன புதிது என கேட்கலாம்.கடத்தல் கும்பல் பற்றிய கதை எனலாம்.கடத்தல் பின்னணியில் சமுகத்தை  பகடி செய்கிறது.சமுக இழிவுகளை பாத்திரங்களுக்குள் கொண்டு வந்து, கதைப் போக்கில் அவைகள் சமுகத்தை நையாண்டி செய்யும் பொழுது, வாழ்பனுவத்தின் மீது நையாண்டி  ஊடுருவி அனுபவத்தின் புரிதலை மேம்படுத்தி,அனுபவம் எங்கே இருந்து பெறப்பட்டதோ,அந்த சூழலை அந்த அரசியலை மாற்றம் செய்ய வேண்டும் என்கிற புரிதல் கதைப் போக்கில் நிகழும் பொழுது,மனம் இந்த நையாண்டியை,நக்கலை,பகடியை கை கொட்டி வறவேற்று ஆரவாரிக்கிறது.

*பிழைக்க ஆசை எனினும் வேலை கிடைக்காமல் அலாரம் வைத்து எழுந்து குளித்து பேண்ட் சர்ட் அணிந்து  தலை வாரி காலையில் குடிப்பதையே வேலையாக்கிக் கொண்ட ஒரு பாத்திரம்.

*புரிந்து கொள்ளப்படாத அலுவலகத்தை விட்டு வெளியேறும் கணினி பொறியாளர் ஒரு பாத்திரம். 

*நடிகைக்கு கோயில் கட்டி நடு வீதியில் தத்தளிக்கும் இளைஞன் ஒரு பாத்திரம்.

* அன்றாட செலவிற்கு மட்டும் ஆட்களைக் கடத்தி விடுவிக்கும் ,ஐந்து ரூல்ஸ் கடத்தல் குழு தலைவன் ஒரு பாத்திரம்.

*சினிமா எடுப்பதற்கான பணம் சேர்க்க போலி டாக்டரான சிறு கேடி ஒரு பாத்திரம்.

*அரசியலில் நேர்மையான அமைச்சர் ஒரு பாத்திரம்

*அரசியலை பணம் கரக்கும் தொழிலாக்கிக் கொண்ட முதல்வர் ஒரு பாத்திரம்

*குறுக்கு வழியில் பணம் சம்பாதிக்க அரசியலை தேர்வு செய்யும் அமைச்சரின் மகன் ஒரு பாத்திரம்.

*பிரதிபலன் பாராத என்கவுண்டர் போலீஸ் ஒரு பாத்திரம்

இப்படி பாத்திரங்களை உருவாக்கி,பாத்திரங்களின் நோக்கம்,செயல்பாடுகளை குறிப்பிட்ட சூழலிற்குள் அதன் இயல்புத் தன்மையோடு இயங்க விடப்பபட்டிருக்கிறது.கதைக்கு நாயகர்கள் என்று யாரும் இல்லை.வில்லன் என்றும் யாரும் இல்லை.ஆனால் கதையில் ட்விஸ்ட் உண்டு;முரண் உண்டு.இந்த முரண்கள்தான் பாத்திரங்களோடு மோதி மோதி கதையை, காட்சிகளை நகர்த்திப் போய்க் கொண்டிருக்கிறது.

கதையில் இரு வேறு உலகம் காட்சிப்படுத்தப்பட்டிருக்கிறது.அன்றாடத் தேவைகளை சரிக்கட்ட சிறு சிறு கடத்தல் வேலையில் ஈடுபடும் ஒர் உலகம்.மக்களின் நம்பிக்கையை மூலதனமாக்கி கோடி கோடியாய் சுருட்டிக் கொண்டு மக்கள் மத்தியில் அம்பலப்படாத ஆளும் கூட்டம் இன்னொரு உலகம்.

சிறு கடத்தலில் ஈடுபடும் கூட்டத்தின் தேவைகள்,வாழ்வாதாரம் பூர்த்தியாகிற  சூழல் வாய்க்கிற பொழுது,  சாப்பாட்டிற்கான சிறிய திருட்டு,கடத்தல் குறையும் வாய்ப்பு உண்டு. மக்களின் நம்பிக்கையை நாசமாக்கி,அரசியலை,ஆட்சியை கொள்ளை அடிக்கும் களமாக மாற்றிக் கொண்ட ஆளும் கூட்டம் அம்பலப்படாமல்  மக்கள் மத்தியில் இருக்கிறது என்கிற உண்மையின் எதார்த்தம்  காட்சிப்படுத்தப்பட்டிருக்கிறது.இந்த இரண்டு பிரிவையும் வேறுபடுத்திப் பார்க்காமல் இரண்டுமே திருட்டுக் கூட்டம் என்ற முடிவிற்கு போவது ஆளும் கூட்டத்திற்கே சாதகக் களமாகிவிடும்.

 படத்தின் காட்சிகளும் பின்னணியும் பார்வையாளர்களுக்கு உணர்த்தும் மறைபொருள் இதுதான்.அரசியலில்  பரிச்சயம் கொண்டவர்கள் காட்சிகளை துலக்கமாகச் சொல்ல வாய்ப்பு உண்டு.அவ்வாறு வாய்ப்பு இல்லாத ஆனால் சமுகப் போக்குகளின் மீது கவனமும் கவலையும் கொண்ட படைப்பாளர்கள் இப்பபடியான மறைபொருளிலேயே சொல்ல இயலும்.இந்த மறைபொருள் கலைக்கு அவசியம்.இதுதான் அழகியலாக இயங்கி, பார்வையாளர்களின் கவனப்படிமத்தை பட்டை தீட்டுகிறது.

பெரும்பாலான நடிகர்கள்,  தொழிற்நுட்பக் கலைஞர்கள், இயக்குநர் உட்பட இந்தக் குழுவே புதுமுகக் குழுவாக இருக்கிறது.எனினும் தொழிற்நுட்பத்தில் அணுகுமுறையில் புதிய தொடுதலைப் பெறுகிறோம்.நகைச்சுவையை மிகச்சரியாக பயன்படுத்தி உணர்த்த வேண்டியதை உணர்த்தும் திரைலாவகம் இவர்கள் மீது நம்பிக்கை கொள்ளச் செய்கிறது.

 இங்கிலாந்தின் குறும்பட இயக்குநராக இருந்து பின் திரைப்பட இயக்குநரகாக மாறிய கெ ரிட்சி(gue Ritchie) யின்  உத்தி அவரின் கதை சொல்லும் முறைமை நலனிடம் இருப்பது தவறல்ல.

நலனும் நாளைய இயக்குநர் போட்டியில் வெற்றி பெற்ற இயக்குநர்.திரைக்கலைஞர் ரோகிணி இதை சிங்கிதம் சீனிவாசராவின் டச் என்கிறார்கள்.நகைச்சுவை பெரும் உத்தியாக இயங்கி இருக்கிறது.நலன்குமரசாமி மற்றும் ஸ்ரீனிவாசன் கவிநேயன் இருவரின் கதை மாறுபட்ட அணுகுமுறையோடு ஒரு படத்தை தமிழுக்குத் தந்திருக்கிறது.

 நிறைய இளம் இயக்குநர்கள் வந்து கொண்டிருக்கிறார்கள்.தமிழ்

 திரைப்படத்தின் மொழியை முகத்தை மேலும் அழகாக்குவார்கள் என்கிற

 நம்பிக்கை இருக்கிறது.இதற்கான அச்சாரமாக நலனையும் எதிர் நீச்சல்

செந்தில்குமார்,ஹரிதாஸ் குமாரவேலு,,மதுபானக்கடை

கமலக்கண்ணன்,அட்டகத்தி,மெட்ராஸ்

 ரஞ்சித் என சொல்லிக் கொண்டுப் போகலாம்.

மணிவண்ணனின் அகாலம்

இயக்குநர் நண்பர் மணிவண்ணன் அவர்களை 13 ஆண்டுகளுக்கு முன் விருகம்பாக்கத்தில் ஒரு பழைய படப்பிடிப்பு அரங்கில் ஒரு கலை இரவிற்கு அழைக்கும் பொருட்டு போய் சந்தித்தேன்;உடன் கலை இரவை நடத்தும் ஊரின் தோழர்கள் வந்திருந்தனர்.உள்ளே அவரை நான் தேட அவரோ,`தோழர் இந்தப் பக்கம் வாங்க’ என்று மரம் ஒன்றின் கீழ் போடப்பட்டிருந்த இருக்கையில் அமர்ந்து எங்களைப் பார்த்து புன்முருவல் பூத்துக் கொண்டிருந்தார்.எங்களுக்கான இருக்கை எடுத்து வரச் சொல்லி,என்ன சாப்பிடுறீங்க என விசாரித்து, விவரத்தைக் கேட்டுக் கொண்டார்.சொன்னோம்.சரி வருகிறேன் என்று ஒத்துக் கொண்டு வந்தார்.

அன்றிலிருந்து தொடங்கிய எம் நட்பு அவரின் இறுதி வரைத் தொடர்ந்தது.நேரம் கிடைக்கும் பொழுது அவரைப் பார்க்க அவரின் திநகர் அலுவலகம்,வீடு என போயிருக்கிறோம். போகும் பொழுதெல்லாம் புதிய நூல்கள் குறித்த விசாரிப்பு,அரசியல்,சினிமா என பேசுவோம். தமுஎசவின் பல கலை இரவில் கலந்து கொண்டு பேசியிருக்கிறார்.2008 ல் அவர் விபத்து ஒன்றில் சிக்கி வீட்டு ஓய்வில் இருந்த பொழுது,தமுஎசவின் 11 ஆவது மாநில மாநாடு சென்னையில் நடக்க இருந்தது.அது பற்றி பேசினோம்.தான் மாநாட்டிற்கு வர இயலாது என்றார்.ஆனாலும் நிதி சேகரிப்பில் அவர் சொல்லி கதாநாயக நடிகர் ஒரு தொகை தந்து உதவினார்.

2004 ல் தமிழ்திரை உலக கலைமலர் ஒன்றை நாங்கள் கொண்டு வந்த பொழுதில் பல ஆலோசனை கூட்டங்களில் கலந்து கொண்டு ஆலோசனை தந்து உதவினார்.அவர் மகள் திருமணத்திற்கு அவர் அனுப்பிய அழைப்பு தாமதமாக கிடைத்ததால்,நேரில் சென்று வாழ்த்த இயலாததை சொன்ன பொழுது என்ன சம்பிரதாயம் தோழர்?விடுங்க; அடுத்தப் பணியைப் பார்ப்போம் என்று இயல்பாக பேசினார்.

இறுதி சில ஆண்டுகளில் முன் போல் பார்க்கவில்லை என்றாலும் தொலைபேசியில் பேசுவோம்;விசாரித்துக் கொள்வோம்.மணிவண்ணன் ஆரம்பத்தில்(1980) கோவையில் சோசலிஸ்ட் வாலிபர் முன்ணணியில் இருந்தார்.மார்க்சிஸ்ட் இயக்கத்தின் தொடர்பில் இருந்தார்.சினிமாவில் அவர் வளர்ந்த பொழுதும்,வேறு இயக்கத்தின் செல்வாக்கில் அவர் போன பொழுதும் தான் எங்கிருந்து புறப்பட்டோம் என்ற ஓர்மையை விட்டதில்லை.

அவருக்கு அஞ்சலி செலுத்த இன்று மாலை 4 மனிக்கு,கே.கே நகர் ஜெய்பாலாஜி நகர் வீட்டிற்கு சென்றிருந்தோம்.எளிய மக்கள் இரு பக்கமும் திரண்டு நின்றிருந்தனர்.சாரை சாரையாக அவர்கள் அஞ்சலி செய்து கொண்டிருந்தனர்.மணிவண்ணனோடு பழகிய பல கலைஞர்கள் வந்து சென்று கொண்டிருந்தனர். உடல் அருகே சீமான்,சத்யராஜ்,மனோபாலா அமர்ந்திருந்தனர். உடல் மீது அவர் இறுதியாக இருந்த நாம் தமிழர் அமைப்பின் புலிக் கொடி போர்த்தப்பட்டிருந்தது.

மதுரவாயல் மார்க்சிஸ்ட் சட்டமன்ற உறுப்பினர் பீமாராவ், நாம், சிகரம் செந்தில்நாதன்,தென்சென்னை தமுஎகச தலைவர்கள் அன்பரசன்,மயிலைபாலு வடசென்னை தமுஎகச செயலாளர் ஜேசுதாஸ் என நேரில் சென்று அஞசலி செய்தோம். நாம் போனதும் சீமான்,சத்யராஜ் கைக் கொடுக்க பற்றிக் கொண்டு நமது இரங்கலை இழப்பை புலப்படுத்தினோம்.அகால மரணம்.சினிமாவை செரிக்க வேண்டியவன் சினிமா சிக்கலில் மாட்டிக் கொண்டும்,நோய்மையில் சிக்கிக் கொண்டும் இறந்து போனது பேரிழப்பு..பேரிழப்பு..
படம்:தீக்கதிர் பிரகாஷ்

விஸ்வரூபம் :சர்ச்சையும் சந்தேகமும் 4

விஸ்வரூபம் தமிழ்நாட்டில் 7 ஆம் திகதி வெளியாகவிருக்கிறது என்பதை கமல் அறிவித்துவிட்டார்.

சென்னை உயர்நீதிமன்றத்தில் தாக்கல் செய்யப்பட்ட வழக்கை கமலும்,நீதிமன்றத்திற்கு வெளியே தமிழகஅரசின் தலைமையில் கமல்,இஸ்லாமிய பழைமைவாத  அமைப்புகள் பங்கேற்ற முத்தரப்பு பேச்சுவார்த்தையில் உடன்பாடு ஏற்பட்டதை அடுத்து அரசு தரப்பும் படத்தை திரையிட தமக்கு ஆட்சேபனையில்லை என்று நீதிமன்றத்தில் தெரிவிக்கப்பட்டதை அடுத்து இது குறித்த வழக்கு நடைமுறைகளை முடித்து வைப்பதாக நீதிபதி இராஜேசுவரன் அறிவித்துவிட்டார்.

ஆனாலும் கேள்வி நீடிக்கின்றது.தமக்கு ஒத்து  வராத ஒரு கலைஞர் என்றால் அவரை பிடிக்காத நடிகராக்கி காட்டுவதும் ஒரு திரைப்படத்தை உடனடியாக முடக்குவதும்,அந்தக் கலைஞரை தம்மை அண்டி நிற்க வைப்பதும் என்பதான  அரசாங்கத்தின் தொடரும் அராஜக நடைமுறைக்கு மாற்றம்  தேவை என்ற கேள்வி தொடர்ந்து எழுகிறது

மத்திய அரசின் சினிமேட்டோ கிராஃபி(1952) சட்டத்தின் 10 ஆம் பிரிவை ஒட்டி மாநில அரசு(1957)ஆண்டில்  ஏற்படுத்திக் கொண்ட சட்டப்படி  பராசக்தியில் ஆரம்பித்து தண்ணீர் தண்ணீர் வழியாக இன்று விஸ்வரூபம் வரை தேவைப்படும் பொழுதெல்லாம் பிடிக்காதவர்கள் மேல் இதனை ஆயுதமாகப் பயன்படுத்தி வந்திருக்கிறது.

 எம்.ஜி.ஆர்.ஆட்சிகாலத்தில் கோமல் சாமிநாதனின் தண்ணீர் தண்ணீர் நாடகத்தை இயக்குநர் பாலசந்தர் திரைப்படமாக எடுத்தார்.இதை தனது இலட்சிய படம் என்றார் பாலசந்தர்.அப்போது செய்தித்துறை அமைச்சராக இருந்தவர் பெரியாரின் சீடர் என்று இன்றளவும் பேசிக் கொண்டிருக்கும் ஆர்.எம்.வீரப்பன்.இவர்கள் தான் தண்ணீர் தண்ணீர் படத்தை தடை செய்ய முயன்றார்கள்;மீறி இந்தப் படம்  வந்த பொழுது ஆங்காங்கே ஆள் வைத்து மிரட்டினார்கள்.படத்தை  எதிர்த்து கருத்துகள் சொன்னார்கள்..ஆனாலும் படம் வெற்றிகரமாக ஓடியது.

இவர்கள் படத்தை தடைசெய்ய முயலக் காரணம் படம் பேசிய அன்றைய  அரசியல். எம்.ஜி.ஆர் தன் படங்களில் அரசியல் பேசுவார்;கொடி காட்டுவார்.தானே முதல்வராக இருந்த பொழுது இன்னொரு படம் மாநிலத்தின் அரசியலை பேசினால் பயந்து அலறி தடை செய்ய முயல்வார்.இதே எம்.ஜி.ஆர் திரைப்படத்தை  தடை செய்யும் மசோதாவை 1987 ல் கொண்டு வந்த பொழுது பெரிய எதிர்ப்பை சந்தித்தார்.தமிழ்நாடு முற்போக்கு எழுத்தாளர் சங்கம் திரையுலகின் கோபத்திற்கு களம் அமைத்து சிறப்பு மாநாடு ஒன்றை சென்னையில் நடத்தியது.பின்னர் மசோதா கிடப்பில் போடப்பட்டது என்பது வரலாறு.

இதே பாதையில் ஜெயலலிதாவும் இறங்கி இருக்கிறார்.அதுவும் சட்டத்தின் ஓட்டைகளைப்  பயன்படுத்தி சட்டப்படி அடிக்கப் பார்க்கிறார்.
தணிக்கைச் சான்றிதழ் பெறாத படங்களை பொதுத் திரையிடுதலிலிருந்து விலக்கி அமைதியை காக்க வேண்டி மாநிலத்திற்கு பொறுப்பளிக்கப்பட்ட  `திரையிடுதலை முறைப்படுத்தும் சட்டத்தை  ,தானே தணிக்கை வாரியம் என்பது  போலவும் ,முழுப்பொறுப்பு என்பதாகவும் நினைத்துக் கொண்டு ,தணிக்கைப் பெற்ற படத்தை அமைதிக்கு குந்தகம் செய்யும் என்று சொல்லி பொதுத் திரையிடலிலிருந்து நீக்கி வைப்பது   சட்டத்தை தன் தேவைக்கேற்ப வளைப்பது ஆகும்.

அதிகாரம் பகிர்ந்தளிக்கப்பட்டப் பிறகு அதனுள் நின்று செயல்பட வேண்டிய அரசு அதை மீறுவது என்பது தவறான செயல்.அதிகார வரம்புப் பட்டியலை மாற்ற வேண்டும் என்று மாநில மக்களின் கருத்தையும் அறிந்த பிறகு மாநில அரசு இதற்கான இயக்கத்தை எடுக்க முன் வந்தால் அதை ஆதரிப்பது என்பது தனி.பிரச்சினை இப்பொழுது இதை ஒட்டி அல்ல.

விஸ்வரூபத்தை பொறுத்த அளவில் ஜெயலலிதா அரசு பொறுப்பை மீறி போக்கிரித்தனமாக நடந்து கொண்டது என்பதே யதார்த்தம். விஸ்வரூபத்தை15 நாட்கள் திரையிட தடை செய்ததை எதிர்த்து ஊடக உலகம,அரசியல் உலகம்,முற்போக்கு எழுத்தாளர் கலைஞர்கள் சங்கம்,திரை உலகினர்,பொதுமக்கள் கொந்தளித்ததை ஒட்டி சமரசம் செய்கிறேன் என்று இறங்கி வந்தார். மாநிலங்களுக்கு தணிக்கைச் சான்றிதழ் கிடைக்கப் பெற்றப் படங்களை தம் மாநில எல்லைக்குள் கொட்டகையில் திரையிட லைசென்ஸ் என்கிற அனுமதி தர அல்லது மறுக்க மட்டுமே இயலும்.படத்தை தடை செய்யும் அதிகாரம் இல்லை.

தணிக்கை பெற்ற படத்தை மறு தணிக்கைக்கு உந்தித் தள்ளுவது என்பதோ,சட்டம் ஒழுங்கிற்கு குந்தகம் நேரும் என்பதோ சொல்லும் இந்தக் காரணம் பெண்களை படுகேவலமாக சித்திரித்த பல தமிழ்ப் படங்களை எதிர்த்து பெண்கள் கொந்தளித்தப் பொழுது திரையரங்கின் முன் போராட்டம் நடத்திய பொழுது அரசு அசைந்து கொடுக்கவே இல்லை. பராசக்தி ,சிவப்புமல்லி,தண்ணிர் தண்ணீர் ,விஸ்வரூபம் என்று மட்டும் அரசு   விஸ்வரூபம் காட்டி நின்றது;நிற்கிறது.

குறிப்பு:நண்பர்களின் வருகையும் வாசிப்பும் உவப்பு தருகின்றது.
உங்கள் கருத்தை மேலும் தெரியப்படுத்துங்கள்;விவாதிப்பு பார்வையை துலக்கமாக்கும்;நன்றி

விஸ்வரூபம் :சர்ச்சையும் சந்தேகமும் 3

உலகநாயகன் என்ற பட்டத்தோடு மட்டும் இருந்தவரை மெய்யான உலகநாயகனாக்கியப் பெருமை தமிழ்நாட்டு முதலமைச்சர் ஜெயலலிதாவை சாரும். விஸ்வரூபத்திற்கான தடை நீட்டிப்பு  ஒட்டி கமல்ஹாசன் ஊடகங்களுக்கு அளித்த பேட்டியின் தன்மை,செய்திகள் மனசாட்சி உள்ளோரை உலுக்கி விட்டது.

இந்தியா முழுவதும் செய்தி தீயாக பரவி விட்டது. இனி கமல்ஹாசன் ஆழ்வார்பேட்டை ஆண்டவன் மட்டுமில்லை  என உணர்த்தி விட்டன ஊடகம்.

தமிழ்த் திரைஉலகு சார்ந்த பல கலைஞர்கள் குறிப்பாக பாரதிராஜா,மனிரத்தினம்,ரஜினிகாந்த்,விஜயகாந்த்,சிம்பு,ராதிகா,குஷ்பு,பார்த்திபன்,செல்வமணி,கே.ஆர்,பிரபு,சிவகுமார்,வைரமுத்து,அரவிந்தசாமி,எஸ்.ஏ.ராஜ்கண்ணு போன்றோர் நெருக்கடியான இந்த கட்டத்தில் கமலஹாசனோடு நிற்கிறார்கள்;வாழ்த்துகள்.

 இந்தப் படத்தை தமிழக அரசு அணுகிய முறையை கடுமையாகச் சாடி இருக்கிறது தமிழ்நாடு முற்போக்கு எழுத்தாளர் கலைஞர்கள் சங்கம்

பரமக்குடி கலவரம்,தர்மபுரி கொடூரம் என அண்மையில் தமிழகத்தில் நிகழ்ந்த அதிமுக்கிய நிகழ்வுகளில் ஊடகத்தை சந்திக்காத ஜெயலலிதா,விஸ்வரூபம் பிரச்சினையில் இன்று மதியம்(ஜனவரி 31) ஊடகத்தை சந்தித்திருக்கிறார்.

ஆறு நாட்களாக பேசப்பட்டும் எழுப்பப்பட்டும் வருகின்ற இப்பிரச்சினை சார்ந்த  பல கேள்விகள்,விமர்சனங்களுக்கு முதல்வர் ஜெயலலிதா பதிலளித்திருக்கிறார்.கூடவே  கமலஹாசன் பற்றி அவர் வைத்திருந்த கருத்துகள் அவர் கொண்ட கோபத்தால் வெளியேயும் வந்துவிட்டன

கமல்ஹாசன் இந்தப் பிரச்சினையை ஏன் கோட்டிற்கு கொண்டு சென்றார்?அவர் ஏன் என்னிடம் முறையிடவில்லை?அவர் சொத்தை இழப்பதற்கு என் அரசு எப்படி பொறுப்பேற்க முடியும்?வேட்டி கட்டிய தமிழன்தான் அடுத்த இந்திய பிரதமர் என்று இவர் சொல்வதற்கு இவர் என்ன கிங்மேக்கரா?

என்று ஜெயலலிதா தொடுத்த பல எதிர் கேள்விகளால் தன்னைத் தானே அம்பலப்படுத்திக் கொண்டார். இதுவரை ஊடகங்களும் பொதுமக்களும் விஸ்வரூப சிக்கல் குறித்து முன் வைத்த விமர்சனங்கள்,கருத்துகள்  சரி என்று இன்று ஜெயலலிதாவால்  நிரூபிக்கப்பட்டுள்ளது.

எவர் ஒருவரும் தன்னை நாடி நிற்காமல் போனால் இந்தக் கதிதான் என்று  ஏனைய திரைக்கலைஞர்களை விஸ்வரூப தடை வழி  மிரட்டியிருக்கிறார் ஜெயலலிதா. இவர் என்ன கிங்மேக்கரா என்று கேட்பதன் வழியாகவும் ஒவ்வோர் குடிமக்களுக்குமான கருத்து  வெளியிடும் உரிமையை மறுத்து தனது காழ்ப்பை  மெய்ப்பித்திருக்கிறார் தமிழக முதல்வர்.

கூடவே இந்த பேட்டியில் ஜெயலலிதா உண்மைக்கு மாறானவைகளை  சொல்லி இருக்கிறார்.ஜெயா தொலைக்காட்சிக்கு விஸ்வரூப படத்தின் செயற்கை கோள் ஒளிபரப்புரிமை கிடைக்காததாலேயே இந்த சிக்கல்  என்ற கருத்திற்கு ஜெயலலிதா பதில் சொல்கையில், ஜெயா தொலைக்காட்சியில் தான் எந்த பங்குதாரரோ, பொறுப்போ வகிக்கவில்லை என்றும் இந்த தொலைக்காட்சி அதிமுக வை ஆதரிக்கிறது என்றும் சொல்லிக் கொண்டார்.

 நாளாக நாளாக விஸ்வரூபம் திரைப்படம் குறித்த சர்சைகளும் சந்தேகங்களும் நீடித்துக் கொண்டிருக்கின்றன.புரியாத புதிர்கள் புரிய தொடங்கி இருக்கின்றன.அடுத்தடுத்து கூடுதல் தகவல்களோடு இந்த பத்தி தொடரும்.



.

விஸ்வரூபம் :சர்ச்சையும் சந்தேகமும் 2

நேற்று ஒரு நபர் அமர்வு(வெங்கட்ராமன்) சென்னை உயர்நீதிமன்றம்,
விஸ்வரூபம் திரைப்படத்திற்கு தமிழக அரசு விதித்திருந்த 15 நாட்கள் தடையை விலக்கி அளித்த  தீர்ப்பின் மீது இன்று மாலை(ஜனவர் 30) இருவர் அமர்வு நீதிமன்றம்(தலைமை நீதிபதி பொறுப்பு எமிலி தர்மாராவ்,அருணா ஜெகதீசன்) தடை விதித்திருக்கிறது.

வரும் திங்கள் அன்று அரசு தரப்பு விளக்கத்தை இருவர் அமர்வு நீதிமன்றம் கோரி இருக்கிறது.பிப்ரவரி 6 அன்று இதன் மீது இறுதி தீர்ப்பு அளிப்பதாக நம்பப்படுகிறது.

இஸ்லாமிய தரப்பிடமிருந்து பெறப்பட்ட புகாரின் மீது ஓர் ஆக்கப்பூர்வமான தீர்வை எட்டுவதற்கு மாறாக செங்கோல் ஏந்தி பரிபாலனம் செய்ய வேண்டிய அரசு,செங்கோலை கன்னக்கோலாக மாற்றி இருக்கிறது.

நேற்று வந்த தீர்ப்பை ஒட்டி தமிழ்நாடு எங்கும் பல திரையரங்குகளில் இன்று  காலை காட்சியாக படம் ஓடிக்கொண்டிருந்த பொழுது அதிமுக தரப்பினர் காவல்துறை உதவியோடு திரையரங்கினுள் நுழைந்து காட்சியை நிறுத்தவும் பொதுமக்களை பீதிசெய்தும் ரகளை செய்திருக்கின்றனர்.இதை அரசு செய்ய வேண்டியது என்ன என்ற கேள்வி பெரிதாய் எழுகிறது.

விஸ்வரூபம் திரைப்படத்தின் செய்தி இதன் ஆக்கம் என்பது பேசப்படவேண்டியதுதான்.விவாதிக்கப்படவேண்டியதுதான்.ஆனால் விவாதிக்கப்பட வேண்டிய விடயத்தை வேதனையாக்கி தீர்விற்கு உதவி செய்ய வேண்டிய அரசே எதிர்தரப்பாக மாறி நிற்பது வேதனையானது

 இன்று கமல்ஹாசன் அளித்திருக்கும் பேட்டியில் தனக்கு நீதி கிடைக்கவில்லை என்றால் மதச்சார்பின்மையை மதிக்கும் மாநிலம் அல்லது தேசத்தில் குடியேறுவேன் என்று சொல்லி இருக்கிறார்.நீதிபதி நீதிமன்றத்தில் எழுப்பிய கேள்வி ஒன்றிற்கு கமல்ஹாசன் பதில் சொல்கையில் தேசஒற்றுமையா?அல்லது தனிநபர் சுதந்திரமா? என்றால் தேசஒற்றுமை முக்கியம் என்றும் பதில் சொல்லி இருக்கிறார்.

இன்று மாலை இஸ்லாம் தூதுக்குழு ஒன்றிடம்(ஹாருண் எம்.பி,,பஷீர் அகமது உள்ளிட்ட குழு) கமல் நடத்திய பேச்சுவார்த்தையில் அவர்கள் சுட்டிக் காட்டிய எழுதிக் கொடுத்திருக்கக் கூடிய ஆட்சேபங்களை நீக்கி படத்தை வெளியிட தயார் என்று அறிவித்திருக்கிறார்.

இந்த சந்திப்பிற்கு கவிஞர் வைரமுத்து பாலமாகச் செயல்பட்டிருக்கிறார்.இனிமேல் இந்த படம் குறித்து எந்த கருத்து வித்தியாசங்களும் தமக்கோ அல்லது இஸ்லாமிய குடும்பத்தினருக்கோ இல்லை என்றும் கமல் அறிவித்திருக்கிறார்.

இஸ்லாமிய தரப்பிலிருந்து இந்த திரைப்படத்திற்கு எதிர்ப்பு வரும் என்று சொல்லியே அரசு இன்று வரை பேசிவருகிறது.இன்றைக்கு எதிர்ப்பு காட்டிய அமைப்புகளே பேச்சுவார்த்தையில் தீர்வை எட்டியிருக்கிறது.எதை சொல்லி நீதிமன்றத்தில் இதுவரை  ஜெயலலிதா அரசு வாதாடியதோ அந்தக் காரணமே இப்பொழுது இல்லை என்றான பின் அரசு தன் விளக்கத்தை எப்படி அளிக்க இருக்கிறது என்று பின்னர் பார்ப்போம்.

இந்த அச்சுறுத்தலிற்கு ஜெயலலிதாவிற்கு தூபம் போட்டவர்கள் தமிழ்நாட்டு உள்துறைச்  செயலாளர் ராஜகோபாலன் மற்றும் சென்னை மாநகரகாவல் ஆணையர் ஜார்ஜ் என்றும் சொல்லப்படுகிறது.

அரசின் இந்த அச்சுறுத்தல் காரணமாக கமல்ஹாசன் மீது பெரியளவிற்கு அனுதாபம் ,ஆதரவு அலை உருவாகிக் கொண்டிருப்பதையும் காண முடிகிறது.

விஸ்வரூபம் :சர்ச்சையும் சந்தேகமும் 1

விஸ்வரூபம் திரைப்படத்தின் மீது தமிழக அரசு பதினைந்து நாட்களுக்கு விதித்திருந்த தடையை சென்னை உயர்நீதிமன்றம் விலக்கி இருக்கிறது.

கமல்ஹாசன்,இஸ்லாமிய அமைப்புகள்,தமிழ்நாடு அரசு இடையே நடைபெற்ற காரசார வாக்குவாதத்தின் நிறைவில்,படத்தின் மீது தடை விதிக்க இயலாது என்றும்,மறுநாள் முதல்(ஜனவரி 29) படத்தை வெளியிடலாம் என்றும்,144 தடை உத்தரவை நீக்கிக் கொள்ள வேண்டும் என்றும்,இது யாரையும் புண்படுத்தும் படம் அல்ல என்று அறிவிப்பு செய்து படத்தை திரையிட அனுமதி அளித்துள்ள நீதிபதி வெங்கட்ராமன் அவர்களைப் பாராட்டுகிறோம்.

2011ல் ஆட்சிக்கு வந்தது முதல் தமிழக அரசு அதன் முதல்வர் சில சிறப்பான திட்டங்களை நிறைவேற்றி இருக்கிறார்;மாநிலத்திற்கு உதவ மறுக்கும் மத்திய அர சை எதிர்த்து சண்டமாருதமும் செய்து வருகிறார்.ஆனால்
விஸ்வரூபம் பிரச்சனையில் முதல்வர் ஜெயலலிதாவும் மாநில உள்துறையும் கையாண்ட விதம் சந்தேகத்தை எழுப்பி இருக்கிறது.

ஒரு தரப்பு புகார் அளிக்கும் போது,மறுதரப்பை அழைத்து விளக்கம் கேட்டு தீர்விற்குப் போவதற்கு மாறாக ஒரு தரப்பாக நடந்து கொள்வது நேர்மையான அணுகுமுறை அல்ல.விஸ்வரூபம் பிரச்சினையில் அரசு ஒருதலைசார்பாகவே நடந்து கொண்டது.

இஸ்லாமிய அமைப்புகள் இரண்டு சுற்று கமல்ஹாசனோடு பேசியிருக்கிறது.படமும் போட்டு காட்டப்பட்டிருக்கிறது.படம் பார்த்த உடன் மாற்று கருத்தைச்சொல்லாமல் பல நாட்கள் கடந்து,படம் இஸ்லாமியர்களை தீவிரவாதிகளாகச் சித்திரிக்கிறது என்று சொல்வது யாரோ இஸ்லாமிய தரப்பை தூண்டி விட்டிருக்கிறார்கள் என கருத வேண்டி உள்ளது.

சென்னை காவல்துறையில் கொடுக்கப்பட்ட புகாருக்கு சென்னையை சுற்றி படம் திரையிடக்கூடாது என காவல்துறை,144 ஐ காரணம் காட்டி தடைஉத்தரவு விதித்திருக்கலாமே தவிர(வாதத்திற்கு)மொத்த தமிழ்நாட்டிற்குமாக தடை விதித்திருப்பதுதான் அரசை சந்தேகத்தோடு பார்க்க வைத்திருக்கிறது.

அரசின் இந்த ஒருதலைசார்பிற்கு காரணம் என்ன என்று நாம் ஊகிக்கலாமெனினும் அரசு தன் தரப்பு விளக்கத்தை மக்கள் மத்தியில் விளக்க வேண்டும்.மாறாக சென்னை முதல் அமர்வு நீதிமன்றத்தில் தமிழக அரசு மேல்முறையீடு செய்திருக்கிறது.இதன் தீர்ப்பு வந்த பின் ஏனைய விடயத்தை அலசலாம்..   

80 களின் தமிழ் சினிமா

1980 களில் தமிழ்திரை இசையும் வாழ்வும் தலைப்பில் விஜய் டிவியில் நீயா?நானா? விவாதம் போனது;பார்த்தேன்;ரசித்தேன்.அந்த காலப் பாடல்களை ஆண்களை விட பெண்கள் நன்றாகவே  விவாதத்தில் பாடினார்கள்.காலத்தில் நானும் உறைந்தேன்.80களின் வாழ்க்கை இப்படியாகத்தான் இருந்தது என்கிற கோபிநாத்தின்  தீர்ப்பை ஏற்றுக் கொள்ள இயலாது.1980 என்பது அரசியல்,சமுகம்,ஈழம்,இலக்கியம் ,பெண்கள்,தொழிலாளர்  போன்ற வ்கைமைகளில் பெரும் கொந்தளிப்பும்,எழுச்சியும் நடந்த காலம்.80 களின் சமுகத்தை தமிழ் சினிமா பிரதிபலிக்க வில்லை.மடை மாற்றம் செய்தது.நல்ல பாடல்கள் வந்தன;சில நல்ல படங்கள் வந்தன;ரசிகமனோநிலை உயரத் தொடங்கியது எனச் சொல்லலாம்.ஆனால் 80களில் வந்த தமிழ் பாடல்களில் தமிழர் வாழ்கை இருந்தது என்பது சரி அல்ல;அதே நேரம் தமிழர் வாழ்வியலை சொன்ன படங்களின் பாடல்கள் விவாதக் காட்சியில் பாடப்படவும் இல்லை.தமிழ் சினிமாவில் தமிழர் வாழ்வியல் என்று ஒரு டாக் ஷோ வையுங்க கோபி;அசத்துவோம்

சிக்கலில் தவிக்கும் தமிழ் சினிமா: தீர்வை நோக்கிய பார்வை

3/3

                    

கடந்த சில மாதங்களாக புகைந்து கொண்டிருந்த தமிழ்த் திரைப்படத் தொழிலாளர் பிரச்சினை எரிய ஆரம்பித்திருக்கிறது.இயக்குநர்கள் முதல் கேட்டரிங் ஊழியர்கள் வரை இருபத்து நான்கு சங்கத் தொழிலாளர்களின்  வாழ்வாதாரப் பிரச்சினை. பதினைந்தாயிரம் தொழிலாளர்களைச்  சார்ந்து இருக்கும் சுமார் ஒரு லட்சம் பேர்களின் வாழ்க்கை   இன்று வீதிக்கு வந்திருக்கின்றது.

தயாரிப்பாளர்கள்,தொழிலாளர்களின்  காரசாரமான அறிக்கைப் போர் ஊடகங்களில் நடைப்பெற்று கொண்டிருக்கிறது.மூன்றாண்டுகளுக்கு ஒரு முறை இரு தரப்பும்  பேசி புதுப்பிக்கப்பட வேண்டிய சம்பள ஒப்பந்தம்,ஆறு மாத காலமாக இழுத்துக் கொண்டு வருகிறது. ஜெயலலிதா முதல்வராகப் பொறுப்பேற்று ஆறு மாதங்கள் ஓடி விட்டன.போன ஆண்டே பேசியிருக்க வேண்டிய விசயம் இது

சட்டம் ஒரு இருட்டறை,சாதிக்கொரு நீதி,சிவப்புமல்லி,நான் சிவப்பு மனிதன் என்று படம் எடுத்த இயக்குநர் எஸ்.ஏ.சந்திரசேகர்  தயாரிப்பாளராகி,இன்று தயாரிப்பாளர் சங்கத் தலைவரும் ஆகிவிட்டார்..கடந்த தி.மு.க ஆட்சியில் இவரும் இவர் மகன் நடிகர் விஜய்யும் தொழில் செய்ய முடியாமல் பாதிக்கப்பட்டிருந்தும்  ,இன்று தானே முன் நின்று தீர்க்கப் படவேண்டிய விசயத்தை தீர்க்காமல் முதலாளிகள் சங்கம் சார்பாக ,தொழிலாளர்களைப் பார்த்து சவால் விடுகிறார்.

 தொழிலாளர் சங்கமும்(பெப்ஸி) ஒப்பந்தம் எட்டப்படாத வரை,படப்பிடிப்பிற்கு ஒத்துழைப்பு தருவதில்லை என அறிவித்திருக்கிறது..தாங்கள் சொல்லும் சம்பளத்தை வாங்கிக் கொண்டு வேலை செய்யும் ஆட்களை வைத்து படப்பிடிப்பு நடத்தப் போவதாக தயாரிப்பாளர் சங்கம் மீண்டும் அறிவித்திருக்கிறது.

மூன்றாண்டுகளுக்கு முன்பு வாங்கிய தினக்கூலி ரூபாய் முன்னூற்று ஐம்பதிலிருந்து,நாற்பது சதம் உயர்த்தி நானூற்று தொண்ணூறு தரவேண்டும் என்பது தொழிலாளர் கோரிக்கை.மனம் திறந்து பேசினால் சுமுகத் தீர்வை எட்டமுடியும்.தொழிலாளர்களின் இந்த கோரிக்கை அதிகமானது அல்ல.

 கூலியைத் தவிர்த்து வாடகைப்படி,மருத்துவ செலவு,ஓய்வூதியம் என்று எந்தச் சலுகையும் இல்லாத சூழலில்,விலைவாசி பிரச்சினை,நகரின் மையப் பகுதிகளில் குடியிருக்க வேண்டிய தொழிற்சூழல்,பிள்ளைகளின் கல்விச்செலவு என்று பார்க்கிற போது, ஐநூறு தினக்கூலி அதிகப்படியானதில்லை.

தயாரிப்பாளர்களுக்கும் சிக்கல்கள் இருக்கும். கோடிக்கணக்கான பணத்தை முதலீடு செய்து ,படம் ஓடுமா?ஓடாதா?என்கிற அச்சம்.வாங்கிய பணத்திற்கான வட்டி:நடிகர்கள்,இயக்குநர்கள்,தொழிற்நுட்பக் கலைஞர்களின் அதீதமான சம்பளம்,விளம்பரச்செலவு,வரி,அரங்க வாடகை என பலவற்றையும் பார்க்க வேண்டி இருக்கும்.

இந்தப் பிரச்சினையை தீர்க்க  நல்ல கதைதான் அடிப்படையான தேவை.,திறமையான ,அனுசரித்துப் போகக்கூடிய  கலைஞர்கள்:இவர்கள் புதியவர்களாகக் கூட இருக்கட்டும். தேவையான குறைந்தபட்ச விளம்பரம்;ரசிகர்கள் பார்க்கக்கூடிய அளவிலான கட்டணம்:படம் வெளியாகி ஐம்பது நாட்கள் ஆன பிறகு  படத்தை,தொலைக்காட்சி, டி.வி.டி  வடிவில் வெளியிட்டு உரிய லாபத்தைப் பெறுவது என திட்டமிட்டு பணியாற்றினால் இழப்பு என்பதில்லை.

தமிழ்த் திரைப்படத் தயாரிப்பாளர்களுக்கு ,திரைப்படம்  கலையும் தொழிலுமான ஒன்று  என்பது பிடிபட மாட்டேன் என்கிறது.புதிய பார்வை,வாசிப்பு என்பதும் பலரிடம் இல்லை.போட்டப் பணத்தை  எப்படியாவது  ஈட்ட வேண்டும் என்கிற வெறிதான் இருக்கிறது. மாறி வரும் ரசிகர்களின் மனம்,புதியச்சூழல் இதையெல்லாம். கணக்கில் கொள்ளாத மசாலாக்களாக  இருந்து விட்டு ,தொழிலையே சிக்கலுக்கு உள்ளாக்கிக் கொண்டு இருக்கிறார்கள்.அதோடு முதலாளிகள் என்கிற மமதை வேறு.

பிரபல நடிகர்கள்,இயக்குநர்கள்,,முக்கிய தொழில்நுட்பக கலைஞர்களின் ஒப்பந்தத்திற்கு உட்படாத பல கோடி அளவிலான சம்பளம் மொத்தத் தொழிலையே நாசம் செய்து கொண்டிருக்கிறது.ஏ.ஆர்.முருகதாஸின் இன்றைய சம்பளம் பதினைந்து கோடி.,ரஜினி,சூர்யா,அஜீத்,விஜய், இவர்களின் சம்பளமும் தலா பதினைந்து முதல் இருபது கோடி என்றால் தயாரிப்பு செலவு முப்பது,நாற்பது கோடி ரூபாய் என உயர்ந்து , நியாமான வணிகம் போய் சூதாட்டமும்,கட்டை பஞ்சாயத்துமாகத்தான்   தன்மை மாறும்.

சிக்கல்களை பல தரப்பும் அறிந்தே வைத்திருக்கிறார்கள்.எனினும் விட்டுக் கொடுக்க மாட்டாத போட்டி,வணிகவெறி மொத்தத் துறையையே கெடுத்து விடும் என்பதை தொழிலாளர்கள் அல்லாத ஏனையோர் சிந்தித்து பார்க்க வேண்டும்.அரசு பார்வையாளராக  அல்லாமல் ,மூன்றாம் முக்கியத் தரப்பாக இருந்து ,தொழிலாளர்களின் சம்பளம்,மற்றும் ஆரோக்கியமான தொழிற்சூழலை கட்டமைக்க  வேண்டும்.,திரைப்பட தொழில் வளர்ச்சிக் கழகம் ஒன்றை அமைத்து  நிரந்தரமான,சீரான வளர்ச்சிக்கு அடித்தளமிட வேண்டும்.
( நன்றி:மாற்று இணைய இதழ்)
>> கட்டுரை முகப்பில் உள்ள நிமிர்ந்த பெருவிரல் சுட்டியை அழுத்தி வாக்களிக்கலாம்<<

நண்பன்: கல்விச் சூழலை விமர்சிக்கும் படம்

தொடர் பணிகளால் பல மாதங்களுக்குப் பிறகு தமிழ் சினிமா பார்த்தேன்;அது நண்பன்.மதியம் இரண்டே முக்கால் காட்சிக்கு சென்னை பெரம்பூர் பிருந்தா வாசலில் டிக்கெட் வாங்கி விட்டு காத்திருந்தேன்.நான்கைந்து கல்லூரி மாணவர்கள் மாணவிகளோடு காதலாடிக் கொண்டிருந்தார்கள்.அவர்களின் கலாய்ப்பு , மொழி,உடை,பாவனைகளை பார்த்திருக்கையில்  மணி அடிக்கப்பட்டு திரையரங்கம் உள் சென்ற சில நிமிடங்களில் பப் பப் பப்பரப்பா என்ற ஒலியோடு ஜெமினி நிறுவனத்தின் வர்த்தக முத்திரையோடு படம் தொடங்கிய கொஞ்சம் நேரத்திலேயே அதனோடு ஒன்றிப் போக முடிந்தது.

கதைதான் காரணம். .கல்வி கற்றுக் கொள்தலில் மாணவர்களின் சொந்த தேடலை,கற்பனையை கவனத்தில் கொள்ளாத கரடு தட்டிப் போன  ஒர் எஞ்னியரிங் கல்லூரி. மதிப்பெண் வாங்கும் பொருட்டு மனப்பாடம் செய்யும் முறை,புத்தகத்தை உருப்போட்டு களிமண்ணாக வார்க்கும் ஆசிரியர்கள்,பாடத்திற்கு வெளியே மாணவ்ர்கள் செல்லாமல் தடுப்பதற்காக  நிர்வாகம் போட்டு விடும் படுதா என கதை சமகாலத்தின் கல்விச் சூழலை விமர்சிக்கத் தொடங்க  நமக்கு ஆர்வம் கூடி விடுகிறது.

காதல்,கல்யாணம்,குறித்த விமர்சனப் பார்வைகள் ,நண்பர்களின் குடும்ப துயரம், அதில் பங்கு கொள்வது ,அதற்கான உதவிகள் செய்வது என படம் ஆக்கப்பூர்வமான பங்களிப்பைச் செய்கிறது.எங்கேயும் இந்த காட்சிகள் செயற்கையாக துருத்திக் கொண்டு இல்லாமல் இயல்பான ஒட்டத்தில்,கலகலப்பான காமெடிகளோடு படம் ஆக்கப்பட்டிருப்பது ப்ளஸ் பாய்ண்ட்.

ஒரே சிஸ்டத்தில் கேள்விகள் கேட்டு பயணப்படுகிற ஒரு பிரிவு:எந்த கேள்விகளும் அற்று சிஸ்டத்தின் பின் செல்கிற இன்னொரு பிரிவு என இருவகையான சிந்தனை ஓட்டத்தை பதிவு செய்கிறது படம்.இரு பிரிவினரின் முரண்பாடுகளை  காட்சி படுத்தி இருக்கும் படம் ,கேள்விகள் கேட்கும் பிரிவு சந்திக்கும் சிஸ்டத்தின் நெருக்கடிகளை காட்சிப் படுத்தி இருக்கலாம். இறுதியில் இரு பிரிவும் சார்ந்து வாழக்கூடிய சனநாயகத்தன்மையோடு சிஸ்டத்தின் தன்மை இருப்பதாக உணர்த்தி படம் முடிகிறது.

தொடக்கம் முதல் இறுதி வரை எங்கேயும் சிக்கல் இல்லாமல் படம் செல்கிறது.காட்சிகள்,ஒளி,இசை,நடிப்பு அனைத்திலும் ஒரு ப்ரக்ஷ் லுக்கை பார்க்க முடிகிறது.படத்தின் ஹீரோ விஜய் நண்பர்ளிடம் உதை வாங்குவதை இளைய தளபதியின் ரசிகர்கள் ஏற்றுக் கொண்டிருப்பது ஆரோக்கிய ரசனையின் தொடக்கம்.மூன்று ஹீரோக்கள் இணைந்து நடித்திருக்கும் படம் அடுத்தடுத்த நல்ல படங்களுக்கு பாதை அமைக்கட்டும் 

சங்கர் படம் அத்தனையும் பார்த்த ரசிகன்,ஒரு கவிஞன் என்ற நோக்கில் எனக்கு பிடித்த சங்கரின் இரண்டாவது படம் (சில விமர்சனம் இருந்தாலும்) நண்பன்.முதல் படம் இந்தியன்.