தமிழ் இலக்கியத்தில் மேலாண்மையின் இடம்

சென்னை ராஜீவ்காந்தி அரசு மருத்துவமனையின் எமர்ஜென்சி வார்ட் 201 ல் சிகிட்சைக்காக , மேலாண்மை பொன்னுசாமியை அக்டோபர் 29 அதிகாலை 12.30 மணிக்கு கொண்டு சேர்த்தோம்.முப்பத்து இரண்டு மணி நேரம் மருத்துவர்கள் அவரைக் காப்பாற்ற முயற்சி எடுத்துக் கொண்டதை நேராக இருந்து பார்த்தேன். மேலாண்மையும் தன்னோடு போராடிக் கொண்டிருந்தார். அறுபத்தியாறு வயது இறப்பதற்கான வயதல்லதான். அக்டோபர் 27 அதிகாலை 3 மணிக்கு, கழிவறை போய் திரும்புகையில், நிலை தடுமாறி விழுந்து, கழுத்து தண்டுவடம் சேதாரம் ஆகி, சிகிட்சை பலனின்றி  அக்டோபர் 30 காலை 8.15 மணி இறந்தார்.

அக்டோபர் 24 மாலை மேலாண்மை பொன்னுச்சாமியை , அவரது வீட்டில் பார்த்துப் பேசிக் கொண்டிருந்தேன். கடந்த ஐந்தாண்டுகளாக பார்க்கின்சன் நோயால் பாதிக்கப்பட்டிருந்தார். ஆனாலும் அவரின் வாசிப்பும் எழுத்தும் அவரை நோயின் கடுமையிலிருந்து சற்றே பாதுகாத்து வைத்திருந்தது.

சு.வெங்கடேசன் ஆனந்த விகடனில் எழுதி வரும் வேள்பாரி தொடர்கதையை நான் அவரைப் பார்க்கப் போகையில் வாசித்துக் கொண்டிருந்தார். எப்படி இருக்கிறது வேள்பாரி என்றேன். நன்றாக எழுதிக் கொண்டிருக்கிறார் வெங்கடேசன். பாரியை முன் வைத்து மக்கள் வரலாற்றை , மார்க்சிஸ்ட் பார்வையில் அருமையாக எழுதிக் கொண்டிருக்கிறார் என்று சொன்னார்.

அக்டோபர் 28 அவரை மீண்டும் பார்ப்பதாக சொல்லி கிளம்பிப் போனேன். ஆனால் அவரை மருத்துவமனையில்தான் பார்க்க முடிந்தது. அக்டோபர் 29 மாலை அவர்,எமர்ஜென்சி வார்டில் சிகிட்சையில் இருந்த பொழுது, பேசணும் ; எழுதணும் என்று எழுத்துகளை உச்சரித்துக் கொண்டிருந்தார். நான் அருகிருந்து அவர் இடது உள்ளங்கையை தடவி விட்டுக் கொண்டே எழுதலாம் மேலாண்மை ; பேசலாம் என அவரோடு பேசிக் கொண்டிருந்தேன்.

புது எழுத்தாளர்களின் படைப்புகளைப் தொடர்ந்து படிப்பார் மேலாண்மை. அவர்களை நேரில் காண்கையில் ஞாபகமாக அது குறித்துப் பேசுவார். பாராட்டுவார். தொடர்ந்து எழுதுங்கள் என்று உற்சாகப்படுத்துவார். செம்மலர் இதழ் ஆசிரியர் குழுவில் அவர் இருந்த பொழுது, இப்படியான இளம் எழுத்தாளர்களின் கதை,கவிதைகளை பிரசுரிக்க ஆர்வம் காட்டுவார்.

தன் கதைமொழியை எளிமையாகக் கையாண்டவர் மேலாண்மை பொன்னுச்சாமி. இந்த எளிமையை அவர் அறிந்தே செய்தார். சுமாரான படிப்பறிவு கொண்ட வாசகர்களும் , தன் படைப்புகளைப் படித்து புரிந்து கொள்ளவும் விவாதிக்கவும் அவர் மேற்கொண்ட உத்திதான் எளிமையான மொழிப் பயன்பாடு. இதில் அவர் தொடர்ந்து வெற்றி பெற்றார். 

எளிமையான மொழியின் வழியாக தான் பிறந்த விருதுநகர் மாவட்டத்தின் மக்களின் வாழ்கையை , அவர்களுக்கும் சமுகத்திற்குமான முரண்பாடுகளை, படைப்புகளாகக் கொண்டு வந்தார்.

இந்த எளிமை , பிற சிந்தனை சார்ந்த படைப்பாளர்களால்  தொடர்ந்து கிண்டல் செய்யப்பட்டதுண்டு. இந்தக் கிண்டலை மேலாண்மை பொன்னுச்சாமி அறிவார். ஆனால் அவர் எளிமையாக எழுத நேர்ந்தமைக்கு காரணங்கள் இரண்டு. ஒன்று , வாசகர்பரப்பை விரிவாக்குவது. இரண்டு,  கதை முன் வைக்கும் மார்க்சியம் சார்ந்த யதார்த்தவாத பார்வையை மக்களிடம் பரப்புவது ஆகும். 

மேலாண்மை கதைகளில் நேரடியான பிரச்சாரத் தொனி இருக்காது.அது கதையின் போக்கு சார்ந்து, சித்திரிப்பு சார்ந்து அழகியலாக இயங்கிக் கொண்டிருக்கும். 

எழுத்தும் வாசிப்பும் பல அடுக்குகளைக் கொண்டது. தொடக்கக் கல்வி கற்ற வாசகர்கள் , உயர்நிலைக்கல்வி வாசகர்கள், கல்லூரிக்கல்வி வாசகர்கள் என வாசிப்பின் தளம் , அடுக்குகள் பல ரசனைப் போக்குகளையும் கொண்டது. வாசிப்பின் இந்த அடுக்குகளை எளிய வாசகர்கள் சாராத படைப்பாளர்களால் அறிய முடியாது. 

வாசகர்களின் மனநிலை , பல்வேறு வர்க்கப் பிரிவுகள் சார்ந்த அழகியல் ரசனை , அரசியல் பார்வை இவைகளை மேலாண்மை பொன்னுச்சாமி அறிவார். மேலாண்மையின் படைப்பின் அரசியல் என்பது, கிராமப்புறம் சார்ந்த நகர்ப்புறம் சார்ந்த எளிய மக்களின் சமூகப் புரிதலை மாற்றும் முயற்சிகள் என்பதாகவே , தன் எழுத்துகளின் செயற்பாட்டுத் தளத்தைப் புரிந்து வைத்திருந்தார்.

தமிழில் வெளி வந்து கொண்டிருக்கும் பல சிந்தனைப் போக்குகள் கொண்ட படைப்புகளை மேலாண்மை வாசித்தும் அறிந்தும் வைத்திருந்தார். உழைக்கும் மக்களின் அரசியலை கிண்டல் செய்யும் புறக்கணிக்கும் எழுத்துகளையும் அறிந்து வைத்திருந்தார். இந்தப் புரிதலும் தேவையும் தான், மேலாண்மை எழுத்துகளின் வடிவமாகவும் உள்ளீடாகவும் அடியோட்டமாகவும் இருந்தன. 

 1972 ல் பரிசு என்கிற கதையோடு செம்மலரில் எழுதத் தொடங்கிய மேலாண்மை , நாற்பதாண்டுகள் தொடர்ச்சியாக எழுதிக் கொண்டிருந்தார். தொடர்ச்சியான எழுத்தின் தீவிரமும் புது வாசகப்பரப்பை பரிட்சயம் செய்து கொள்ளவும் அவர் கல்கி, ஆனந்தவிகடன் என்று தன் எழுத்தை புதுப்பரப்பிற்கு அறிமுகம் செய்தார். செம்மலர்,கல்கி,விகடன் என வாசகப்பரப்பிற்கு எளிமையும் உள்ளடக்கத்தின் தீவிரமும் கொண்டு எழுதினார்.

நூல் அறிமுகம் எழுதும் பொழுது ,  அன்னபாக்கியன் என்ற புனைபெயரில் எழுதினார். இவரின் படைப்புகளை அன்னம், குமரிப்பதிப்பகம், வானதி பதிப்பகம், நியூ செஞ்சுரி புக் அவுஸ், அம்ருதா பதிப்பகம் என வெளியிட்டுள்ளார்கள். 

செம்மலரில் மேலாண்மை தொடராக எழுதி வந்த சிறுகதைப் படைப்பின் உள்விவகாரம் , சிறுகதையின் எழுதுமுறைகளை வடிவமுறைகளைப் பற்றி அனுபவத்திலிருந்து எழுதியது பெருத்த வரவேற்பை பெற்றது.

விவசாயத்தில் நுழைந்து விட்ட நவீனமுறை , விவசாயிகளை பலி வாங்குவது பற்றி மேலண்மை எழுதிய நாவல் உயிர்நிலம் பெரும் பாராட்டைப் பெற்றது. 

சிவகாசி தீப்பெட்டி தொழிற்சாலைப் பின்னணியில் , சிறுவர்களை வேலைக்கு அமர்த்தக்கூடாது என்ற அரசின் சட்டம் , வறுமைக்கோட்டிற்கு கீழுள்ள குடும்பங்களை பாதிப்பதை, வயதிற்கு வராத சிறுமி , வயிற்றுப்பாட்டிற்காக மாராப்பு போட்டு வேலைக்குப் போவது பற்றி எழுதிய அரும்பு சிறுகதை, மேலாண்மையின் மாஸ்டர் பீஸ் ஆகும். அரும்பு கதை தமிழின் மிகச்சிறந்த நூறு சிறுகதைப் பட்டியலில் இடம் பிடித்திருக்கிறது.

ஐந்தாம் வகுப்பு வரைப் படித்த  மேலாண்மை போன்னுச்சாமி, இப்படியாக சிறுகதைகள், குறுநாவல்கள், நாவல்கள்,கட்டுரைகள் என 36 நூல்களை தமிழிற்கு தந்துள்ளார்.  பதினைந்தாண்டுகளாக மாணவர்கள் இவரின் படைப்புகளை முனைவர் பட்ட ஆய்விற்கு உட்படுத்தி வருகின்றனர். உயர்கல்வி கற்காத மேலாண்மை , பல்கலைக்கழகங்களால் பயிலப்பட்டு வருகிறார்.

தமிழ்நாட்டு அரசின் விருதுகள்,இந்திய அரசின் சாகித்ய அகாதமி விருது  பெற்ற , எழுத்தாளர் மேலாண்மை பொன்னுச்சாமியின் மறைவு, கேரள முதல்வர் பினராயி விஜயன் சொல்லியது போல, தேசத்திற்கான , முற்போக்கு இலக்கியத்திற்கான பேரிழப்பு.

ஒரு லட்சம் பார்வைக் கடந்து பயணிக்கிறது திசைச்சொல்

ஒரு லட்சம் பார்வையையைக் கடந்து பயணிக்கிறது நமது "திசைச்சொல்"

2010 ன் தமிழ்சமூகத்தின் காலம் ஆன்ராய்ட் கைபேசி,கூகுள் மின்னஞ்சல்,ஒருங்குறி,பேனாவை விலக்கி கணினியில் தட்டச்சுவது,முகநூல் ,சமூகஊடக உலகம் என தமிழ்சமூகம் நவீனப்பட்டதொரு காலம்.

இதோடு கூட ப்ளாக்கர்ஸ் ரைட்டிங் என்ற வலைப்பூக்களும் இணைந்து கொண்ட காலமது.

மாதவராஜின் தீராத பக்கங்கள் ஒரு ரோல்மாடல் தளமாக பயணித்துக் கொண்டிருக்கிறது.தமிழ்வீதி என ப்ளாக்கில் ச.தமிழ்ச்செல்வன் அலையத் தொடங்கினார்.  தந்துகி என ஆதவன் கம்பு சொழட்ட தொடங்கினார். எங்கள் முன்னத்தி தோழர் சிகரம் செந்தில்நாதன் இந்தப்  பெயரிலேயே வலைப்பூ தொடங்கி சளைக்காமல் எழுதி ஓட்டத்தில் பயணித்தார்.

நம்ம அசாக்கும் அசாக் என பெயர் சூட்டி நைட்டிசன் ஆகி விட்டார்.கவின்மலர் என்ற பெயரிலேயே எங்க கவினும் வலைப்பூ பதிவராகி வழிகாட்ட தொடங்கி விட்டார்.பெருவெளிப்பெண் என ச.விசயலட்சுமியும் வலைப்பூவில் இயங்கத் தொடங்கி விட்டார்.

இத்தகைய சூழலில் எனக்குப் பிரியமான பாரதியின் முண்டாசு முகத்தை ஐகானாக கொண்டு, "திசைச்சொல்" என்ற வலைப்பூவை 2010 ல் தொடங்கினேன்.

2026 வரை கடந்த பதினாறாண்டு காலத்தில் தொடர்ச்சியாக எழுதி இருக்கிறேன். 

முதல் சில ஆண்டுகள் வாரத்திற்கு ஒன்று என எழுதி இருக்கிறேன். போகப் போக வேகம் குறைந்து போனது ஆனாலும் வலைப்பூவை விட்டு விடவில்லை. 156 பதிவுகள் படைப்புகள் அனுபங்கள் என எழுதி இருக்கிறேன்.

என் வலைப்பூ தளம் தொடக்கத்தில் கூகுள் ப்ளாக்கர் தளம், தமிழ்மணம் , முகநூல்,வாட்ஸ் ஆப் தளங்களின் வழியாக பலரின் பார்வைக்குப் போனது.

அந்தந்த காலத்தின் உணர்வுகள் அனுபவங்களை அப்பொழுதே எழுதி விட வேண்டும்.இவ்வாறு எழுதியும் இருக்கிறேன்.அவ்வாறு எழுதும் எழுத்துகள் புதிய காலத்திற்கு கடந்த காலத்தை அறிமுகம் செய்கிற எழுத்தாக அவைகள் அமைந்து விடுகின்றன. இனி நிறைய எழுத வேண்டுமென இந்த அனுபவம் உணர்த்துகிறது.

இந்த ஆசைக்கு உறுதுணையாக என்றுமான பிரிய அன்பன் மாதவராஜின் தமிழ் திரட்டி உதவியாக வந்திருக்கிறது

இந்த 16 ஆண்டு காலத்தில் எனது திசைச்சொல் ஒரு லட்சம் வாசகப் பார்வையை கடந்த வாரம்  கம்பீரமாகக் கடந்து பயணித்துக் கொண்டிருக்கிறது.

வாசகர்கள் தோழமைகள் மாணவர்கள் இளைஞர்கள் அனைவருக்கும் இனிதான அன்பை தெரியப்படுத்திக் கொள்கிறேன்.

வருக இணைந்து பயணிப்போம்; முன் எப்போதும் இல்லாத புதிய சூழலில் நாம் இணைந்து வாசிப்பதும் விவாதிப்பதும் முதன்மையாகிறது.

இதை சாத்தியமாக்கிய உங்கள் அனைவருக்கும் நன்றி 🙏

அப்பாஸ் க்யரோஸ்தமி--சீனுராமசாமி கவிதைகளின் வாசிப்பனுவம்

அப்பாஸ் க்யரோஸ்தமி- சீனுராமசாமி கவிதைப் பிரதிகளின் ஊடான வாசிப்பனுபவம்

--இரா.தெ.முத்து

அப்பாஸ் க்யரோஸ்தமி ஈரான் சார்ந்த ஆண் பெண் மன உணர்வுகளை பெண்நிலை சார்ந்து அற்புதமான காட்சிமொழியில் இயக்கும் இயக்குநர் என்பதை இவரது தி சர்டிபிகேட் காப்பி வழி 2010 முதல் அறிவேன்.அப்பாஸ் க்யரோஸ்தமியை நான் திரைக்கலைஞர்  ரோகிணி வழி அறிவேன்.

நூல்வனத்தின் 'பாயக் காத்திருக்கும் ஓநாய்' எனும் அப்பாசின் கவிதைத் தொகுப்பை க.மோகனரங்கன் வழி மொழியக்கம் பெற்ற கவிதைத் தொகுப்பை கைகளில் ஏந்திய பொழுது மிரண்டு விட்டேன். என்னய்யா இது? அப்பாஸ் க்யரோஸ்தமி கவிஞரென யாரும் சொல்லவில்லையே என அதிர்ந்தேன். நூலின் முன்னுரையில் கவிஞர் சுகுமாரன் இதையே அவர் மொழியில் எழுதி இருக்கிறார்.

2023 ல் சீனுராமசாமியின் புகார்பெட்டியின் மீது படுத்துறங்கும் பூனை கவிதைத் தொகுப்பு வெளிவந்த பின்னரே சீனுராமசாமி கவிஞர் என அறிய வருகிறோம்.

2010 ல் தென்மேற்கு பருவக்காற்று திரைப்படம் வெளிவந்ததற்கு ஓராண்டு முன்பே வெளியான சீனுராமசாமியின் காற்றால் நடந்தேன் கவிதைத் தொகுப்பு வெளிவந்ததை நம்மில் பலர் அறிந்திருக்கவில்லை. இதுதான் அப்பால் க்யரோஸ்டமிக்கும் நிகழ்ந்தது.

இருவரையும் திரைப்படம் சார்ந்து கொண்டாடினோமே அல்லாமல் இருவரையும் அவர்கள் கவிஞர்கள் கவிமுகமும் இவர்களுக்கு வாய்த்திருக்கிறது என நாம் அறிந்தோமில்லை. 

அப்பாஸ் க்யரோஸ்தமியின் பாயக்காத்திருக்கும் ஓநாயையும் சந்தியா பதிப்பகம் பதிப்பித்த சீனுராமசாமியின் முதல்ருசியையும் அருகருகே வாசித்த பொழுது ஈரான் டெக்ரானின் அப்பாசும் தமிழ்நாட்டின் சீனுராமசாமியும் பல இடங்களில் ஒன்றுபடுகின்றனர்.

நிலத்தை குளத்தை மலரை பறவைகளை மூத்த உயிர்களை தனிமையை தங்களின் நிழலை காதலின் இழப்பை என இருவரும் தங்கள் படைப்பின் வழியாக ஒருபுள்ளியில் சந்தித்து நம்மை ஆச்சரியப்படுத்துகின்றனர்.அப்பாஸ் க்யரோஸ்டமி எல்லா இருளும் விடியும் என்பதில் நம்பிக்கை கொண்டிருக்கிறார்.

சீனுராமசாமி தனது முதல்ருசி தொகுப்பின் முன்னுரையில் சொன்னது போல இருவருமே காட்சி வழியாக கவிதையை விரித்துச் செல்கின்றனர்.இவர்களின் திரைப்படங்களின் காட்சிகளில் கவிதை முடிவடைகிறது; கவிதைகளில் காட்சி விரிகிறது என்பதனை இருவரின் தொகுப்புகளையும் அடுத்தடுத்து வாசிக்கையில் உணர முடிகின்றது.

'எனது இதயத்தை

தனியாகப் புதையுங்கள்

எளிதில் உடையக்கூடியது அது'

என அப்பாஸ் காதலின் இழப்பை அன்பின்மையின் வலியை சொல்கிற அதே உணர்வுப் புள்ளியில் சீனுராமசாமி இவ்விதம் ஒன்றுபடுகிறார்

'சுமையின்றி இருக்க நேர்வது

இருப்பதிலேயே பெருஞ்சுமை

மரித்தாலும்

புதைத்த இடத்தில்

கனமான கல்லை தூக்கிவைப்பீர்

அன்புக்காக பெரும்பகுதி சுமந்தலைந்த இவ்வுயிருக்கு'

இருவரின் நிழல் குறித்த பார்வை அச்சொட்டாக அப்படியே இருப்பது கவித்துவத்தின் எதிர்பாராத நிகழ்வு போலும்.

'எதற்காகவோ

என் பின்னால் வந்துகொண்டே இருக்கிறான்

அவனுக்கு என்ன தேவையென்று

எனக்குத் தெரியவில்லை

கோபத்தில் அவனுக்கு

என்னைவிட கைகள் நீளமாக இருக்கின்றன

நான் நின்றால் நிற்கிறான்

படுத்தால் படுக்கிறான்

ஓடினால் விரட்டுகிறான்

மிகவும் துயரமாக இருக்கிறது

அவனை

என் நிழல் என்கிறார்கள்

அதுதான் அச்சமாக இருக்கிறது'

-சீனுராமசாமி

'என்னைப் பின்தொடர்ந்து வருகிறது

ஒரு நிழல்

அது குழந்தைப் பருவத்தில்

எனது விளையாட்டுத் தோழனாக இருந்தது

அது என்னோடு இணைந்து வளர்ந்தது

அது என்னோடு சேர்ந்து முதிர்கிறது

அது என்னைத் தொடர்ந்து

எனது கல்லறைக்கும் வரும்'

-அப்பாஸ் க்யரக்யரோஸ்தமி

தேவாவின் rhythmicity எனும் புதியசுவை

 

தேவா சென்னை மயிலாப்பூர் விசாலாட்சி தோட்டம் எனும் எளிய நடுத்தரமக்கள் வாழும் பகுதியில் பிறந்து  வளர்ந்தவர்; வாழ்ந்தவர்.வேலூர் மாவட்டம் ஆற்காடு அருகேயான  மாங்காடு கிராமத்தை முன்னோர் ஊராகக் கொண்ட தேவாவின் முழுப்பெயர் சொக்கலிங்கம் தேவநாதன்.

தொடக்ககாலத்தில் இசை சி.தேவா என்ற டைட்டில் கார்ட் உடன் அறிமுகம் ஆன  தேவா அடுத்த மூன்றாடுகளுக்குள் குறிப்பாக 'வைகாசி பொறந்தாச்சு' படம் வந்தது ஒட்டி யார் இந்த தேவா என தேடப்பட்டார்.
"சின்னப் பொண்ணுதான் வெக்கப்படுது  அம்மா அம்மாடி" எனும் எஸ்.பி.பாலசுப்ரமணியம் பாடிய இந்தப் பாடல்  92 களில் மஞ்சள் நீராட்டு வீடு,கல்யாண வீடெல்லாம் ஒலிக்கப்பட்ட பாடலாக இருந்தது.

மென்னுணர்வும் கவித்துவ காதல் மனமும் கொண்ட இளைர்களுக்கானப் பாடலாக
"கொஞ்சநாள் பொறு தலைவா-ஒரு
வஞ்சிக்கொடி இங்க வருவா" என ஆசை படத்திற்கானப் பாடலாக இடம் பெற்றப் பாடலை காலர் டியுனாக பண்பிசை எனும் FM பாடலாக கேட்காதவர்களே இருக்க இயலாது எனும் அளவிற்கு இந்தப்பாடலை தேவா உருவாக்கினார்.

1989 ல் 'மாட்டுக்கார மன்னாரு' சந்திரசேகர்,அருந்ததி நடித்த படத்தின் வழி திரையுலகில் காலடி வைத்த ஓவியர் சென்னை தொலைக்காட்சியில் 'வயலும் வாழ்வும்' நிகழ்ச்சி வழி அரசு ஊழியராக பணியைத் தொடங்கிய தேவா அடுத்த ஆறாண்டுக்குள் தன் இசைக்கும் தனது மெட்டிற்கும் சுயம் உண்டென நிரூபித்தப் படம்தான் வசந்த் இயக்கி அஜித்,சுவலட்சுமி நடித்த ஆசை திரைப்படம்.

சூப்பர் ஸ்டார் ரஜினி சொன்னது போல தேவாவின் திரையுலப் பயணம்,  ஒரு பக்கம் இசைஞானி இளையராஜா மறுபக்கம் இசைப்புயல் ஏ.ஆர்.ரஹ்மான் கொடிகட்டிப் பறந்த காலத்தில் தேவாவின் வருகை அவர் போட்ட மெட்டு பிஜிஎம் எனப்படும் பின்னணி இசை இதன் பாதிப்பு அதன் அவரின் காப்பி நகல் என தேவா கிண்டல் செய்யப்பட்டார்.

யோசித்தார் தேவா ; தான் சிறு வயதில் தன் நண்பர்கள் அந்தோணி,அல்போன்ஸ் வழியாக பட்டினப்பாக்கம் குப்பத்துக் கடற்கரையில் பயின்ற கானாவை "கவலைப்படாதே சகோதரா
எங்கம்மா கருமாரி காத்து நிப்பா கவலைப்படாதே சகோதரா" என கானாவை கையில் எடுத்தார்.கானாவின் வேகம் விறுவிறுப்பு எளிய சொல் எடுத்து கானாவை மட்டுமல்ல, 1996 க்குப் பிறகான காதல்கோட்டைக்குப் பிறகான காலத்தில் தனது  பாடல்களின்  rhythmicity ஐ கணகணவென வேகப்படுத்தினார்.புதிய தேடலை புதிய சுவையை இணைத்துக் கொடுத்தார்.

இதன் மாறுபட்ட சுவையை வேகத்தை,  "நான் ஆட்டோக்காரன் ஆட்டோக்காரன்" பாடலில் "வந்தேன்டா பால்காரன் அடடா பசுமாட்டப் பத்திப் பாடப்போறேன்" பாடலில் உணரலாம்; உணர்ந்திருக்கிறோம்.

பாஷா படம் வந்து முப்பது ஆண்டுகள் ஆனபின்னும் ஆட்டோ தொழிலாளர்களின் ஆயுதபூஜை என்றால் "நான் ஆட்டோக்காரன் ஆட்டோக்காரன்" பாடல் ஒலிக்காத ஊர் உண்டா? ஆட்டோ ஷெட் உண்டா? எனுமளவிற்கு தேவாவும் அவரின் இசையும் பிரபலமானது.

ரஜினி கமலுக்குப் பிறகான தமிழ் சினிமாவில் 1990 களில் புதிய இளங் கதாநாயகர்கள் நடிக்க வருகிறார்கள்.அஜித்,விஜய்,பிரசாந்த்,சூர்யா என வருகிறார்கள்.
காவேரி,ஜோதிகா,சிம்ரன்,சுவலட்சுமி,தேவயானி என புதிய நாயகிகள் வருகிறார்கள்.
ராதாபாரதி,எஸ்.ஜே.சூர்யா,வசந்த்,அகத்தியன்,சேரன்,சரவண சுப்பையா என புதிய இயக்குநர்களும் இயக்கத் தொடங்குகிறார்கள்.

கே.பிரபாகரன்,ஏ.எம்.ரத்தினம்,சிவசக்தி பாண்டியன்,எஸ்.எஸ்.சக்ரவர்த்தி,சேரன்,ஹென்றி என புதிய தயாரிப்பாளர்களும் படமெடுக்கத் தொடங்குகிறார்கள்.
இந்த புதிய காலத்தின் புதிய நாயகர்களின் நாயகிகளின் இயக்குநர்கள், தயாரிப்பாளர்களின் சிறு முதலீட்டுப்படங்களுக்கு ஏற்றவராக தேவாவை ஏற்றுக் கொள்கிறார்கள்.

இந்த புதிய அலை இந்த புதிய அணி வர்த்தகரீதியாகவும் கருத்து ரீதியாகவும் பல திரைப்படங்களை கொடுக்கிறது.
இந்தக் காலத்தில் அனைவருக்கும் ஏற்றதான உறுதுணையாக தேவாவின் தேனிசை அமைந்து விட்டது.

1950 நவம்பர் 20 ல் பிறந்த தேவா 2026 அக்டோபர் 17 காலை இயற்கை அடைந்தார்.

தமிழ்த்திரைப்பட உலகிற்கு தேவா அளித்த பங்களிப்பை நினைவில் கொண்டு தமிழ்நாடு முதலமைச்சர் மாண்புமிகு ஜோசப் விஜய் தலைமையிலான தமிழ்நாடு அரசாங்கம் தேனிசைத்தென்றல் தேவாவிற்கு அரசு மரியாதை அளித்து சிறப்பு சேர்த்திருக்கிறது.

தமிழ்நாடு முற்போக்கு எழுத்தாளர் கலைஞர்கள் சங்கம் அதன் மதிப்புறு தலைவர் ரோகிணி தலைமையில் கருப்பு அன்பரசன்,மயிலைபாலு,பாரதிசெல்வா,ரேவதிமுகில், வா.அசோக்,நா.பாலகிருஷ் தன்,கா.சரத்குமார்,செங்கை தங்கராஜ் உட்பட தமுஎகச வின் தலைவர்கள் சென்னை மாவட்ட நிர்வாகிகள் தேவாவின் சென்னை திநகர் தர்மாபுரம் இல்லம் சென்று அஞ்சலி தெரிவித்திருக்கிறார்கள்.

சிங்கீதம் நினைவுகள்

 

1972 ல் வெளிவந்த ராஜாஜியின் திக்கற்றப் பார்வதி நாவலை ஒட்டி சிங்கீதம் சீனிவாசராவ் எடுத்த திக்கற்றப் பார்வதி திரைப்படத்தின் சுவரொட்டிகளை என் பால்ய வயதில் ஆரல்வாய்மொழி சுவர்களில் பார்த்திருக்கிறேன்.

அந்த ஒரு படம் தவிர தமிழில் சிங்கிதம் எடுத்த அநேகப்படங்களை திரையரங்குகளில் பார்த்திருக்கிறேன்.

2016 ஆம் ஆண்டில் நிறுவப்பட்ட  தமிழக மக்கள் ஒற்றுமை மேடையில் பல்வேறு ஆளுமைகளை கொண்டு வருவதற்கான தொடக்க முயற்சிகளில் நானும் அதன் கன்வீனர்களுள் ஒருவர் தோழர் க.உதயகுமாரும் ஈடுபட்டுக் கொண்டிருந்தோம்.

இந்த மேடையின் புரவலர்களுள் ஒருவராக ரோகிணி அவர்களை இணைக்கும் பொருட்டு அவரை சந்திப்பதற்காக வந்து கொண்டிருக்கிறோம் என்றேன்.

வாருங்கள் தோழர் என ஒரு முகவரியை அனுப்பி வைத்தார். அந்த முகவரியின் வீட்டிற்குச் சென்றோம்.
அது பிரபல இந்திய திரைப்பட ஆளுமைகளுள் ஒருவரான சிங்கீதம் சீனிவாசராவ் அவர்களின் இல்லம்.

அந்நேரம் என் மனதிற்குள் சிங்கீதம் இயக்கிய படங்கள் ஒவ்வொன்றாக மனதில் வட்டமிட்டது. அவைகள் பற்றி சிங்கிதம் அவர்களிடம் பேசிக் கொண்டிருந்தோம்.மகிழ்ந்தார் பிரியத்திற்குரிய சிங்கீதம் அவர்கள்.

வந்த பணிகளை சொன்னோம்.புதிதாக உதயமாக இருக்கும் தமிழக மக்கள் ஒற்றுமை மேடைக்கு வாழ்த்துகளைச் சொன்னார்.

தோழர் ரோகிணி அவர்கள் மேடையின் பொறுப்புகளில் எந்த அளவு பயணிக்க இயலும் என தன் அய்யத்தை தெரிவித்தார்.தேவையான முன்னெடுப்பு தன் பெயரை இணைத்துக் கொள்ளலாம் என ஒப்புதல் தெரிவித்தார்.

இந்த பணியின் ஊடாக இயக்குநர் சிங்கீதம் சீனிவாசராவ் அவர்களை சந்திப்பதற்கான வாய்ப்பை உருவாக்கித் தந்தார் ரோகிணி அவர்கள்.

சிங்கீதம் மறைந்த இந்த நாளில் இந்த நினைவுகள் மேலெழுகின்றன.
தான் இயக்கிய திரைப்படங்கள் வழியாக மதிப்புமிகு இயக்குநர் சிங்கீதம் சீனிவாசராவ் நம்மோடு என்றும் வாழ்ந்து கொண்டே இருப்பார்.
ஆழ்ந்த அஞ்சலிகள் சிங்கீதம் அய்யா.
படம் உதவி : ரோகிணி

மதராசப்பட்டினம்- மெட்ராஸ்- சென்னை காலங்களும் பார்வையும்

 

படம்: பாரிமுனை- மெட்ராஸ்

மதராசபட்டினம் ,மெட்ராஸ்,சென்னை என்ற பெயர்கள் வெவ்வேறு காலக்கட்டம் வெவ்வேறு ஆட்சிகள் இருந்த காலத்தின் பெயர்கள். நில உடைமை பொருளாதாரம் முறையும் கிராமங்களுமாக இருந்த காலம் மதராசபட்டினம். கிராமங்கள் நகராட்சியாக இணைக்கப்பட்ட முதலாளித்துவ பொருளாதாரத்தின் காலம் மெட்ராஸ். நகராட்சி மாநகராட்சி பெரு மாநகராட்சியாக வளர்ந்த காலத்தில் அடையாளம் நவீன கார்ப்பரேட் காலத்தின் அடையாளம் சென்னை.

பிரிட்டிஷார் வருவதற்கு முன்பே மதராசபட்டினம் உலகின் பல திசைகளிலும் இருந்து வணிகர்கள் வந்து தொழில் நடத்திய இடமாக இருந்தது . போர்த்துகீஸ் தெரு, அர்மீனியன் தெரு போன்றவை இதன் அடையாளம்.

மதராசபட்டினம் என்ற இயற்கை துறைமுகத்தின் வழியாக உலகத்தின் பல நாடுகளுக்கும் இங்கே இருந்து துணிமணிகள்,ஏலம்,கிராம்பு,சோம்பு போன்ற வாசனைப் பொருட்கள், மிளகு போன்றவை ஏற்றுமதி ஆகி இருக்கின்றன.மதராசப்பட்டினத்தின் பழைய துறைமுகம் பட்டினப்பாக்கம்.

சென்னையில் போர்த்துகீசிய மொழி நெதர்லாந்தின் டச் மொழி பிரஞ்சு மொழி பிரிட்டிஷின் ஆங்கில மொழி என்று பல மொழிகளும் கலந்து பதினான்காம் நூற்றாண்டு காலத்திலேயே multi linguistic நிலமாக மதராசப்பட்டினம் மெட்ராஸ் இருந்திருக்கிறது.

சென்னையில் தெலுங்கு பேசும் மக்கள், கன்னடம் பேசும் மக்கள், மலையாளம் பேசும் மக்கள் ,இந்தி பேசும் மக்கள் என பல மொழிகள் பல மக்கள் இணைந்து  கலந்து வாழ்ந்த இடமாக நிலமாக மெட்ராஸ் அன்றும் இருந்தது; சென்னை இன்றும் இருக்கிறது .

Ethnic Diversity என்கிற பன்மைத்துவம் யார் மீதும் எவர் மீதும் வெறுப்பு காட்டாத ஒர் அன்பு ஒரு தோழமை ஒரு நேசம் காலம் காலமாக சென்னை நிலத்தில் இருந்து கொண்டே இருக்கிறது.

ஆள்வோர்கள் தொழில்முதலாளிகள் பிரித்தாளும் சூழ்ச்சியை கையாண்டாலும் கூட அதையெல்லாம் சென்னை நிலத்தில் வாழ்ந்த மக்கள்  பொருட்டாகவே எடுத்துக் கொண்டது இல்லை.

(படம்: கொத்தவால்சாவடி மார்க்கெட்)

பெருநகரமாக மாறிய சென்னை , கார்ப்பரேட் பொருளாதாரக்காலத்தில் வந்தேறிகள் என்றும் பூர்வ குடிகள் என்றும் இங்கே பிரித்தாளும் வாதம் முன்வைக்கப்படுகிறது.

இந்தப் பார்வையும்  கண்ணோட்டமும் பொருளற்றவை. தொழிலாளி வர்க்க கண்ணோட்டம் இல்லாத ஆள்வோருக்கு சாதகமான என் ஜி ஓக்கள் குரலாக இருக்கிறது.

பெருநகரத்தின் பொருள் உற்பத்திக்கும் வளர்ச்சிக்கும் தடைகளாகவே  பூர்வகுடி,வந்தேறி பார்வை இருக்கின்றது.

சென்னை நிலத்தில் வாழ்கிற அனைத்து மக்களுக்கும் அனைத்து வசதிகளும் கிடைக்க வேண்டும் என்கிற எண்ணமும் அதை நோக்கி செயல்களும் தான் பொருத்தமான செயல் உத்தியாக இருக்க முடியும்.

ஆப்பிரிக்க நிலத்தின் தோன்றிய ஆதி வேர்களாக நாம் இருப்பது உறுதிப்பட்ட காலத்தில் இத்தகைய வேறுபட்ட பிரித்தாளும் பார்வை பொருளற்றது.

அனைவருக்குமான பெருநகராக சென்னையை உருவாக்குவதே 387 வது சென்னை தினத்தின் அறைகூவலாக இருக்கட்டும்.

வெறுப்பின் கொற்றம் வீழ்க!
அன்பே அறமென எழுக!!

பாட்டாளி வர்க்கத்தின் பரணிநாயகன்

 

சங்கரப்பன் ஆறுமுகப்பெருமாள் என்ற தோழர் எஸ்ஏ.பி (84)  பற்றிய கனமான நூல் ஒன்றை எஸ்.ஏ.பி யின் சகதோழரும் மைத்துனருமான தோழர் எம்.ஜே.பிரபாகர் 530 பக்கத்தில் தொகுத்து கொண்டு வந்திருக்கிறார். 

எஸ்.ஏ.பி உடன் இயக்கப் பணியாற்றிய அவரால் கண்டெடுக்கப்பட்ட தலைவர்கள்- தோழர்கள்- எழுத்தாளர்கள்- பேராசிரியர்கள் என 143 தோழமைகளின் அனுபவங்களின் தொகுப்பாக வந்திருக்கிறது மார்க்சிய ஆசான் தோழர் SAP. ரெட்ஸ்டார் பப்ளிகேசன்ஸ் நூலை பிரம்மாதமாக  600₹ விலையில் உருவாக்கி இருக்கிறது. 

இதன் வெளியீட்டு விழா மதுரையில்  மார்க்சிஸ்ட் கம்யூனிஸ்ட் கட்சியின் பொதுச்செயலாளர் தோழர் எம்.ஏ.பேபி பங்கேற்பில் நடைபெற்றிருக்கிறது.

இந்த கனமான தொகுப்பில் எஸ்.ஏ.பி பற்றிய எனது எண்ணங்கள் பாட்டாளி வர்க்கத்தின் பரணிநாயகன் எனும் தலைப்பில் வெளியாகி இருக்கிறது. இந்தக் கட்டுரையை உங்கள் வாசிப்பிற்கு இங்கே இணைத்திருக்கிறேன்.

::::::::::::::::::     ::::::::::::::::::     ::::::::::::::::::     :::::::::::::::

பாட்டாளிவர்க்கத்தின் பரணிநாயகன்::
- இரா.தெ.முத்து

1987 விருதுநகரில் இந்திய ஜனநாயக வாலிபர் சங்கத்தின் மாநில மாநாடு நடைபெற்றது. சென்னை மாவட்டத்தின் பிரதிநிதிகளுள் ஒருவராக நான் பங்கேற்றேன்.

மாநாட்டில் என்னை ஈர்த்த தலைவர்கள் தோழர்கள் எம்.ஏ.பேபி மற்றும் எஸ்.ஏ.பெருமாள். தோழர் எம்.ஏ.பேபி அன்று இந்திய ஜனநாயக வாலிபர் சங்கத்தின் அகில இந்தியத் தலைவர்.

இராமநாதபுரம் மாவட்டம் என்றாலே மழை பெய்யா பிரதேசம் என அன்று பெயர் பெற்றிருந்தது. தலைநகர் விருதுநகரில் தண்ணீருக்குத் தட்டுப்பாடு. பிரதிநிதிகள் குளிப்பதற்கு நந்நவனம் என்பதான தோட்டங்களில் ஏற்பாடு செய்திருந்தார்கள்.

எங்களில் ஒருவராக தோட்டத்தில் வரிசையில் நின்று  தோழர்களை புன்னகை உடன் பார்த்துக் கொண்டு தண்ணீர் எடுத்துக் குளித்துக் கொண்டிருந்தார் தோழர் எம்.ஏ.பேபி அவர்கள்.

இந்தக் காட்சி என் மனதில் தங்கி விட்டது.சங்கத்தின் அகில இந்தியத் தலைவர் அனைவரோடும் ஒருவராக இருப்பதான எளிமையும் புன்னகையும் அவர்பால் என்னை ஈர்த்துக் கொண்டது.

இந்திய ஜனநாயக வாலிபர் சங்கத்தின் விருதுநகர் மாநில மாநாட்டில்தான் நான் தோழர் எஸ்.ஏ.பி எனும் ஆளுமையைப் பார்க்கிறேன். அவர் மேடையில் மாநாட்டுப் பணிகளை கவனித்துக் கொண்டிருக்க அரங்கிலிருந்த நான் அவரது பரபரப்பை வேகத்தைக் கவனித்துக் கொண்டிருந்தேன். தோழர் எஸ்.ஏ.பியின் பரபரப்பு வேகம் மட்டுமே நான் கவனிக்கத் தகுந்த காரணங்களாக இல்லை.

எஸ்.ஏ.பி பற்றியான செய்தி எப்படியோ என் அறிவுக்குள் நுழைந்து கொண்டது. அநேகமாக நான் 82 முதல் 84 செப்டம்பர் வரை கன்னியாகுமரி மாவட்டம் ஆரல்வாய்மொழியில் இயக்கப்பணி நிகழ்த்திக் கொண்டிருந்த காலங்களில் தோழர்கள் வழியாக அறிந்திருப்பேன்.

அந்த அறிதல் எஸ்.ஏ.பி ஐ ஒரு புரட்சிக்காரனாக சரித்திரநாயகனாக நான் புரிந்து கொண்டிருந்த அந்தப் புரிதலின் முதல்விதை, 87 ல் டி.ஒய்.எப்.ஐ மாநில மாநாட்டில் எஸ்.ஏ.பி இவர்தான் என பார்த்த அந்த நொடியில் என் புரிதலின் முதல் விதை துளிர்த்துக் கொண்டது.

70,80 களில் இராமநாதபுரம், விருதுநகர்,சிவகாசி போன்ற இடங்களில் நிலவுடைமையாளர்களும் தொழில் அதிபர்களும் திராவிட இயக்கங்களின் தலைவர்களாக பரிணமிக்கிறார்கள். பாட்டாளிவர்க்கத்தின் வாழ்வாதாரக் கோரிக்கைகள் இந்த மாவட்டத்தில் எழுப்பப்படுகிற பொழுது , இது ஆண்டான்களை எதிர்த்த அடிமைகளின் குரலாக திராவிட இயக்கத்தின் பணக்காரர்களால் புரிந்து கொள்கிற பொழுது அங்கே புரட்சி சூல் கொள்கிறது.

பேச்சுவார்த்தை உடன்பாடு கூலி உயர்வு போன்ற சட்டரீதியான அகிம்சைமுறைகள் செல்லுபடி ஆகாதபொழுது அடி திருப்பி அடி என்ற போர்முறைதான் பயன்தருகிறது. பாட்டாளிவர்க்கத்தை இம்மாவட்டங்களில் பாதுகாத்திட இந்த அடிமுறைதான் பயன்பட்டது.எளியவர்களின் பார்வைக்கு தோழர் எஸ்.ஏ.பி ஒரு நாயகனாக தென்பட்டார்.

படிக்கிற இளவயதில் பேராசான் ஜீவாவின் ஆவேசமான இலக்கிய ரீதியிலான போர்முரச உரை தோழர் எஸ்.ஏ.பி யை கவர்ந்து கொண்டு
அவரை கம்யூனிஸ்ட் கட்சி உறுப்பினர் ஊழியராக்கியது.ஊழியரை தலைவராக நாயகனாக மாற்றியதன் பங்கை தோழர் வி.பி.சிந்தன் எடுத்துக் கொள்கிறார். தோழர் வி.பி.சிந்தன் எனும் போராளி வழியாக தன்னை ஒரு போராளியாக வடிவமைக்கிறார் தோழர் எஸ்.ஏ.பி எனும் எஸ்.ஏ.பெருமாள்.

தோழர் எஸ்.ஏ.பி அடிப்படையில் அவர் ஓர் இலக்கியவாதி.இயக்கத்தின் தேவை அவரை களப்போராளியாக வடிவமைத்துக் கொண்டது. ஆனாலும் தேடித் தேடி சோவியத் இலக்கியங்களை வாசித்தார்.தனது வாசிப்பு ரசனையை இளந்தோழர்களுக்கு தாய்ப்பறவையென பகிர்ந்தளித்து வளர்த்தெடுத்தார். தோழர் எஸ்.ஏ.பியின் ரசனையில் பகிர்தலில் மக்ஸீம் கார்க்கியைக் கண்டவர்கள் மேலாண்மைபொன்னுச்சாமி ஆனார்கள்.தஸ்தாவெஸ்கியைக் கண்டவர்கள் எஸ். ராமகிருஷ்ணன் எனும் எஸ்.ரா, கோணங்கி,மணிமாறன் ஆனார்கள்.

தோழர் எஸ். ஏ.பி எனும் களப்போராளியைக் கண்டவர்கள் எம்.என்.எஸ்.வெங்கட்ராமன், கருமலையான், எஸ்.கண்ணன்,சாமுவேல்ராஸ், சுகந்தி,ராம்கி எனும் என்.ராமகிருஷ்ணன், எனும் வர்க்கப்போராளிகளாக பரிணமித்தார்கள்.

எஸ். ஏ.பி யிடம் இலக்கியத்தையும் உரைவீச்சையும் கண்டவர்கள் முகவைபாலாஜி எனும் பாரதிகிருஷ்ணகுமார் ஆனார்கள்.சூர்யாசேவியர் ஆனார்கள்.

நான் எஸ் .ஏ.பி இடம் லெனின் அமைச்சரவையில் கல்வி பண்பாட்டு அமைச்சராக இருந்த லூனாசார்ஸ்கியைக் கூடுதலாகக் காண்கிறேன்.அதோடு நாட்டார்மரபின் கி.ராஜநாராயணனையும் இணைத்துக் காண்கிறேன்.

தோழர் எஸ்.ஏ.பி உடன் நான் தமிழ்நாடு முற்போக்கு எழுத்தாளர் கலைஞர்கள் சங்கத்தில் முப்பதாண்டுகள் மாநிலச் செயற்குழு உறுப்பினராக பயணித்திருக்கிறேன்.தோழர்களின் தோள்களில் கை போட்டு அறிந்த விடயங்களை புன்னகை உடனும் பகிர்ந்த விடயங்களை தோழர்கள் கேட்பதை உறுதி செய்யும் பொருட்டு கண்டுணர அவர் பயன்படுத்தும் "ம்" எனும் இடையீட்டுச் சொல்(particles) சொல்லுடனும் பயணித்துக் கொண்டிருக்கிறோம்.

திரைக்கலைஞர் ரோகிணியும் விமர்சன அணுகுமுறையும்

திரைக்கலைஞர் ரோகிணி அவர்கள் தென்னிந்தியா அறிந்த ஒரு திரைக்கலைஞர்;நாடகக்கலைஞர்; திரைப்பட இயக்குநர்; கவிஞர்; பின்னணிக்குரல் கலைஞர்; களச்செயற்பாட்டாளர் இதனைத் தாண்டி இன்னொரு முகமும் ரோகிணிக்கு இருக்கிறது. அதனை இந்த வீடியோவைப் பார்க்கையில் அறிவீர்கள். 

இரா.தெ.முத்து எழுதிய பேசாப் பொருளைப் பேசிய பாரதி நூல் வெளியீடு ஜனவரி 7 , சென்னைப் புத்தகக் கண்காட்சி சிற்றரங்கில் நடைபெற்றது. அதில் பங்கேற்று பேசினார் ரோகிணி.

புத்தகத்தை முழுவதுமாக அவர் படித்த விதம் அவரது பேச்சில் வெளிப்பட்டது. புத்தகத்தின் பேசு பொருளை உள்வாங்கி , புதிய வாசகர்களை நோக்கி புத்தகத்தை கொண்டு செல்லும் தேவையை அவர் நிறைவேற்றுகிறார்.புத்தகத்தின் பேசு பொருளை ,enrich செய்யும் முறைமையில் ஆய்வு நோக்கில் சில புதிய கருத்துகளை முன் வைத்து, புத்தகத்தின் ஆய்வை அடர்த்தியாக மாற்றிக் காட்டுகிறார்.

இந்த approach இந்த அணுகுமுறையே சமகாலத்திய தமிழ் இலக்கிய விமர்சன கோட்பாட்டு முறைக்குத் தேவை.

இதோடு படைப்பாளி குறித்த தனது தோழமை கொண்ட பார்வையை முன் வைக்கிறார்.

பத்து நிமிட உரையை ரோகிணி உரையைக் கேளுங்கள்.ஒரு புத்தகத்தை எவ்விதம் அணுக வேண்டும் என்கிற ஒரு பார்வை கிடைக்கும்.

நன்றி தோழர் ரோகிணி.நன்றி பாரதி புத்தகாலயம். நன்றி BHARATHI TV

வெற்றிமாறனின் வடசென்னை

துரோகத்திற்கும் விசுவாசத்திற்குமான போட்டா போட்டியாக புரிதலை உருவாக்குகிறது வடசென்னை.

 பத்மாவிற்காக செய்த அசால்ட் தாக்குதல் , ஜாவா பழனியின் சாவில் முடிய ,சொந்தத் தம்பி சங்கர் பேரில் வழக்கு வாங்கி ,உயிரைக் காத்த காசிமேடு குணாவிற்காக ,சென்னை மத்தியச் , சிறை போய் ராயபுரம் செந்திலை போட்டுத் தள்ள ,முயற்சி எடுக்கும் , நாகூரான்தோட்டம் கேரம்போர்ட் அன்பு ,தன் சொந்த அனுபவத்தில் யார் நல்லவர்? யார் கெட்டவர் ?எனப் புரிந்து கொள்கிறான். 

 பால்யத்தில் தன் மனம் கவர்ந்த காசிமேடு ராஜன் கொலைக்காக ,ராஜனின் காதல்மனைவி சந்திரா கேட்டுக் கொண்டதன் பேரில் ,ராஜனைக் கொலை செய்த குணா,செந்தில்,வேலு,ஜாவா பழனியை ஒவ்வொருவராக போட்டுத் தள்ள, பொருள் எடுத்து ,ராஜன் மீதான விசுவாசத்திற்காக துரோகத்தைப் பழி வாங்கும் அன்புவின் கதை , வெற்றிமாறனின் வடசென்னை .

 நேர்கோட்டுப் பாதையில் கதை போகாமல் ,ஏதாவது ஒரு புள்ளியிலிருந்து கதையைத் தொடங்கி , க்ளைமேக்ஸ் நோக்கிப் போகும் , நான் லீனியர் கதையாக ,வடசென்னையின் கதையமைப்பு உருவாக்கப்பட்டிருக்கிறது .ஆகவே கதை என்ன என முதல் முறைப் புரிந்து கொள்வதில் சிரமம் ஏற்படுகிறது .இரண்டு ,மூன்று முறை படத்தைப் பார்க்கப் பார்க்க கதையின் முடிச்சு அவிழ்ந்து கொள்கிறது. 

 ஆசைப்படும் வாழ்வு ஒன்றாகவும் எதிர்படும் வாழ்வு இன்னொன்றாகவும் இருந்து மாயக் கலைடாஸ்கோப் ஆட்டத்தை வாழ்வு ஆடுவதை ,உணர்த்தும் வடிவாக ,நான் லீனியர் உத்தி வெற்றிமாறனிற்கு பயன்பட்டிருக்கிறது. 1983 லிருந்து 2004 வரைக்குமான முப்பதாண்டு காலம் , படத்தில் காட்சியாக்கப்பட்டிருக்கின்றன . இந்தக் காலத்தில் சென்னை கடற்கரையை முன் வைத்து ,மாநில அரசுகள் என்ன ஆட்டம் ஆடியதோ அவைகள் உணர்த்தப்பட்டிருக்கின்றன .அந்தந்த அரசுகளின் ஆளும் கட்சிகளின் பிரதிநிதிகள் ,தத்தம் செல்வாக்கை பவர்குப்பம் ,காசிமேடு,ராயபுரம்,நடுக்குப்பம் பகுதிகளில் நிலைநிறுத்த எடுத்த முயற்சிகள் , அவைகளை அந்த மக்கள் எதிர் கொண்ட முறைகள் , படத்தில் தெளிவாகச் சொல்லப்பட்டிருக்கின்றன

ராதாரவி வரும் காட்சிகளில் , வசனங்களில் அவர் , இந்தக் கட்சி என தெளிவாகிறது; ஒரு காட்சியில் அவர் வீட்டின் முகப்பில் பறந்து கொண்டிருக்கும் கொடி வழியாகவும் வெற்றிமாறன் அந்தக் கட்சியை துலக்கப்படுத்தி இருக்கின்றார்

ராஜனை முன் வைத்து கதை நாற்சதுரங்க காயாட்டம் ஆடுவதால் ,ராஜனின் தம்பிகள் ,கூட்டாளிகள் ,பயன்படுத்திக் கொள்ளும் ஆளும் கட்சிகள் ,வணிகர்கள் ,இடைத்தரகர்கள் என்று நாம் அறியாத அல்லது அறிந்தும் அறியாத ,இந்த உலகம் காமிரா முன் வருவதால் ,இதுதான் வடசென்னையா என கேள்விகள் எழுகின்றன .இதுவும் வடசென்னைதான் என நாம் ஏற்றுக் கொள்ளத்தான் வேண்டும். 

 எதார்த்தத்தை பார்த்தவர்கள் என்பதால் , எமக்கு இதுவென்றும் புதிதாக இல்லை .இருந்ததை காட்சிப்படுத்தியிருக்கிறார்கள் .அந்தக் காலத்தில் படத்தில் வருகிறவர்கள் போல சிலர் இருந்தனர் என்பதை நாம் அறிவோம். ராஜன் கொல்லப்படும் ஹோட்டல் காட்சி வருகிறதே ;அது தண்டயார்பேட்டையிலிருந்த ,இன்று லாட்ஜாக மாறியிருக்கின்ற ஹோட்டல் அம்பாஸடர் என்று பலருக்குத் தெரியும் .

ராயபுரம்,காசிமேடு,பள்ளம்,பவர்குப்பம்,நாகூரான் தோட்டம்,பூண்டி தங்கம்மாள் தெரு ,ஜீவாநகர் ,சென்ட்ரல் ஜெயில்,கடல் என்று வடசென்னையின் பல பகுதிகள் படத்தினுள் வருகின்றன . மக்கள் படத்தினுள் வருகின்றனர் .அன்பு அந்த மக்கள் கூட்டத்தின் ஒரு பிரதிநிதி .

பத்மா ,பத்மாவின் குடும்பம் ,குறி சொல்லும் பெண் என படம் அவர்களை உள்வாங்கியிருக்கின்றது. குணா,செந்தில்,வேலு,பழனி,சிவா என யாருமே சூழலின் கைதிகளாகவே இருக்கின்றனர் .இவர்கள் வழியாக அரசியலை , தொழிலை செய்வோர்களின் வெட்டுக்காய்களாக , தாம் இருப்பதை உணர்கின்ற்னர் .பிள்ளைகள் பெரியவர்களாகி வருகின்றனர் என்ற கவலை அவர்களை வறுத்தெடுக்கிறது .இந்தத் தொழிலை கைவிட்டு விடலாம் என்றும் ஆசைப்படுகின்றனர் .இவர்கள் மீது நாம் பரிதாபம்தான் கொள்ள வேண்டும் .நமது கோபம் இவர்கள் வழியாக அரசியல் செய்கின்றவர்கள் மீது உருவாக வேண்டும் . 

 பாத்திரங்கள் ஒவ்வொன்றும் அதனதன் போக்கில் இயல்பாக இயங்குகின்றன.குறி சொல்கின்ற சாமியாடிப் பெண் அப்படியே மனதில் தங்கி விடுகின்றார். சந்திராவின் காதலும் அன்பும் உட்பூத்திருக்கும் கோபமும் கொலையுண்ட ராஜனுக்கு அஞ்சலி செலுத்த போகும் வழியில் கால் இடறி விழும் துக்கமும் அற்புதமான பாத்திரமாக சந்திரா அமைக்கப்பட்டிருக்கின்றது. 

 பத்மாக்கள் அப்படித்தான் அந்தப் பகுதியில் இருந்தார்கள்;காதலித்தார்கள் ;பேசினார்கள் .அடுத்த வீட்டில் டிவி பார்க்கப் போய் முத்தம் கொடுப்பது முத்தம் வாங்குவது ,ஒலியும் ஒளியும் காலத்திலிருந்து தொடரும் அடையாளங்கள் . பத்மாவின் தம்பி கேரக்டர் அப்படியும் இருக்கின்றன .

 ஜாவா பழனியின் கெத்து உடல்மொழி அனாயாசமாக வெளிப்பட்டிருக்கின்றது .சங்கர் கேரக்டர் வடசென்னை மண்ணின் அடையாளம்தான் .ராஜன் பாத்திரத்திற்கான மூர்க்கமும் மோகமும் உடலும் அமீர் நடிப்பில் பார்க்கிறோம்.

 அப்பாவி இளைஞனின் பால் வடியும் முகத் தோற்றம் , சூழலில் திமிறி எழுவதை தனுஷிடம் ரசிக்க முடிகிறது .தம்பி பாத்திரம் அற்புதமாக வடிவமைக்கப்பட்டிருக்கின்றது .எந்த வெக்கையையும் உணர்ந்து தேவையான முடிவெடுக்கும் அன்புமிகுந்த பாத்திரமாக அந்தத் தம்பி பாத்திரம் கச்சிதம்.

 செந்திலின் மனைவியாக வரும் பெண் , அடடா அப்பாவித்தனத்தையும் மனசிற்குள் புழுங்குவதையும் வெகு இயல்பாக வெளிப்படுத்தியிருக்கின்றார்

( 2018 ல் படம் வெளி வந்த அக்டோபர் மாதம் 18 ஆம் தேதி எழுதப்பட்டது.இன்றுதான் வெளியாகிறது)

மாமன்னன் தவறவிட்ட இலக்கு எது?

இரண்டாவது நாளிலேயே மாமன்னனைப் பார்த்து விட்டேன்.மக்களின் உணர்வை அறிவதற்காக நம்ம மக்கள் திரளாக வாழும் வடசென்னை பட்டாளம் மகாலட்சுமி அரங்கில் பார்த்தேன்.மகாலட்சுமியில் படம் பார்ப்பதே சுகமான அனுபவமாக இருந்தது. எனது பார்வையை கருத்தை பிறகு சொல்லலாம் என நினைத்து ஐந்து நாட்களுக்கு பிறகு இன்று எழுதுகிறேன். மாரி செல்வராஜியின் விடுதலை உணர்வு சார்ந்த அரசியலைப் போற்றுகிறேன். அடித்தால் அடிப்போம்;வாடா என்றால் போடா என்போம்;திருப்பி அடிப்போம் என்று தோழர் சீனிவாசராவ் தலைமையில் ஐம்பதுகளில் கம்யூனிஸ்டுகள் தலைமையிலான விவசாயத் தொழிலாளர்கள் காவிரி நதிக்கரை மண்டலத்தில் முழங்கி வெற்றி பெற்றார்கள் என்பது சமநீதிக்கான போராட்ட வரலாறு. மாரிசெல்வராஜ்,வைகைப்புயல் வடிவேலு, உதயநிதி ஸ்டாலின்,ஏ.ஆர்.ரஹ்மான்,தேனி ஈஸ்வர் ,பகத்பாசில், கீர்த்தி சுரேஷ், கீதாகைலாசம் பங்களித்த கொங்குமண்டலத்தின் சாதீயை சித்திரித்த மாமன்னனை பாராட்டாமல் இருக்க இயலுமா? மாமன்னன் தன் இலக்கை நோக்கி பயணித்தாரா? இலக்கை அடைவதற்கான சமூகத்தின் சூழலைப் புரிந்து கொண்டாரா ? சனாதனத்தின்படி மனிதர்களை மேல் கீழ் என வரலாற்று காலத்திற்கு பிறகு தொடங்கி மனிதர்களை இன்று வரை பிரித்து வைத்து உழைப்பை உற்பத்தியை அபகரித்து வளரும் தமிழ்நாட்டின் இந்தியாவின் சனாதன சிஸ்டத்தை கார்ப்பரேட் சாதியம் மதவெறி இடையிலான கள்ளக் கூட்டணியை உடைத்தெறிய அழகியல் சார்ந்த அரசியலை மாரியால் பயன்படுத்த முடிந்ததா? போன்ற கேள்விகள் எழுந்ததால் இன்று எழுதுகிறேன்.

மெய்யாலுமே தன்னை உணர்ந்த தன் சொந்தக் கட்சியின் சாதீயப்பார்வையை ஒடுக்குமுறையை உணர்ந்து,வாழும் வீட்டை தாக்க வேண்டும் என்கிற முடிவோடு வருகின்ற ரத்னவேலுவின் ஆள் அம்புகளை உணர்ந்து மகன் அதிவீரனிடம் மாமன்னன் வடிவேலு சொல்கின்ற அந்த வசனம் இருக்கிறதே, "வீட்டுக்குள் அத்துமீறி நுழையறவன் ஒருத்தனும் உசிரோடு வெளியே போகக்கூடாது" என்ற அந்த வசனம் தருகின்ற புரிதல் இருக்கிறதே அபாரமானது.தன் மீது சொந்தக் கட்சியினராலேயே சுமத்தப்படுகின்ற சாதீயத்தை உணர்ந்த பாத்திரமாக மாமன்னன் வடிவமைக்கப்பட்டிருக்கிறது. தன் அப்பனுக்கு உட்கார மறுக்கப்படுகிற இருக்கையில் உட்காரச் சொல்கின்ற அதிவீரனின் அந்த ஆவேச கொந்தளிப்பான எதிர்வினைக்கு மகாலட்சுமி திரையரங்கும் அதிர்ந்து ஆர்ப்பரித்தது.சாதீயத்தை எவ்வாறு எந்த முறையில் எதிர் கொள்ள வேண்டும் என்ற பார்வை அதிவீரனுக்கோ லல்லிக்கோ இருப்பதாக அந்தப் பாத்திரங்கள் வனையப்படவில்லை. கவுண்டர்கள் நடத்தும் கொங்குமண்டல ஆயத்த ஆடை தொழிலகங்கள் மீது உலக வங்கி ஓர் ஆய்வை நடத்துகிறது.இந்த தொழில் வளாகங்களை ஒட்டி மண்டலத்தை ஒட்டி சாதீயம் இயங்குவதை உலக வங்கி அறிந்து, இத்தகைய சாதியத்தோடு பிணைந்திருக்கிற தொழில்களை தொடர்ந்து நடத்திட நிதி உதவி செய்யலாம் என்று எழுதப்பட்ட அறிக்கையை அறிஞர் ஆனந்த் தில்டும்டே தன் சமீபத்திய நாலான தலித்துகள்: நேற்று இன்று நாளை என்கிற நூலில் ( கிழக்கு பதிப்பகம்,2020, தமிழில்: பாலுமணிவண்ணன்) குறிப்பிடுகிறார். சாதீயம் பழைய காலம் போல இல்லாமல் அது தன்னை காத்துக் கொள்ள இந்திய நிலப்பரப்பில் புதிய தாராளவாத , ஒளிரும் பாரதத்தை முன் வைத்து தங்களின் ஆட்சி அதிகாரத்தை பாதுகாத்துக் கொள்ள இயங்கும் பெருமுதலாளித்துவ சக்திகளொடு இணக்கமாகிப் போகிறது. நவீன ஓருலக அணுயுத்த போரை முன்னெடுக்கும் நிதிமூலதன கார்ப்பரேட் சக்திகளை தங்களை பாதுகாத்துக் கொள்ளும் பொருட்டு இந்திய அளவிலான பெருமுதலாளிகள் பயன்படுத்துகிறது. உலக அளவில் தன்னுடைய சுரண்டலை அதிகாரத்தை தக்க வைத்துக் கொள்ள சாதிய திரட்சி அடிப்படையிலான தொழில்கள் மீது குறி வைத்து சாதீயத்தை மதவாதத்தை கையாள்கிற இந்திய ஆளும் வர்க்கத்தினரை காப்பாற்றிக் கொள்ள உலகவங்கியை கையாளும் க்ரோனி காப்பிடலிசம் உதவுகிறது.

இந்தப் புரிதல் நவீனகல்வி பெற்ற அதிவீரனோ லல்லியோ அறியாமல் இருப்பது என்ற முறையில் மாரி செல்வராஜ் உருவாக்கிய அந்தப் பாத்திரங்கள் வடிவமைக்கப்பட்டதன் வழியாக சாதீயத்தின் மதவாதத்தின் வேர் எது என்கிற புரிதல் தெளிவாக்கப்படவில்லை.உள்ளூர் அளவிலான ரத்தினவேலுவை எதிரியாக கட்டமைத்து ரத்தினவேலு போன்றவர்களை இயக்குகிற தீண்டாமை சாதீயத்தை தாங்கிப் பிடிக்கும் சக்திகளை மாமன்னன் காப்பாற்றவே செய்கிறது. சாதீயத்தின் சனாதன அரசின் தாங்குசக்தி எதுவென மாமன்னன் போன்ற படங்கள் சித்திரிக்காதவரை இவைகளை அழித்தொழிப்பதற்கான வேர்களை இந்த திரைப்படங்கள் கண்டறியாதவரை இந்திய தமிழ்நாட்டின் சாதியத்திற்கு எந்த ஆபத்தும் இத்தகைய படைப்புகளால் உருவாகப் போவதில்லை. படியேறும் பெருமாளில் கற்கத் தொடங்கிய மாரி , கர்ணன் வெற்றிப்படமாக அமைந்து விட்டனதால் தொடர்ந்து கற்பதை அவர் விட்டுவிடக்கூடாது சிவப்பு காட்டும் தத்துவ வெளிச்சத்தில் தொடர்ந்து சாதீயத்திற்கு எதிரான கலைபடைப்புகளை தர மாரிசெல்வராஜ் முயல வேண்டும். வாங்க தோழர் ஒரு டீ குடித்துக் கொண்டே பேசுவோமா?