அப்பாஸ் க்யரோஸ்தமி--சீனுராமசாமி கவிதைகளின் வாசிப்பனுவம்

அப்பாஸ் க்யரோஸ்தமி- சீனுராமசாமி கவிதைப் பிரதிகளின் ஊடான வாசிப்பனுபவம்

--இரா.தெ.முத்து

அப்பாஸ் க்யரோஸ்தமி ஈரான் சார்ந்த ஆண் பெண் மன உணர்வுகளை பெண்நிலை சார்ந்து அற்புதமான காட்சிமொழியில் இயக்கும் இயக்குநர் என்பதை இவரது தி சர்டிபிகேட் காப்பி வழி 2010 முதல் அறிவேன்.அப்பாஸ் க்யரோஸ்தமியை நான் திரைக்கலைஞர்  ரோகிணி வழி அறிவேன்.

நூல்வனத்தின் 'பாயக் காத்திருக்கும் ஓநாய்' எனும் அப்பாசின் கவிதைத் தொகுப்பை க.மோகனரங்கன் வழி மொழியக்கம் பெற்ற கவிதைத் தொகுப்பை கைகளில் ஏந்திய பொழுது மிரண்டு விட்டேன். என்னய்யா இது? அப்பாஸ் க்யரோஸ்தமி கவிஞரென யாரும் சொல்லவில்லையே என அதிர்ந்தேன். நூலின் முன்னுரையில் கவிஞர் சுகுமாரன் இதையே அவர் மொழியில் எழுதி இருக்கிறார்.

2023 ல் சீனுராமசாமியின் புகார்பெட்டியின் மீது படுத்துறங்கும் பூனை கவிதைத் தொகுப்பு வெளிவந்த பின்னரே சீனுராமசாமி கவிஞர் என அறிய வருகிறோம்.

2010 ல் தென்மேற்கு பருவக்காற்று திரைப்படம் வெளிவந்ததற்கு ஓராண்டு முன்பே வெளியான சீனுராமசாமியின் காற்றால் நடந்தேன் கவிதைத் தொகுப்பு வெளிவந்ததை நம்மில் பலர் அறிந்திருக்கவில்லை. இதுதான் அப்பால் க்யரோஸ்டமிக்கும் நிகழ்ந்தது.

இருவரையும் திரைப்படம் சார்ந்து கொண்டாடினோமே அல்லாமல் இருவரையும் அவர்கள் கவிஞர்கள் கவிமுகமும் இவர்களுக்கு வாய்த்திருக்கிறது என நாம் அறிந்தோமில்லை. 

அப்பாஸ் க்யரோஸ்தமியின் பாயக்காத்திருக்கும் ஓநாயையும் சந்தியா பதிப்பகம் பதிப்பித்த சீனுராமசாமியின் முதல்ருசியையும் அருகருகே வாசித்த பொழுது ஈரான் டெக்ரானின் அப்பாசும் தமிழ்நாட்டின் சீனுராமசாமியும் பல இடங்களில் ஒன்றுபடுகின்றனர்.

நிலத்தை குளத்தை மலரை பறவைகளை மூத்த உயிர்களை தனிமையை தங்களின் நிழலை காதலின் இழப்பை என இருவரும் தங்கள் படைப்பின் வழியாக ஒருபுள்ளியில் சந்தித்து நம்மை ஆச்சரியப்படுத்துகின்றனர்.அப்பாஸ் க்யரோஸ்டமி எல்லா இருளும் விடியும் என்பதில் நம்பிக்கை கொண்டிருக்கிறார்.

சீனுராமசாமி தனது முதல்ருசி தொகுப்பின் முன்னுரையில் சொன்னது போல இருவருமே காட்சி வழியாக கவிதையை விரித்துச் செல்கின்றனர்.இவர்களின் திரைப்படங்களின் காட்சிகளில் கவிதை முடிவடைகிறது; கவிதைகளில் காட்சி விரிகிறது என்பதனை இருவரின் தொகுப்புகளையும் அடுத்தடுத்து வாசிக்கையில் உணர முடிகின்றது.

'எனது இதயத்தை

தனியாகப் புதையுங்கள்

எளிதில் உடையக்கூடியது அது'

என அப்பாஸ் காதலின் இழப்பை அன்பின்மையின் வலியை சொல்கிற அதே உணர்வுப் புள்ளியில் சீனுராமசாமி இவ்விதம் ஒன்றுபடுகிறார்

'சுமையின்றி இருக்க நேர்வது

இருப்பதிலேயே பெருஞ்சுமை

மரித்தாலும்

புதைத்த இடத்தில்

கனமான கல்லை தூக்கிவைப்பீர்

அன்புக்காக பெரும்பகுதி சுமந்தலைந்த இவ்வுயிருக்கு'

இருவரின் நிழல் குறித்த பார்வை அச்சொட்டாக அப்படியே இருப்பது கவித்துவத்தின் எதிர்பாராத நிகழ்வு போலும்.

'எதற்காகவோ

என் பின்னால் வந்துகொண்டே இருக்கிறான்

அவனுக்கு என்ன தேவையென்று

எனக்குத் தெரியவில்லை

கோபத்தில் அவனுக்கு

என்னைவிட கைகள் நீளமாக இருக்கின்றன

நான் நின்றால் நிற்கிறான்

படுத்தால் படுக்கிறான்

ஓடினால் விரட்டுகிறான்

மிகவும் துயரமாக இருக்கிறது

அவனை

என் நிழல் என்கிறார்கள்

அதுதான் அச்சமாக இருக்கிறது'

-சீனுராமசாமி

'என்னைப் பின்தொடர்ந்து வருகிறது

ஒரு நிழல்

அது குழந்தைப் பருவத்தில்

எனது விளையாட்டுத் தோழனாக இருந்தது

அது என்னோடு இணைந்து வளர்ந்தது

அது என்னோடு சேர்ந்து முதிர்கிறது

அது என்னைத் தொடர்ந்து

எனது கல்லறைக்கும் வரும்'

-அப்பாஸ் க்யரக்யரோஸ்தமி

பெட்ரோல்கடல்

மீன்கறிக்கு உமிழ்நீர் சுரக்கிறது குழந்தை 
வாங்கிட ஆளின்றி கொண்டு வந்த மீனைக்
கொண்டு போகிறான் வேலப்பன்
வறள் உப்பு வாசக் காற்று
பெட்ரோல் கவிச்சியை கொண்டு சேர்க்கிறது
மீன்சந்தை தோறும் கண்ணீர்கதையாடல் 

சேவையின் மீது நம்பிக்கை சேர்க்க உபகரணங்கள் எதுவுமின்றி
கடற்கறையில் கசிந்துருகிக் கிடக்கிறது வாலிபம்
விபத்தா சதியா மீவெளிப் பகிர்வுகள் பார்வைக்கு வருகின்றன
கப்பல் மீது குற்றப்பத்திரிகை உண்டா
எழுகின்றன கேள்விகள்
சுவாசச்சிக்கலால் இறந்து மிதக்கின்றன கடலினங்கள்
இருந்து தொலைக்கின்றன அரசுகள்

பேராலம்

காலம் சும்மா 
கடந்து போக 
அனுமதியேன்
பக்கம் பரபக்கம்  
கூராய்வித்தே
அனுப்புவேன்
அடி மேல் அடி
கண்ணீராற் நிரம்பிய
பெருந்துயர்
தழைப்பதற்கான
துளிர்விட்டே
சரிகிறது பேராலம்

புலரியின் முத்தங்கள்

 சென்னையில் நடைபெற்ற மனுஷ்யபுத்திரனின் புலரியின் முத்தங்கள் கவிதைநூல் வெளியீட்டு நிகழ்விற்கு  ( 2016 மே 29 )போனேன். கவிதை குறித்தும் அதை யாத்த கவிஞரின் பார்வைகள் நுட்பங்கள் சார்ந்து உரைகள் கேட்க அத்தனை சுவையாய் இருந்தது. தமிழின் நவீன கவிதை சார்பான ஒரு படைப்பாளியின் புதிய தொகுப்பை முன் வைத்து வெவ்வேறு பார்வையில் உரையாடல்கள் நிகழ்ந்தது பாராட்டுக்குரியது. நிகழ்வின் முடிவில் நிறைவுரை ஏற்புரை என ஏதும் இல்லாமல் இருந்ததும் சிறப்பு. ஒவ்வொரு உரை முடிந்த பின்பு நிகழ்வின் தொகுபாளர், உரையில் தெறித்த வரிகள் பார்வைகள் ஊடாக, கேள்வியைத் தொடுத்து, அதன் ஒவ்வொன்றிற்கும் மனுஷ்யபுத்திரனிடம் பதில்கள் கேட்டு சொல்ல வைத்தது புதியதாயும் ஒரு கவிஞரின் பல்வேறு பரிமாணங்களை அவதானிக்கவும் உதவியது. அரசியல் சார்பு தேவையா என தொடுக்கப்பட்ட கேள்விக்கு மனுஷ் மிக அழகாக பதில் சொன்னார். “

 எல்லாவற்றிலும் அரசியல் இருக்கிறது.நாம் உணர்ந்த அரசியலை விடவும் உணராத அரசியலின் அடர்த்தி இங்கு அதிகம் . எவர் ஒருவருக்கும் அரசியல் சார்பு தேவையானதே. அது கூட குறைய இருக்கலாம்.எனினும் அரசியல் அவசியம் என்று பேசி, இதற்கு அப்பால் தான் அரசியல் அழுக்கு படாத சுயம்பு என்று பேசுவதெல்லாம் சரியல்ல  “ என்று கச்சிதமாகப் பேசினார். இரவு பத்து மணி வரையிலும் கவிதை சார்பான நிகழ்வு நடப்பதும் அமர்ந்து கேட்பதும் தமிழின் கவிதைக்கு நல்ல காலம் இதுவென்றே சொல்லலாம்.

” என் கவிதைக்குள் நீ உள்ளே வரும் பொழுது

நீ என்னை நோக்கி வரக்கூடிய

எல்லாக் கதவுகளையும்

நான் கருணையற்று அடைத்து விடுகிறேன்.”

-மனுஷ்யபுத்திரன்

அய்யப்பமாதவன் எனும் கவிஞன் கட்டித் தழுவும் ஒரு சதுக்கப்பூதம்:

அய்யப்ப மாதவன் அழைத்ததை ஒட்டி அவரின் புத்தனின் விரல் பற்றிய நகரம் கவிதை நூல் வெளியீட்டிற்குப் போயிருந்தேன்.இரண்டு காரணம் அவர் அழைத்தார்;அடுத்தது கவிதைப் பற்றி என்ன கருதுகோளை நிலைப்பாட்டை வைத்திருக்கிறார்கள் என்பதை அறிந்து கொள்ள. அவருக்கு நெருக்கமான அவரின் கவிதையோடு பரிட்சயம் கொண்ட ஒரு ஐம்பது பேர் நிகழ்வில் இருந்தோம்.

பேசிய பலரும் கவிதைக்கு இங்கு இடம் என்னவாக இருக்கிறது என்றும் ,காலமும் சமுகமும் கவிஞனை கையேந்த வைத்திருக்கிறது என்று கவலையைப் பதிவு செய்தனர். மாதவன் வெளியைப் பற்றி பசியைப் பற்றி சொந்த அனுபவ மொழியில் எழுதிருப்பதையும் பேசியது மகிழ்ச்சியே. மாதவனின் ஏற்புரை எனக்குப் பிடிக்கவில்லை.

அவர் பேசிய பல விசயங்களால் கவிஞர்கள் இப்படி விசயஞானம் இல்லாமல் இருக்கக் கூடாதே என்று ஆதங்கம் கொள்ள வைத்தது. தேர்ந்தெடுக்கப்பட்ட கவிதை என்பதினால் தம்பி பூபதியின் கனிவில் நல்ல தள்ளுபடியில் 454பக்கம் கொண்ட நூலை பணம் கொடுத்து வாங்கிக் கொண்டேன்.

வாசித்தக் கவிதையில் சாம்பிளுக்கு இரண்டு.
அய்யப்ப மாதவனின் கவிதையில் படிமஅழகும் சமுகக் கோபமும் இருப்பதிற்கான இரண்டு அது.இருள்,மரம்,காற்று,நிலா, பனி,இலை,உதிர்தல் இப்படியாக வெளியைச் சொல்லும் பொழுது

`விடிவிளக்கென நிலா/பறவைக் கூடுகளில் படிந்திருந்தது’ என்கிறார்.

இந்த வரிகள் விவரணைக்கு அப்பாற்பட்ட புலனால் உணரத்தக்க காட்சியின் உணர் அனுபவத்தை கிளர்த்தி அடடா என பரவசம் கொள்ளச் செய்தது. அடுத்தது பாசிசம் என்கிற கவிதையில் பசியும் வறுமையும் ஒருவரை ஓர் உள்நாட்டுப் போராளியாய் மாற்றிவிடக் கூடும் என அச்சப் படுகிற கவிதையின் இடத்தில்` அரசாங்கப் பணிக்காக கையூட்டு வாங்கும்/அதிகாரிகளின் அமைச்சர்களின் தலைகளைத் துண்டாடும் சமுக சேவகனாய் மாறக்கூடும்’ என்கிற அரசியல் கவிதையின் குறிப்பிட்ட இடத்தின் கவிதாவேசம் அய்யப்பனை முதுகில் தட்டி தொடர்ந்து எழுது மாதவா என்று சொல்லத் தோன்றுகிறது.

ஆனால் இவர் , கலைஞர்களை படைப்பாளிகளை மதிக்கத் தெரியாத சினிமாவின் கரங்களுக்குள் தன்னை சிறைப்படுத்திக் கொள்ளும் குரூர முயற்சியை விவரித்துச் சொல்லி ஏற்புரையில் தன் கவிதை-இது கொண்டாடப்படும் இடம்-இதன் அழகு-இதன் கோபம் என எதுவும் பேசாமல் தேர்ந்தெடுத்த தன் 300 கவிதைகளை சினிமா உலகின் முன் விசிட்டிங் கார்டாய் விரித்து நின்ற பரிதாபத்தை சினிமாவின் வசீகரத்தை என்ன சொல்ல? (சினிமா வெறுப்பு எனக்கில்லை; அழைக்கும் சினிமாவைக் கொண்டாடலாம்)

நிகழ்வில்அய்யப்பமாதவன்,கருணாபிரசாத்,சூர்யதாஸ்,பாரதிகிருஷ்ணகுமார்,அழகியசிங்கர்,பா.கிருஷ்ணன்,ரவிசுப்ரமணியன்,விஜயபத்மா,
அப்பணசாமி, தேவேந்திரபூபதி,யவனிகாஸ்ரீராம், சீனுராமசாமி,தோழமை பூபதி,ஆதிரா முல்லை,சந்திரா, நாச்சியாள் சுகந்தி, வேல்கண்ணன்,கே.என்.சிவராமன்,மதிராஜ்,தம்பி யுவகிருஷ்ணா என தோழர்கள்-நண்பர்களின் சந்திப்பு நேற்றைய மழை பெய்த அந்திப்பொழுதை மேலும் அன்பால் ஈரப்படுத்திக் கொண்டே இருக்கிறது.

குண்டர்கிராஸ் மறைந்தார்

குண்டர் கிராஸை நான் 20 ஆண்டுகளுக்கு முன்பு அறிவேன்.அப்பொழுது கிராஸ் இந்தியாவிற்கு வந்திருந்தார்.தாய்மொழி ரீதியிலான புரிதல் மட்டுமே அறிவை கலையாற்றலை வளர்க்க இயலும்;ஆங்கிலத்தினால் அன்று என்று அவர் கொடுத்த பேட்டி வழியாக அவர் மீதான் ஆர்வம் அதிகரித்தது.

ஜெர்மனி சார்ந்த நாவலாளர்-விமர்சகர்-கலைவிமர்சகர் எனும் பன் முகம் கொண்டவர் கிராஸ்.நோபல் பரிசு வெற்றியாளரும் கூட.எனினும் இஸ்ரேல் ,  பாலஸ்தீனர்கள் மீதும் ஈரான் மீதும் கொடும் ஆயுதத் தாக்குதலை-அணு ஆயுத மோதலை உருவாக்கிய 2006 களில் கிராஸ் கேட்ட கேள்வி `நாம் என்ன சொல்ல வேண்டும்?’

இந்தத் தலைப்பின் கவிதை இஸ்ரேலை அச்சப்படுத்தியது;அமெரிக்காவை எரிச்சல் செய்தது.எனினும் கிராஸின் கவிதை உலகம் முழுவதுமுள்ள சமாதானப் பிரியர்களுக்கு பெறும் உற்சாகத்தை தந்தது.

கவிதை எனப்படுவது யாதெனின் என்று நுரைத் தள்ளப் பேசுபவர்கள் குண்டர்கிராஸ்  எழுதிய இந்தக் கவிதையை வாசிக்க வேண்டும்.

ஜெர்மனியின் லுபெக் நகர வீட்டில் தன் 87 ஆம் வயதில்   இலக்கிய பரிசோதனை எனும் நூலிற்கான பணியில் இருந்த பொழுது,  13 ஆம் திகதி மறைந்திருக்கிறார் கிராஸ்.

ஸர்மிளாவின் சிறகுகள்

தமிழ்நாடு முற்போக்கு எழுத்தாளர் கலைஞர்கள் சங்கத்தின் கவிதை இலக்கியத்திற்கான 2012 ஆம் ஆண்டின் செல்வன் கார்க்கி நினைவு விருதுக்கு தேர்வு செய்யப்பட்ட கவிதைத் தொகுதி “சிறகு முளைத்த பெண்“.

விருதுநகரில் இடம்பெற்ற விருது வழங்கும் நிகழ்வில் கலந்துகொண்டு விருதை ஏற்க முடியாமல் போன கவிஞர் ஸர்மிளா ஸெய்யித் அண்மையில் சென்னை வந்தபோது எம்மைத் தொடர்பு கொண்டார்.

அவகாசம் கொடுத்து வந்தால் ஒரு சிறிய இலக்கிய சந்திப்பிற்கு ஏற்பாடு செய்திருக்கலாம். எனினும் குறுகிய நேரத்திற்குள் ஏற்பாடு செய்யப்பட்ட சந்திப்பு , ஆசிரியர் தினத்தன்று புத்தகம் பேசுது அலுவலக மாடியில் நிகழ்ந்தது.

 சைதை ஜெ,கி.அன்பரசன், மயிலை பாலு,ஜேசுதாஸ் போன்ற தோழர்கள் பல வேலைகளில் மாட்டிக் கொள்ள, கருப்பு தேநீர் தந்து மொழிபெயர்ப்பாளர் பெரியசாமி வறவேற்க, இலக்கிய செய்திகள் பறிமாற்றத்தினூடாய் எழுத்தாளர் ஜாகிர்ராஜா புன்முறுவல் காட்ட, பிறகு கருப்பு பிரதிகள் நீலகண்டனும் குவர்னிகா யாழ்ப்பாண மலரோடு வந்து சேர்ந்து கொள்ள அறிவிக்கப்படாத ஒர் இலக்கிய சந்திப்பு அங்கே நிகழ்ந்தேறியது. 

அதற்கு முன், தமுஎகசவின் கவிதைக்கான 2012 ஆம் ஆண்டின் விருதிற்கான ரூபாய் ஐந்தாயிரத்தோடு படைப்பாளர்களின் விருதுக் குறிப்பேடை மாநில துணைப் பொதுச்செயலாளர் இரா.தெ.முத்து, மாநிலக்குழுவின் சிறப்பு அழைப்பாளர் கீரனூர் ஜாகிர்ராஜாவும் இணைந்து வழங்கினர்.

தீர்க்கமான அறிவும் கள அனுபவமும் இலங்கை குறித்த தரவுகளோடு கிண்டலும் கேலியும் கொண்ட முப்பது வயது ஸர்மிளா ஸெய்யித் ஊடகத்துறை மற்றும் ஐரோப்பிய ஒன்றியத்தின் செயற்திட்டமொன்றில் போரினால் பாதிக்கப்பட்ட மாற்றுத் திறனாளிகளுடன் பணியாற்றியது, சர்வதேச மனித உரிமைகள் அமைப்புடன் இயங்கியது போன்ற அனுபவங்கள் தனது பல கவிதைகளின் வாசலாகவும் களமாகவும் இருந்திருக்கிறது என்றார். 

ஈழத்தில் பெண் படைப்பாளிகள் குறித்துத் தெரிவிக்கையில், இலங்கையிலிருந்து எழுதும் பெண் படைப்பாளிகளில் தமிழகத்தில் பெருதும் கவனத்தைப் பெற்ற கவிஞர்களாக அனார்,பஹிமா ஜஹான் இருவரையும் குறிப்பிடலாம். இவர்கள் தவிர்ந்த பெண்படைப்பாளிகளே ஈழத்தில் இல்லை என்று அர்த்தமில்லை. பல பெண் படைபாளர்கள் உள்ளனர். 

அவர்கள் தமது அவசங்களை மட்டுமின்றி  விவசாய, கூலிப் பெண்கள் பற்றியும் எழுதுகிறார்கள். சூர்யா பெண்கள் அபிவிருத்தி நிறுவனம் நடத்தும் ”பெண்” சஞ்சிகை, மேலும் மலையகத்தில் இருந்து வரும் சில சஞ்சிகைள், கொழும்பைத் தளமாகக் கொண்டு வரும் ”கோசம்,” ”சொல்” போன்ற சஞ்சிகைள் பெண்களுக்கு களம் தருகின்றன. மலையகத்தில் பெண்கள் குறித்த பல சஞ்சிகைகளும் வருகின்றன என்றார்.

`அங்கு இப்போது சாதி முரண்பாடுகளின் நிலவரம் எப்படி இருக்கின்றது?’என கேட்க ` இன்றைய சூழலில் எங்களுக்கு சாதி முரண்பாடுகளை விட, எம் மீதான இனப் பாரபட்சமும் பெரும்பான்மை சமூகத்தின் அழுத்தங்களுமே ஆகப் பெரிதாக இருக்கின்றது’ என்றார்.

இலங்கையிலுள்ள இசுலாமியர்களின் பிரச்சினைகள் பற்றி பிரஸ்தாபிக்கப்படுவதில்லை என்றும் அவர்களது பிரச்சினைகள் தேவைகள் ஊடகங்களால் புறக்கணிப்படுகின்றன என்றும் வருத்தம் தெரிவித்த அவர், தமிழைத் தாய் மொழியாகக் கொண்ட இலங்கை இசுலாமியர்கள், தமிழர்களின் சுயநிர்ணயப் போராட்டத்திற்கு அளித்த பங்களிப்புகளும் தியாகங்களும் இன்று முற்று முழுதாக மறக்கடிக்கப்பட்டுள்ளதுடன், இசுலாமியர்களுக்கு திட்டமிட்டு இழைக்கப்பட்ட அநீதிகள் வெறும் துன்பியல் நிகழ்வுகள் என்பதாக மட்டுமேயாகி புறக்கணிப்படுவது கவலையளிப்பது என்றார்.

 பேரின சமூகத்தினால் இன்று இசுலாமியர்கள் குறிவைக்கப்பட்டுள்ளனர். பொதுப்பலசேனா என்கிற சிங்கள தீவிரவாத அமைப்பின் திட்டமிட்ட நடவடிக்கைகள் இசுலாமியர்களை அச்சமடையச் செய்வதாக உள்ளது. இசுலாமியர்களின் எதிர்கால இருப்பு கேள்விக்குட்படுத்தப்பட்டுள்ளது. அவர்களது வணக்கஸ்தலங்கள் திட்டமிட்டு அழிக்கப்பட்டு வருகின்றன. அவர்கள் மீது பல்வேறு விதமாக தாக்குதல் கட்டவிழ்த்து விடப்படுகின்றன என்றும் கூறினார்.

போர் முடிவடைந்த பின்னரும் நிலவுகின்ற நம்பிக்கை அற்ற அரசியல் அரங்கு காரணமாக எம் படைப்புகளில் நம்பிக்கையின்மை இருக்கிறது; இது படைப்பாளிகளின் குறைபாடு கிடையாது; சூழலே காரணம் என்றார்.

உங்கள் படைப்புகள் எப்படி அறியப்பட்டிருக்கிறது என்ற கேள்விக்கு

 தனக்கான முதல் அங்கீகாரமே தமுஎகசவின் இந்த கவிதை விருதுதான் என்றவர். ”சிறகு முளைத்த பெண்” தொகுப்பைப் பற்றி கவிஞர் சமயவேல், குட்டிரேவதி, இளைய அப்துல்லாஹ் போன்றோர் எழுதி இருக்கின்றனர்

இலங்கையில் பி.பி.சி. வானொலியில் நான் அளித்த நேர்காணல் சர்ச்சைக்குப் பின்னர் முன்பை விடவும் நான் அதிகம் அறியப்பட்டதனால் எனது கவிதைகளும் அதிகம் பேரால் படிக்கப்பட்டது, விமர்சிக்கப்பட்டது. இந்த விமர்சனம் தனிநபர்களின் திட்டமிட்ட தாக்குல்களாக என்னை நோக்கி வந்ததினால் சில பின்னடைவுளுக்கும் சமூகப் புறக்கணிப்புகளை எதிர்கொள்வதற்கும் காரணமாக அமைந்தது என்பதாகவும் ஸர்மிளா ஸெய்யித் பகிர்ந்து கொண்டார். விரைவில் தனது நாவல் ஒன்று வெளிவரவிருப்பதாகவும் குறிப்பிட்டார்.

சிறியதாகத் திட்டமிட்ட சந்திப்பு ஒரு நிறைவான இலக்கிய நிகழ்வு போன்றே 

நிறைவடைந்தது. மாலை ஆறு மணியாகிவிட ”தனியாகப் 

போய்விடுவீர்கள்தானே, என்றதற்கு `தோழர் இவ்வளவு தூரம் வந்த எனக்கு 

இருக்கிற இடத்திற்கு போகத் தெரியாதா, என்று ஒரு பஞ்ச் வைத்து

கலகலவென்று சிரித்து நேசத்தை வெளிப்படுத்திக் கொண்டார்

வேண்டுதல் அன்று மைத்ரிபால....

கணங்களின் தோற்றம்

-1-
கனவுகளில் உயர்ந்தெழும்
வீர நாச்சியாளின் நெடுவாள் முனை
உன் கண்களை பிரதிபிம்பம் செய்து கொண்டிருக்கின்றன
சில கணங்களினூடாய் தோற்றம் கொள்ளும் உன் முக இறுக்கமும்
 நாச்சியாளையே ஒர்மை செய்து கொண்டிருக்கிறது!

-2-
கன்னக்குழிச் சிரிப்பில்
சிக்குண்டு நான் கிடக்க
பெருவரம் வேண்டும் சகியே சகியே!

-3-
 ஆழப் பெருங்கடல் ஆயினும்
உன் மடிதானே அதன் புகலிடம்!

-4-
திசைப்பறவைகள்
ஒரு பொழுதும்
திக்கற்றுக் கிடப்பதில்லை!

-5-
வளர்பிறை
உன் குறுநகை!

-6-
அடர்ந்து பெய்யும் பனியும்
உன் அன்பையே ஞாபகப்படுத்துகிறது!

உண்மையாய் நிற்கிறது உண்மை

-இரா.தெ.முத்து

தம்பட்டம் போட்டுக் கொண்டு விளம்பரப்படுத்திக் கொள்ளாத உண்மை

இருப்பிலேயே தான் புரிந்து கொள்ளப்பட வேண்டுமென்று கோரி நிற்கிறது

 தான் உண்மையாக இருக்கிறேனென்று உண்மை எப்படி சொல்ல இயலும்?

 உணரப்பட வேண்டும் உள் வாங்கப்பட வேண்டும் என்றே விரும்புகிறது உண்மை

பொய்மைகள் உழலும் கிரகத்தில் உண்மையின் வெளிச்சம் கண்டுக் கொள்ளப்படாது

போவதென்பது பெருஞ் சோகந்தானெனினும்

 நிரந்தரமில்லை என்பதை

புரிந்து  கொண்டிருக்கிறது உண்மை

பொய் புனைசுருட்டு பம்மாத்து பணங்களில் சாய்ந்தது பொதுமனம் 

என்று மொட்டையாக கருத்து சொல்ல விரும்பாத உண்மை

உண்மையின் உண்மையை பொதுமனதோடு கொண்டு சேர்க்க

தொடர்ந்த உரையாடலையும் களமாடுதலையும் முன் மொழிகிறதெனினும்

எக்காலத்திற்கும் பொய்மை தன்னை பாதுகாத்திட இயலாதென்ற

வரலாற்றுக் கணக்கையும் வரித்துக் கொண்ட உண்மை

வீடு வீடாக வாழ்க்கையின் உண்மையை 

சலுகை உரிமை நியாயங்களின்  உண்மையை

கொண்டு சேர்க்க 

உண்மையின் முகத்தோடு உண்மையாய்   நிற்கிறது காலஉண்மை

நன்றி:வீதி இதழ்/2014 ஜூன்

தமிழ் ஒளி பரவுக

`கவித்துவம் கம்பீரம்

பொதுமை நோக்கோடு இயங்கிய

தனித்த அடையாளம்

எளிய மக்கள் ஏற்றம் பெற

எழுதுகோல் தரித்த சூறாவளி’

என்ற பிம்பத்தை விட்டுச் சென்றிருக்கும் சி.விஜயரங்கம் என்ற தமிழ்ஒளி (1924-1965) பாரதி,பாரதிதாசன் என்ற ஆளுமைகளின் வழித்தடத்தில் பயணப்பட்டவர்.பாரதிதாசன் மீது மிகுந்த நேசம் கொண்டு அவரின் அன்பைப் பெற்றவர்.1940 ஆம் ஆண்டு முதல் கம்யூனிஸ்ட் இயக்கத்தின் மீதான ஈடுபாட்டால் தன்னை பாட்டாளிகளின் பாவலனாக மாற்றிக் கொண்டவர்.

அமரர் ஜீவாவிற்கு அடுத்து `ஊரை எழுப்பிடவே-துயர்

ஒன்றை நொறுக்கிடவே

தாரை முழக்கிடுவேன்’என்று பாடவந்தவர்.யாப்பு முறையில் அற்புதமான சந்தத்தோடும் எதுகை மோனையோடும் பாவேந்தரிடம் கவிதை எழுதக் கற்றுக் கொண்டவர்,வாழும் சூழலையும் மக்களின் வாழ்க்கைப் பாடுகளையும் அடிமைப்பட்டுக் கிடந்த தேசச் சூழலையும் கவனித்து வந்த தமிழ்ஒளி பாவேந்தரின் அரசியற் கொள்கையிலிருந்து விலகி`இந்தத் தத்துவம்(மார்க்கியம்),உலகில் எவராலும் வெல்ல முடியாத தத்துவமும் உண்மையென்று நீரூபிக்கப் பெற்ற தத்துவமும் ஆகும். பழைய வேதாந்த சித்தாந்தங்கள் எல்லாம் இதன் முன்னே தலைகுப்புற விழுந்து தவிடு பொடி ஆகி விட்டன.இதை உணர்ந்தே நான் என்னுடைய கொள்கையை வகுத்துக் கொண்டேன்” என்று உணர்ந்து இடதுசாரி அரசியல் சார்ந்த கலை இலக்கியத்தை தன் வாழ்வாகவும் பாதையாகவும் வகுத்துக் கொண்டவர்.

கவிதைகள்,காவியங்கள்,கதைகள்,கட்டுரைகள்,நாடகங்கள் என தொடர்ந்த இருபதாண்டு காலத்தின் பெரும் பகுதி இந்தப் பாதையில் பயணித்தார்.அரசியல் கொந்தளிப்புகளும் போராட்டங்களும் எழுச்சிகளும் நிறைந்த காலத்தில் வாழ்ந்த தமிழ்ஒளி இவைகளை தம் படைப்பில் பதிந்தார்;ஆளும் வர்க்கங்களை ஆவேசங் கொண்டு தாக்கினார்;தொழிலாளர்களின் போராட்டங்களை வாழ்த்தி எழுச்சி ஊட்டினார்;போர் வெறி பிடித்து அலைந்த அரசுகளைச் சாடினார்.

சீனப்புரட்சியின் முன்னேற்றத்தை வெற்றியை 

`ஓ ஓ என்றார்ப் பரித்தே எழுந்தது பார் ஊழிப்போர்

உலகமெங்கும் ஆஆ என்றதிசயிக்க ஆசியத்தாய் மனங்குளிர” இப்படி முறசரைந்து மகிழ்ந்தார். பாரதி ரஷ்யப் புரட்சியை முதலில் தமிழில் பாடிய கவிஞன் என்றால் தமிழ்ஒளி சீனப்புரட்சியை தமிழில் பாடிய கவிஞன் எனலாம்.

இந்தியா பெற்ற சுதந்திரம் யாருக்கானது எப்படிப் பட்டது என்பதை

`வந்த விடுதலை யாருக்கென்றே அதை வாங்கிய வீரரைக் கேட்டிடுவோம்

நொந்து கிடப்பவர் வாழவில்லை எனில் நொள்ளை விடுதலை யாருக்கடா?’ என கேட்டு 47 லேயே கேள்வி தொடுத்தார்.

`கண்ணின் கருமணியே காசினிக்கு மாமணியே

கண்ணீர் துடைக்க வந்த காலமே நீ வருக’

என்று மேதினத்தை முதலில் தமிழில் நெடுங்கவிதையாகப் பாடியவரும் தமிழ்ஒளிதான்.

`காதெலாம் கிழியும் வணம் பறையடித்து விட்டான்

கவுண்டருக்கும் பறைச்சிக்கும் கலியாணம் என்று’ 1947ல் எழுதிய வீராயி காவியத்தில் இப்படி ஓர் இடம் வருகிறது.இந்த காவியம் தலித் மக்களைப் பற்றி தமிழில் பதிந்த முதல் காவியம்.பஞ்சம் பிழைக்க கிழக்காசிய நாடுகள்,ஆப்பிரிக்க நாடுகளுக்கு கொண்டு செல்லப்பட்ட தலித் மக்கள் படும் வாதைகளை பாடும் காவியம் ஆகும்.

 ஒன்றாய் இருந்த கம்யூனிஸ்ட் கட்சியின் ஏடான ஜனசக்தி தடை செய்யப்பட்ட காலத்தில் கட்சியின் கருத்தை ,போராட்டச் செய்திகளை கொண்டு செல்ல தொடங்கப்பட்ட `முன்னணி’ வார இதழின் துணை ஆசிரியராக இருந்து ,இதுவும் தடை செய்யப்படும் வரை சிறப்பாக செயல்பட்டிருக்கிறார்.முன்னணியில் அரசியல் கட்டுரைகள்,கவிதைகள்,இலக்கிய விமர்சனம்,நாடகம் என வாரந்தோறும் எழுதி இருப்பதையும் காண முடிகிறது.

1949ல் வெளிவந்த தொ.மு.சி.ரகுநாதனின் இலக்கிய விமர்சனம் என்கிற நூலுக்கு முன்னணியில் விமர்சனம் ஒன்றை தமிழ்ஒளி எழுதி இருந்தார்.அதில் தொ.மு.சி கவின்கலை,பயன்படுகலை பற்றி எழுதி இருந்தார்.கவின்கலை மனம் சார்ந்த ரசனை உணர்ச்சி என்றும் பொதுமக்களுக்கான பயன்படும் முறையில் உள்ளவைகள் பயன்படுகலை என்றும் சொல்லி, இரு உணர்ச்சி சார்ந்த கலைகளும் எக்காலமும் இருந்தே தீரும்,இருக்க வேண்டும்  என்று எழுதி இருப்பார்.இதற்கு தீவிரமான எதிர் விவாதம் ஒன்றை சிலவாரம் எழுதினார் தமிழ்.ஒளி.இந்தப் போக்கு வர்க்க சமரசம் என்றும் மார்க்சிய அழகியல் இதுவல்ல என்றும் எழுதி இலக்கியத்தில் முற்போக்கு கண்ணோட்டத்துடன் ரகுநாதன் செயல்பட முயற்சிக்க வேண்டும் என்று முடித்து இருப்பார்.

அகில இந்திய முற்போக்கு எழுத்தாளர் சங்கத்தின் கிளையாக தமிழ்நாடு முற்போக்கு எழுத்தாளர் சங்கம் 1949 களில் அமைப்புக் குழுவாக இருந்த பொழுதும்,1952 களில் நிர்வாகிகள் தேர்வு செய்யப்பட்ட பொழுதும் ஒரு நிர்வாகியாக துணைச் செயலாளராக இருந்து செயல்பட்டவர் தமிழ்ஒளி.அன்று இடதுசாரிகள் மீது அடக்குமுறைகள் ஏவப்பட்டக் காலத்தில்,இப்படி ஓர் இலக்கிய அமைப்பு இயங்கியது பற்றியும்  மக்களின் ஜனநாயக உரிமைகளுக்காக அது குரல் கொடுத்ததையும் இதன் வரலாற்றை நாம் திரட்டியாக வேண்டிய தேவையிலும் இருக்கிறோம் என்பது தனி.இது போல் முன்னணியில் வெளிவந்த படைப்புகளை பதிப்பித்து தமிழ்மக்களிடம் சேர்ப்பிக்க வேண்டிய பொறுப்பும் முற்போக்கு அரசியல் அமைப்பிற்கும் ,இலக்கிய அமைப்பிற்கும் உள்ளது.

தமிழ்ஒளியும் அவரது எழுத்தும் அறுபத்து மூன்று ஆண்டுகளாக தமிழ் மக்கள் மத்தியில் புழக்கத்தில் இருப்பதை நாம் மேலும் பரவலாக்க வேண்டும். புதிய பொருளாதாரச் சூழல் காலத்தில் வருவதை ஏற்கும் மக்களின் மனநிலையில் மாற்றம் வர,  உண்மையை யோசிக்க வைக்க,பிரிட்டிஷ் அடக்குமுறைகள் கோலோச்சிய காலத்தில்,புதிய இந்தியா உருவாகிவிட்டது என்று மக்களிடம் இருந்த ஏற்கும் மனநிலையைப் பயன்படுத்தி நேரு அரசு அராஜகத்தை கட்டவிழ்த்த காலத்தில் ,நீ எந்தப் பக்கம் என்று அறைகூவிய படைப்புகளை மனதிற்கு எழுச்சியூட்டிய தமிழ்ஒளி படைப்புகளை இன்று பரவலாக்க வேண்டும்.

தமிழ்ஒளியை   ஒடுக்கப்பட்டவர் என்று சொல்லி அவரின் கொள்கையை அரசியல் நோக்கை பின்னுக்கு தள்ளவும் இதன் வழி இடதுசாரிகள் முற்போக்கு இலக்கிய அமைப்புகள் மீது அவச்சொல் சுமத்தவும் இன்று சிலர் கிளம்பியுள்ள காலத்தில் தமிழ்ஒளியின் அரசியலை பாதுகாக்க அவரின் படைப்புகளை பாதுகாக்க மேலும் கவனத்தோடு முற்போக்காளர்கள் இருக்க வேண்டியது தேவை என்றாகிறது.

தமிழ்ஒளி ஓர் இடதுசாரி படைப்பாளியாக முகிழ்த்த பொழுதும் அதன் பின் வந்த காலங்களும் அவர் இறக்கும் காலமும் கம்யூனிஸ்ட் அமைப்பிற்கு மிகுந்த சோதனைகளும் ஒடுக்குமுறைகளும் ஏற்பட்ட காலம்.எளிய மக்களின் அன்பும் ஆதரவும் தவிர,வேறெந்த வாய்ப்புகளும் இல்லாத காலம். அமைப்பு தலைமறைவாக இருந்து மக்கள் பணியைச் செய்திருந்த காலம்.மக்களைப் போலவே அமைப்பு சார்ந்த ஊழியர்களும் குறைந்த வருவாயில் வாழ்வை வாழ்ந்த காலத்தில் தமிழ் ஒளியும் இருந்தார்.இந்தச் சூழல் தமிழ் ஒளியையும் பாதித்தது.படைப்பாளியாக இருந்து படைப்பதற்கான சூழல் அவருக்கு வாய்க்கவில்லை.

 இந்தப் பின்னணியைப் புரிந்து கொள்ள இயலாதவர்கள் தமிழ் ஒளி நிழலடிப்பு செய்யபட்டார் என்றும் கவனிக்கப்படவில்லையென்றும் இடதுசாரிகளை ஏற்றுக் கொள்ள இயலாதவர்கள் மறைந்த தமிழ் ஒளியை பயன் படுத்தி காழ்ப்பை முன் வைக்கிறார்கள்.இதிலிருந்து தமிழ் ஒளியைப் பாதுகாப்பதும் அவர் படைப்பை முன்னெடுக்க வேண்டியதும் ஒவ்வொரு முற்போக்காளரின் கடமையாகும்.

`காற்றில் நெருப்பாய்

கடலில் அலைப் பெருக்காய்

ஆற்றில் புனலாய்

தேக்கிலை போல் காதுடைய

யானைக்கூட்டத் திரள் போன்று புறப்படுவோம்’(தமிழ்ஒளி)

நன்றி:தீக்கதிர்(2013 செப்டம்பர் 21)

கவிஞரின் 90 ஆவது பிறந்த நாள் ஒட்டி எழுதப்பட்டது

அதிகாரத்தை நோக்கி நீண்ட சொற்கள்

தமிழ்நாடு முற்போக்கு எழுத்தாளர் கலைஞர்கள் சங்கத்தின்,2012 ஆம் ஆண்டின் கவிதை இலக்கியத்திற்கான , செல்வன் கார்க்கி நினைவு விருது மற்றும் பரிசு ரூபாய் 5000 ஐ பெற்ற தொகுப்பு சிறகு முளைத்த பெண்.

ஸர்மிளா ஸெய்யித் கிழக்கிலங்கை மட்டக்களப்பு பகுதியின் ஏறாவூர் சார்ந்தவர்.`வாழ விரும்புகிறேன்’ இவரின் முதல் கவிதை. சிறகு முளைத்த பெண் இவரின் முதல் தொகுப்பு.கவிஞர்;ஊடகவியலாளர்;செயற்பாட்டாளர்;பெண்ணியவியலாளர் என பன்முகம் கொண்டவர்.

இலங்கை ஆளும் வர்க்கத்திற்கு இணக்கமான பகுதியினர் என சொல்லப்படும் கிழக்கு இலங்கையின் இஸ்லாம் சமுகத்திலிருந்து ஆளும் வர்க்கத்திற்கு எதிராக  வெளிப்பட்ட குரல் இவருடையது.  கண்டு கொள்ளாது நடப்பதும்,மெளனமாக இருப்பதும் மார்க்கப் பெருமையென சொல்லப்பட்டதிற்கு மாறாக ,அச்சமற்ற நெஞ்சோடும் நேர் பார்வையோடும், இழிவுகள் மீதான கருத்தாடலோடு இயங்குவதும், தன்னைத் திறந்த சிந்தனைகளின் சாவியால் மலை மீறி பறப்பதும் ,மத அடிப்படைவாதத்திற்கு ஆகாதென்பதனால்  அடிப்படைவாதிகளின் அச்சுறுதலுக்கும் ஆளானவர்.

சமகாலத் துயர்களின் மீதான கவனமும், அதிகாரத்தின் சிம்மாசனத்தை நோக்கி நீளும் சொற்களுமாய், மதத்தின் போலிமையை பொது வெளியில் காட்சிக்கு வைக்கும், வேலி மீறி துளிர்க்கும் சுதந்திரத் தன்மையும் அரசியலும் அழகியலும் கைவரப் பெற்ற ஒரு பெண்ணின் வாக்குமூலச் சொற்கள் இது.

சுருட்டப்பட்ட சூரியன் ,ஒளியிழந்த நட்சத்திரம் ,வெடிக்கும் வானம் ,தீப்பந்த மேகம்,பொங்கும் கடல்,பிளவுறும் பூமி,வெடித்துச் சிதறிய கர்ப்பிணி ஒட்டகம் என்று படிமத்தை அடுக்கி அடுக்கி யுத்தப் பேரழிவைக் காட்சிப்படுத்தி `நேற்று நாமிருவரும் சுவைத்த ஈச்சங்கனிகளின் மரம் அடிப்பாகங்களோடு சாய்ந்து கிடக்கிறது’என்று சொல்கிற பொழுது பாரிபடுகளத்திற்குப் பிறகு கபிலர் பாடும் இருந்த வாழ்வின் இல்லாமையின் பிம்பம் போலுமான `நீ இல்லாத இரவு என் கழுத்தை நெரிக்கிறது’ என்ற வரிகள் வழியாக துயறுரு பெண்களின் வாதையின் சித்திரம் காட்டப்படுகிறது.

உண்மையை எதார்த்தத்தை எந்த மாமன்னனும் விரும்பாததைப் போலவே தொகுப்பில் வரும் மன்னனும் காட்டப்படுகிறான்.`எங்கள் வயல்கள் அடையாளம் அறியாதோரால் ஆதாரம் இன்றி உரிமைக் கோரப்படுகின்றன;

எங்கள் வாழிடங்கள் அத்துமீறி ஆக்ரமிக்கப்படுகின்றன’என்று மக்கள் முன் வைக்கும் கோரிக்கைகளை கட்டுக்கதைகள் என்றும் இவர்களெல்லாம் குழப்பவாதிகள் என்றும் சினந்து சீறும் மன்னன் பகிடி மொழியில் பகிறப்பட்டிருக்கிறான்.

 `அது குஞ்சோடும் ஆறாத காயங்களோடும் ,அலகினால் பொறுக்கும் நெல்மணி போல, சிறுகச் சிறுகக் காதலை சேமிக்கும் ;விட்டுப் பறந்த இடத்தில் காத்திருக்கும்.காதலை ஓயாது கூவும்’ என்ற வரிகளில் போரின் இருபக்கமும் சிக்குண்டு  வாழ்வும் வாழ்விடமும் பறிபோனச் சூழலில், தஞ்சம் சொல்லி வந்த பறவையை நீங்கிப் போன காட்சி வழி வெளிப்படும் ஒரு பெண்ணின் வாழ்வின் மீதான வாஞ்சை விருப்பு பக்கம் எங்கும் பரவிக் கிடந்து பதைப்பூட்டுகின்றன.

ஆலங்கட்டி,வேம்பு,தும்பை,இரவு,காற்று,பறவைகள்,நிலம் என இயற்கைப் படிமங்கள் வழி உணர்ந்தவைகளை அவைகளின் மீது சார்த்தி,தான் அவைகளாகவும் அவைகள் தானாகவும் துணையாய் சாட்சியாய் இருப்பதை தொகுப்பில் பார்க்கலாம். 

`ஒரு முறை எனைப் பாட விடுங்கள்;என் துயரங்களை இசைக்க விடுங்கள்

நான் சிட்டுக்குருவிகளோடு வானத்தை அளக்க வேண்டும்

விலங்குகளினால் இறுக்கினாலும் வார்த்தைகளால் அடித்தாலும்

நான் இசைப்பேன் எழுதுவேன்’

என்று வாழ்வின் மீதான பேராவலில் சுதந்திர எழுத்தின் மீதான விருப்பில் அதிகாரத்தை மதபீடங்களை எதிர்த்த அறைகூவலில் முகிழ்த்த வரிகள் சிறகு முளைத்த பெண்

நன்றி:தீக்கதிர்/இலக்கியசோலை
2013 ஆகஸ்ட் 12

சீற்றத்தை உள்ளடக்கியக் குரல்

பெண்ணியக் கவிதைகளால் தமிழ்க் கவிதை வேகம் பெற்று அர்த்தத்தில் அடர்த்தியில் புதுவீச்சோடு திகழ்ந்து வருகின்றது.பெண்மொழியால் தமிழ்மொழி புதிய புதிய பார்வையைப் பெற்று ஜனநாயகப்படுத்தப்பட்டு வருகின்றது.70களின் இரா.மீனாட்சி தொடங்கி 2008ன் கலைஇலக்கியா,ச.விசயலட்சுமி என புதியத் தடங்களை அவதானிக்கலாம்.

 ச.விசயலட்சுமியின் `பெருவெளிப்பெண்’ கவனத்தில் கொள்ளத்தக்க கவிதைத் தொகுப்பு.பெண்ணின் சீற்றத்தை உள்ளடக்கிய உரத்தக் குரலாக வெளிப்படும்  விசயலட்சுமியின் கவிக்குரல் சமுகம் சார்ந்த அக்கறை,பிரபஞ்சம் தழுவிய  அரசியல் குரலாகவும் ஒலிக்கிறது.

 ஜனநாயகமற்ற குடும்பத்தில் பெண் படுகின்ற பாட்டை,   பெண்ணின் சுயம்,அடையாளம் குறித்த தகிக்கும் குரல்களை  பதிந்து செல்கிறது தொகுப்பு.

சொற்களின் மாய விளையாட்டுகளை தள்ளி எளிய சொற்களின் வலிய அனுபவங்களை விசயலட்சுமி கவிதையாக்கி இருக்கிறார்.

மனுநீதி, ஆணாதிக்க அச்சில்களால்  வனையப்படுகின்ற பெண்ணின் தோற்றத்தை மறுத்து,தங்களின் உயிர்த் துடிப்பை உற்றுக் கற்றுக் கொள்ள  மொழிகின்ற, வேட்டை மிருகங்களின் வயிற்று இரையானாலும், செரிக்க மறுத்து உயிர்த்தலிற்காக போராடுகின்ற பெருவெளிப் பெண்கள் குறித்த நம்பிக்கைப் பதிவு.

குடும்பமும் சமுகமும் சூட்டும் பட்டப்பெயர், வசைப்பேச்சு கேட்டு புழுங்கும் பெண்ணாக இல்லாமல்,

`எல்லாவற்றிற்கும் நானே காரணம் என்ற/இரைச்சலுக்கு மத்தியில்/குத்தகை விட்ட யோனி மீட்டு/மீண்டும் உயிர்த்தெழுவேன்’என்று தன் சுதந்திரத்தை மீட்டெடுக்க முயலும் நவயுகப் பெண்களின் குரலாக ஒலிக்கின்றது.

`புணர்வுகளில் முலை வெடித்து/தாயெனும் பட்டம் என்னைத்/தேய்த்து தேய்த்து உருவங் கொடுக்கையில்/சேகரித்த உள்மனக் கொந்தளிப்புகள்/நான் யாரென/வினா தொடுக்கும் நான்’

ஆண்களின் நான் அகங்காரத்தின் வெளிப்பாடு.பெண்களின் நான் சுதந்திர வெளிப்பாடு.ஆணின் நானிலிருந்து பெண்ணின் நான் ப்ரமாண்ட வித்தியாசம் கொண்டது.பெண்ணின் நான் சுயத்தின் வெளிப்பாடு.

உலகமயமாக்கல் நகரங்களை மனிதர்களை வாழ்க்கையை சிதைக்கும் என்பதை `தெறித்த விலா’கவிதையில் உணர்ந்து கொள்ள முடிகின்றது.

பசியழித்து உயிர் வளர்க்கும் அமுதசுரபியே கிடைத்தாலும் அதை வைத்து உறுபசி போக்க எண்ணாமல் எண்ணெய் வயல்களுக்காகவும்,அணுகுண்டுகளுக்காகவும் பயன்படுத்தும் ஆதிக்க நாடுகளின் அசல் முகவரியை காட்டுகிறது பயணம் கவிதை.

கொசாவா,ஈழம்,ஆப்கன் என தொடர்ந்த போர்கள் ஆனாலும் அரசியல்,சாதி, மதம் சார்ந்த வன்முறை ஆனாலும் இலக்காகி பலியாகுவது உயிர்ப்புகளின் கருவூலமான பெண்களே.

இயற்கையின் வடிவுறுவானப் பெண்களின் மீது தொடரும் ஆண்களின் கால கால யுத்தம் உறுப்புகளை சிதைப்பதோ வல்லாங்கு செய்வதோ மட்டுமின்றி  பெண்ணினத்தையே கருவறுக்கும் போருக்கு எதிரான அறைகூவலை ஏற்று அழிய மறுத்து உயிர்ப்பின் அரசியற்குரலாக  வெளிப்படுகின்றது இப்படி:

`வரையறைகளும் குறியீடுகளும்

குறி வைத்தாலும்

யாம்

விழுங்கி ஒளிரும் சூரியக் கரும்புள்ளிகளாய்

உயிர்த்தலின்

தொப்பூழ்க் கொடியாய்த் தொடரும்

பெருவெளிப் பெண்’

என்று வெளிப்படும் குரல் ஆண்களால் பின்னப்படும் அழிமான வலைகளை அறுத்தெறியும் புதியக் குரலாக வெளிப்படுகின்றது.

 பெருவெளிப் பெண்,உயிர்ப்பு,நிரவல்,தனிமை,நட்பு,கதவின் ஓலம்,வழிந்தோடும் விசும்பல்,எல்லைகளுக்குள் இல்லை என சொல்லத்தக்க கவிதைகளால் நிறைந்திருக்கிறது பெருவெளிப் பெண்.

(நன்றி:புதிய புத்தகம் பேசுது/2008 நவம்பர்) 

இப்பொழுதெல்லாம் தீபாவளி

ஜெயபாரத்தின் வீட்டுத் திண்ணையில்

 வடிவமைக்கப்பட்ட மாட்டுத் தொழுவத்தில்

 குழந்தை ஏசுவை பார்க்கப் போனதில்

ஒரு துண்டு கேக் கிடைத்ததால்

கிறிஸ்துமஸ் பிடித்துப் போனது

சித்திரை மாதத்தில் அந்த பத்து நாட்களும்

சித்தப்பாவின் நண்பர் டேவிட் வீட்டில்

அச்சு முறுக்கோடு ஜிப்சிலின் தரிசனமும்

கிடைத்ததால் அன்னை வேளாங்கன்னியின்

சப்பரத் திருநாளும் பிடித்துப் போனது

ஒத்தவீட்டு பக்கீர்முகமதுவின் உயர்ந்த கட்டு

வீட்டிற்குப்  போய் அவன் உம்மா கையால்

ஆட்டிறைச்சி குழம்போடு  வெள்ளை வெளேர்
 இட்டிலி சாப்பிடக் கிடைத்ததில்

பக்ரீத் பண்டிகையும் பிடித்துப் போனது

மணிக்கடையில் வாங்கிய ஓலைப் பட்டாசை

வெடிக்கும் ஆசையிலும் உருளைக் கிழங்கும்

உள்ளியும் கலந்து அம்மா வைக்கும்

குழம்புச் சோற்றோடு  சினிமா பார்க்க

நாலணா கிடைப்பதால் தீபாவளி பிடித்துப் போனது

திருமணம் மகள் என்றான புதிய சூழலில்

அவளுக்கான கவுன் அவளுக்கான மத்தாப்பு

அவளுக்கான இனிப்பு என்று வாங்கத் தொடங்கி 
இப்பொழுதெல்லாம் களை கட்டத்

தொடங்கி விடுகிறது தீபாவளி.

(நன்றி:தீக்கதிர் வண்ணக்கதிர் 2012 நவம்பர் 11)