அவமதிப்பிற்கு ஆளான வாலி

++வாலிக்கு இறுதி அஞ்சலி செய்த தமிழ்நாடு முற்போக்கு எழுத்தாளர் கலைஞர்கள் சங்கத்தின் படைப்பாளிகள்.++
படம்{கவாஸ்கர்}

வெள்ளி நிலவே விளக்காய் எரியும்

 கடல்தான் எங்கள் வீடு

-வாலி

கவிஞர் வாலி இன்றில்லை என்றாகி நம் நினைவுகளில் மட்டுமே இனி இருப்பார் என்றாகி விட்டார்.வாலியின் எழுத்துகளில் எளிமையின் வசீகரமும்   மொழின் துள்ளலும்  அடர்த்தியின் நளினமுமாக இருக்கும்.தொடர்ந்து ஐம்பதாண்டு காலமாக எழுதி வந்தவர்;புதிது புதிதாக சொற்களை எடுத்து இயங்கி வந்தவர்.1961 மேஜர் சந்திரகாந்தில் ஆரம்பித்து 2013 ன் கூத்தாடிகள் வரை திரைப்படம் வழியாக காதல்,தத்துவம்,மகிழ்ச்சி,துன்பம்,அரசியல்,எழுச்சி என தமிழ் தொட்டு தொடர்ந்து வந்தவர் வாலி.பதினைந்தாயிரம் பாடல்களில் விதவிதமான ரசரசமான வரிகளை காற்றில் உலவ விட்டவர்

 .சிக்கல் இல்லாத சிடுக்கு இல்லாத வரிகளை நெய்யும் ஆற்றல் கொண்டவர் .இவரின் வரிகளால் எம்.ஜி.ஆர் அரசியலில் தனது கருத்துகளை அழுத்தமாக அழகாக சொல்ல முடிந்தது.தொடர்ந்து திரைப்படத்தில் இயக்கி வந்ததோடு,அச்சு ஊடகத்தில் கவிதை,கட்டுரை,பத்தி எழுத்து,சொல்லோவியம் என கவனம் காட்டியவர்.மத்திய ,மாநில அரசுகளின் விருதுகள் பெற்றவர்;தமிழகத்தின் ஐந்து முதல்வர்களை அறிந்தவர்;பழகியவர்.அன்பின் முகத்தோடு யாவரிடமும் இருந்தவர் என்று வாலி உணரப்பட்டாலும் அவருக்கான அவர் தமிழுக்கான மரியாதையோடு அவரின் இறுதி அஞ்சலி நடைபெறவில்லை.

திரை உலகம் சார்ந்த சிலர் அவருக்கு அஞ்சலி செய்தாலும்,வாலியின் ரசிகர்கள்,சக படைப்பாளிகள் வாலியின் இறுதி நேரத்தில் பார்த்து  விடை கொடுக்க இயலவில்லை.வாலியின் இடம் தமிழில் என்னவாக இருக்கிறது என்று அவரின் சொந்த உறவுகளுக்கு தெரியாமல் இருக்கலாம்.ஆனால் இவரின் வரிகளால் வளர்ந்த திரைஉலகம்,படைப்பாளிகள்  வாலியின் இறுதி அஞ்சலியை ஒழுங்கு படுத்தி,அனைவரும் காண உதவ முன் வந்திருக்க வேண்டும்.குறிப்பாக அவரோடு நெருங்கிப் பழகிய கலைஞர் கருணாநிதி, வைரமுத்து,இளையராஜா,கமல்ஹாசன்,சங்கர் போன்றோர் இதை ஒழுங்கு செய்திருக்க வேண்டும்.

திரை உலகத்தின் உண்மை முகத்தை பார்த்து வந்த வாலியின் உறவுகள்,திரைஉலகத்தின் மீதான விமர்சனத்தை திரைஉலகத்தினரிடம் வெளிப்படுத்தாமல்,இறுதி அஞ்சலி செய்ய வந்த கவிஞர்கள்,பொதுமக்களிடம் வெளிப்படுத்தியது வருத்தமாக இருந்தது.மாலை ஐந்து மணிக்கு இறுதி சடங்கு என தெரியப் படுத்தி,ஒன்றறை மணிக்கு எடுத்ததோடு இல்லாமல் ,அஞ்சலி செய்ய வந்த பொது மக்களை அஞ்சலி செய்ய விடாமல் தடுத்து அனுப்பியது வாலிக்கு நிகழ்ந்த அவமதிப்பாகும் என்பதை வாலியின் குடும்பத்தாரோ அல்லது திரைஉலகமோ புரிந்து கொண்டிருக்க வேண்டும்.

ராஜா அண்ணாமலைபுரத்திலிருந்து கொட்டும் மழையில் பெசந்து நகர் மின்மயானம் வரை சென்ற இறுதி ஊர்வலத்தில் அதிகபட்சமாக கலந்து கொண்டோர் இருநூறு என்கிறார் கவிஞர் பாரிகபிலன்.தலை சிறந்த ஒரு கவிஞரின் இறுதிப் பயணம் நிகழ்கிறது என்ற எந்த உணர்வும் இன்றி முகம் தெரியாத ஒருவரின் பயணம் போல சாலையில் போனது கொடுமை.ஒரு நீதிபதி கார் வந்தால் வழி கொடுக்கும் காவல்காரர்கள்,ஓர் அமைச்சர் கார் வந்தால் விலக்கி வழி தரும் போக்குவரத்து காவல்துறையினர் வாலியின் ஊர்வலத்தில் பராக்கு பார்த்துக் கொண்டிருந்தது.

அடிமைப்பெண் படத்தில் வாலியின் பாடலான அம்மா என்றால் அன்பு என்ற பாடலைப் பாடிய முதல்வர் ஜெயலலிதா, தனது தலைவரான எம்.ஜி.ஆரின் செல்வாக்கிற்கு தனது பாடலால் உதவிய  கவிஞருக்கு அஞ்சலி செய்ய கொடநாட்டிலிருந்து வந்து போயிருந்தால்  மரியாதையாக இருந்திருக்கும்.அதுவும் இல்லை;ஒ.பன்னீர்செல்வம் போன்ற இரண்டாம் நிலை தலைவர்கள் வழியாக அஞ்சலி செய்திருக்கலாம் தமிழ்நாட்டு அரசு.

அண்டை மாநிலமான கேரளத்தில் ஒரு படைப்பாளி,ஒரு கலைஞர்,ஒரு கல்வியாளர்  இறந்தால் மாநில அரசு ,இறந்தவருக்கு  மரியாதை செய்து,இறுதி விடை கொடுக்கிறது.

ஆனால்  பெசந்த் நகர் மின் மயானத்தில் வாலிக்கு வணக்கம் செய்ய  வந்த வைரமுத்து,பாக்யராஜ்,மேத்தா,பா.விஜய்,கபிலன் போன்ற  சொற்ப கலைஞர்களுக்கு ஒர் அஞ்சலி உரை நிகழ்த்தி,வாலிக்கு விடை கொடுக்க வேண்டும் என்று உணர்வில்லாது போனதை  ஏதும் அறியாதவர்கள் என்று எடுத்துக் கொள்வதா?அல்லது காற்றுள்ள போது தூற்றிக் கொள்ளும் சந்தர்ப்பவாதிகள் என்று எடுத்துக் கொள்வதா?

மனசு உடுத்தின கவலைத் துணி

அவிழ்த்து எறி எதற்கு இனி

-வாலி

சமணர்கள் யார்?

இவர்கள் பிராமணர்கள் அல்லர்.பிராமணர்களுக்கு முன்பு,இந்தியாவில் ஆரிய குடியேற்றம் நிகழ்வதற்கு முன் இருந்த,திராவிடர்களின் சமயம் இது.

சமணம் என்றால் உருவ வழிபாடற்ற சமயம் என்று பொருள்.

ஆன்மாவில் நம்பிக்கை இல்லாத ,இயங்கு பொருள்(matter) சார்ந்த செயற்பாட்டின் மீது நம்பிக்கைக் கொண்டவர்கள்.

இந்தப் பார்வை வைதீக மதமான பிராமணியத்திற்கு ,பிற்காலத்தைய இந்து மதத்திற்குக் கிடையாது.

அன்றைய இனக்குழு,அதன் பின்னான தொடக்க வேளான் சமுகப் பொருளாதாரத்தின் மையமாக விளங்கிய ஆடு,மாடுகளை அழிப்பதிலிருந்து காக்க வேண்டி,கொல்லாமை,புலால் உண்ணாமையை கடைபிடிக்க வழி காட்டியவர்கள்.

இந்தியாவில் தன்னை நிலை நிறுத்திக் கொள்ள முயன்ற வைதீக மதம்,இவர்களிடமிருந்தே புலால் புசிப்பதை விடுத்து,புலால் மறுப்பை கடைபிடிக்கத் தொடங்கினார்கள்.

தொல்காப்பியர்,திருவள்ளுவர்,இளங்கோவடிகள் போன்றோர் சமணம் சார்ந்த படைப்பாளிகள்;அறிவாளிகள்.

தத்துவம்,அறிவியல்,இலக்கியம்,கலை,மருத்துவம் போன்ற துறைகளில் சமண அறிஞர்கள்,கலைஞர்கள்  மதிப்புவாய்ந்த பங்களிப்பை தமிழுக்குச் செய்தவர்கள்.

கி.பி 16 ஆம் நூற்றாண்டு வரை செல்வாக்கோடு இருந்து,மாறிய சமுகத்தின்  பொருள் சார்ந்த அதீத நாட்டத்திற்கு,சமணத்தின் முப்புரக் கொள்கையான காமம்,வெகுளி,மயக்கத்தை அழித்தல் என்ற செயற்பாடு, ஆசை,அனுபவித்தல் போன்ற தன்னோக்குப் பார்வைக்கு உதவியாக இல்லாததால்,கி.பி 16 க்கு பின் பின்னடைவை  சந்தித்தது.

என்றாலும் முற்றாய் அழிந்துவிடவில்லை.காத்திரமான தத்துவ,இலக்கிய செயற்பாட்டை இன்றளவும் தமிழுக்குத் தந்து கொண்டிருக்கிறது சமணம்.

அகர முதல எழுத்தெல்லாம் ஆதி

பகவன் முதற்றே உலகு

என்ற குறளின் முதற்பாட்டில் உள்ள ஆதிபகவன் என்பது கடவுள் அல்ல.

சமணத்தின் ஆதி தீர்த்தங்கரரான ஆதிநாதர் குறிப்பது.இந்த ஆதிநாதர் நிலந்தருதிருவின் பாண்டியனின் முதற்சங்கத்தில் இருந்த மதிப்புமிகு தமிழாசானும் ஆகும்.

மணிவண்ணனின் அகாலம்

இயக்குநர் நண்பர் மணிவண்ணன் அவர்களை 13 ஆண்டுகளுக்கு முன் விருகம்பாக்கத்தில் ஒரு பழைய படப்பிடிப்பு அரங்கில் ஒரு கலை இரவிற்கு அழைக்கும் பொருட்டு போய் சந்தித்தேன்;உடன் கலை இரவை நடத்தும் ஊரின் தோழர்கள் வந்திருந்தனர்.உள்ளே அவரை நான் தேட அவரோ,`தோழர் இந்தப் பக்கம் வாங்க’ என்று மரம் ஒன்றின் கீழ் போடப்பட்டிருந்த இருக்கையில் அமர்ந்து எங்களைப் பார்த்து புன்முருவல் பூத்துக் கொண்டிருந்தார்.எங்களுக்கான இருக்கை எடுத்து வரச் சொல்லி,என்ன சாப்பிடுறீங்க என விசாரித்து, விவரத்தைக் கேட்டுக் கொண்டார்.சொன்னோம்.சரி வருகிறேன் என்று ஒத்துக் கொண்டு வந்தார்.

அன்றிலிருந்து தொடங்கிய எம் நட்பு அவரின் இறுதி வரைத் தொடர்ந்தது.நேரம் கிடைக்கும் பொழுது அவரைப் பார்க்க அவரின் திநகர் அலுவலகம்,வீடு என போயிருக்கிறோம். போகும் பொழுதெல்லாம் புதிய நூல்கள் குறித்த விசாரிப்பு,அரசியல்,சினிமா என பேசுவோம். தமுஎசவின் பல கலை இரவில் கலந்து கொண்டு பேசியிருக்கிறார்.2008 ல் அவர் விபத்து ஒன்றில் சிக்கி வீட்டு ஓய்வில் இருந்த பொழுது,தமுஎசவின் 11 ஆவது மாநில மாநாடு சென்னையில் நடக்க இருந்தது.அது பற்றி பேசினோம்.தான் மாநாட்டிற்கு வர இயலாது என்றார்.ஆனாலும் நிதி சேகரிப்பில் அவர் சொல்லி கதாநாயக நடிகர் ஒரு தொகை தந்து உதவினார்.

2004 ல் தமிழ்திரை உலக கலைமலர் ஒன்றை நாங்கள் கொண்டு வந்த பொழுதில் பல ஆலோசனை கூட்டங்களில் கலந்து கொண்டு ஆலோசனை தந்து உதவினார்.அவர் மகள் திருமணத்திற்கு அவர் அனுப்பிய அழைப்பு தாமதமாக கிடைத்ததால்,நேரில் சென்று வாழ்த்த இயலாததை சொன்ன பொழுது என்ன சம்பிரதாயம் தோழர்?விடுங்க; அடுத்தப் பணியைப் பார்ப்போம் என்று இயல்பாக பேசினார்.

இறுதி சில ஆண்டுகளில் முன் போல் பார்க்கவில்லை என்றாலும் தொலைபேசியில் பேசுவோம்;விசாரித்துக் கொள்வோம்.மணிவண்ணன் ஆரம்பத்தில்(1980) கோவையில் சோசலிஸ்ட் வாலிபர் முன்ணணியில் இருந்தார்.மார்க்சிஸ்ட் இயக்கத்தின் தொடர்பில் இருந்தார்.சினிமாவில் அவர் வளர்ந்த பொழுதும்,வேறு இயக்கத்தின் செல்வாக்கில் அவர் போன பொழுதும் தான் எங்கிருந்து புறப்பட்டோம் என்ற ஓர்மையை விட்டதில்லை.

அவருக்கு அஞ்சலி செலுத்த இன்று மாலை 4 மனிக்கு,கே.கே நகர் ஜெய்பாலாஜி நகர் வீட்டிற்கு சென்றிருந்தோம்.எளிய மக்கள் இரு பக்கமும் திரண்டு நின்றிருந்தனர்.சாரை சாரையாக அவர்கள் அஞ்சலி செய்து கொண்டிருந்தனர்.மணிவண்ணனோடு பழகிய பல கலைஞர்கள் வந்து சென்று கொண்டிருந்தனர். உடல் அருகே சீமான்,சத்யராஜ்,மனோபாலா அமர்ந்திருந்தனர். உடல் மீது அவர் இறுதியாக இருந்த நாம் தமிழர் அமைப்பின் புலிக் கொடி போர்த்தப்பட்டிருந்தது.

மதுரவாயல் மார்க்சிஸ்ட் சட்டமன்ற உறுப்பினர் பீமாராவ், நாம், சிகரம் செந்தில்நாதன்,தென்சென்னை தமுஎகச தலைவர்கள் அன்பரசன்,மயிலைபாலு வடசென்னை தமுஎகச செயலாளர் ஜேசுதாஸ் என நேரில் சென்று அஞசலி செய்தோம். நாம் போனதும் சீமான்,சத்யராஜ் கைக் கொடுக்க பற்றிக் கொண்டு நமது இரங்கலை இழப்பை புலப்படுத்தினோம்.அகால மரணம்.சினிமாவை செரிக்க வேண்டியவன் சினிமா சிக்கலில் மாட்டிக் கொண்டும்,நோய்மையில் சிக்கிக் கொண்டும் இறந்து போனது பேரிழப்பு..பேரிழப்பு..
படம்:தீக்கதிர் பிரகாஷ்

காட்சி ஊடகம் :அகத்தை புறத்தை மாற்றும் தூண்டல்

இப்பொழுது படித்தவர்களும் விரும்பிப் பார்க்கப்படுகிற ஊடகமாக தொலைக்காட்சி மாறி இருக்கிறது.செய்திகள் மட்டுமே பார்த்த இப்பிரிவினர் பொழுது போக்குகளுக்கான செலவையும் நேரத்தையும் கணக்கில் கொண்டு தொலைக்காட்சி முன் தன்னை ஒப்புக் கொடுத்திருக்கின்றனர்.இவர்களை வசிகரிக்க வேண்டி புதிய புதிய நிகழ்வுகளை இவ்வூடகங்கள் முன் வைக்கின்றன.

திரைப்படங்கள்,நெடுந்தொடர்கள்  மட்டும் தொலைக்காட்சிகளுக்கு போதுமானதாக இல்லை.பார்வையாளர்களின் பல அடுக்குகளை கைப்பற்ற வேண்டி டாக் ஷோ எனப்படுகிற கலந்துரையாடல்,விவாதமேடை,உரத்த சிந்தனை  நடத்தப்படுகின்றன.

எத்தனைக் கோணம் எத்தனைப் பார்வை,உண்மையைச் சொல்கிறேன்,நாடும் நாமும் போன்ற தலைப்புகளில் முன்னுக்கு வருகின்ற பொதுவான பிரச்சினைகளின் அடிப்படையில் செய்தி அலசல்கள்,விமர்சனங்கள் செய்யப்படுகின்றன.உழைக்கும் மக்கள்,நடுத்தர மக்கள் படும் அல்லல்கள்,சந்திக்கும் தாக்குதல்கள்  இந்த அலசல்கள்,விவாதங்களில் காண முடிவதில்லை.

இந்த நிகழ்வுகளில் நமது படைப்பாளிகளான அ.குமரேசன்,ச.செந்தில்நாதன்,அருணன்,தமிழ்ச்செல்வன்,களப்பிரன்,பிரின்ஸ் கஜேந்திரபாபு போன்றவர்களை  அவ்வப்பொழுது பார்க்க முடிகிறது.நந்தலாலா கேப்டன் தொலைக்காட்சியில் தினந்தோறும் காலையில் பல்சுவைத் தகவல்களை பேசி வருகிறார். கிடைக்கும் வாய்ப்புகளை நமது பார்வையிலான செய்திகளை சொல்லவும் பகிரவும் நம்மவர்கள் பயன்படுத்திக் கொள்கின்றனர்.இது மாதிரியான பார்வைகள் தொலைக்காட்சியின் பரவலிற்கும் அவசியப்படுகிறது.தொலைக்காட்சியின் எல்லை வரம்பை நமது உரையாடல் மீறும் பொழுது தணிக்கை செய்யப்படுவதையும் காண முடிகிறது.

விஜயகாந்த் அவரின் தொலைகாட்சியில் மக்கள் கேள்விகளுக்கு பதில் சொல்லி வருகிறார்.

 தந்தி தொலைக்காட்சியில் சீமான் மக்கள் முன்னால் என்கிற விவாத அரங்கை ஞாயிறு தோறும் நடத்தி வருகிறார்.இந்நிகழ்ச்சிகளில் தம் நிலை சார்ந்து மத்திய அரசை,மாநில அரசை விமர்சிக்கவும் சில உள்நாட்டு நிறுவனங்களை விமர்சிக்கவும் பயன்படுத்துவதன் வழியாக மாநில முதலாளிகளின் தொழில் நிறுவனங்களின் ஆதரவை ஊடக ஆதரவை பெற முயற்சிக்கின்றனர்.

நாதஸ்வரம்,வாணி ராணி,உதிரிப்பூக்கள் போன்ற நெடுந்தொடர்கள் வீட்டுப் பெண்களை வசீகரித்திருக்கின்றன.வீட்டுப் பெண்களின்  தனிமை, பணி,பொழுதுபோக்கு, நுகர்வுச் சந்தை போன்றவைகளை மையப்படுத்தி இத்தொடர்கள் தயாரிக்கப்படுகின்றன.சிரமங்களுக்கு பெண்கள் முகம் கொடுப்பது, குடும்பத்திற்காக பெண்கள் சவால்களை ஏற்பது ,அதில் பெண்கள் வெற்றி பெற முயல்வது போன்ற உளவியல் கூறுகளால் இத்தொடர்கள் வெற்றிகரமாக பெண்களிடம் உலா வருகின்றன.

சமூகப் பொறுப்புள்ள,சக மனிதர்கள் மீது அன்பும் கடப்பாடும் உடைய ஆட்டோ ஓட்டுநராக நடிகர் சேட்டன், சிவநேசன் என்கிற  பாத்திரத்தில் உதிரிப்பூக்கள் தொடரில் நடித்து வருவது தொலைக்காட்சியின் இன்னொரு முகத்திற்கு எடுத்துக்காட்டாகவும் , இம்மாதிரியான காட்சிப்படுத்தலிற்கு தொழிலாளர் இயக்கத்தின் அன்றாட போராட்டப் பங்களிப்பும் காரணமாக இருக்கின்றது.

 மகாபாரதம் தமிழில் தமிழ்க் கலைஞர்களால் நடிக்கப்பட்டு திராவிட அரசியல் குடும்ப   சன் தொலைக்காட்சியில் ஞாயிறு தோறும் ஒளிபரப்பப்படுகிறது.இதே குடும்பத்தை சார்ந்த சுட்டி தொலைக்காட்சியில் பக்தி சார்ந்த அனிமேஷன் சித்திரக் கதைகள், தொடர்கள் வந்து கொண்டிருக்கின்றன.கிருஷ்ணன்,முருகன்,சிவன் தொடர்களை தயாரிப்பவர்களுக்கு குழந்தைகளிடம் சமுக மறுமலர்ச்சிக்கு உழைத்த திருவள்ளுவர்,பெரியார்,அம்பேத்கர்,திரு.வி.க,அண்ணா என்றாவது கொண்டு செல்லத் தோன்றவில்லை. 

மூன்,லோட்டஸ் என புதிய தொலைக்காட்சிகள் வந்திருக்கின்றன.முன்னர் என்.டி.டி.வி-ஹிந்து தொலைக்காட்சியாக இருந்தது இப்பொழுது தந்தி டிவியாக வந்து கொண்டிருக்கிறது.உள்ளூர் அளவில்  சிறு வணிகம்,தொழில் சார்ந்து நிறைய  தண்டுவட தொலைக்காட்சிகள் செயல்படுகின்றன.உள்ளூர் தொலைக்காட்சி சார்ந்த  நிகழ்வுகள் வடிவமைப்பு,ஆலோசனை சொல்வது என்ற முறையில் இவர்களோடு தொடர்பு வைத்துக் கொண்டு நமது கருத்து பரவலிற்கு முயலலாம்.

முன்னர் சில தொலைக்காட்சிகளில் குறும்படம்,ஆவணப்படம் ஒளிபரப்பப்பட்டதை இப்பொழுது காண இயலவில்லை.கலைஞர் தொலைக்காட்சியில் சினிமாவில் நுழையும் ஆர்வத்திலுள்ள புதுமுகங்களுக்கு வாய்ப்பளிக்கும் நாளைய இயக்குநர்  நிகழ்வில் சினிமாவின் சிறிய வடிவமான குறும் படங்கள் ஒளிபரப்பப்படுகின்றன.

தொடர்ந்து கவிதைகள்,கவின்கலைகள்,நிகழ்த்துக் கலைகள்,தமிழிசை போன்றவைகளுக்கு பெரிய தொலைக்காட்சிகளில் இடமில்லை என்கிற யதார்த்தம் நம்மை ஏதோ செய்கிறது;ஏதோ செய்யத் தூண்டுகிறது.இந்தத் தூண்டல் நம் அகத்தையும் புறத்தையும் மாற்றும்படி தொடரட்டும்.

(தமிழ்நாடு முற்போக்கு எழுத்தாளர் கலைஞர்கள் சங்கத்தின் மாநிலக்குழு கூட்டத்தில் (2013 ஜூன் 08,09)வைக்கப்பட்ட அறிக்கை)

அயலும் தமிழும் சந்திக்கும் வலசை

கவிஞர் நேசமித்ரன்,கார்த்திகைப்பாண்டியனின்  ஒருங்கிணைப்பில் வலசை 3 ஆம் இதழ்  வெளிவந்திருக்கிறது.ஏற்கனவே உடலரசியல்;முன்றாம் பாலினம்(?) இதழ் வந்ததை அடுத்து இப்பொழுது குழந்தைகளின் கற்றல் குறைபாடு குறித்த பொருளை எடுத்து 212 பக்க இதழாக வந்திருக்கிறது.

வடிவும் ஆக்க முறையும் மகிழ்ச்சி தருகின்றது;நம்பிக்கை தருகின்றது.இதழாசிரியர்கள் இடைச்சேர்க்கை என்ற தலையங்கப் பகுதியில்,`அனுமதிக்கப்பட்ட சுவாச வெளியில் கருவறுக்கப்பட்ட பிராணிகளாய் மானுடர்கள்;கல்விகூடத்திற்கும்,பிராய்லர் கோழிப்பண்ணைகளுக்கும் வித்தியாசம் இல்லாத கல்விச்சூழல்’பற்றி தமது  கவலையை பகிர்ந்து கொள்கிறார்கள்.

இதழ் நெடுக அயலும் தமிழும் சந்திக்கும் புள்ளியாக வலசை இருக்கிறது.மதிப்புமிகு கூட்டுழைப்பாகவும் இதழ் இருப்பதை பார்க்க முடிகிறது.

ஒரு சிறு ஆதிக்க அதிகார கூட்டத்திற்கான வளர்ச்சியை ஒட்டி வணிக பிராந்தியமாகவும், தேவையானதை திருப்பிச் சொல்லும் அரசியற் கிளிப்பிள்ளைகளாகவும் மக்களை தேசத்தை வார்க்கும் அசமத்துவ சமுகச்சூழலில் கல்வியும்,மாணவர்களும் ஜனநாயகமற்று படைப்பூக்கமற்று , கற்றல் குறைபாடுகளும் மனச்சிதைவுகளும் கொண்டதான  நம் காலச்சூழலை இடைமறித்து மாற்றத்திற்கான விவாத மேடையாக வலசையின் படைப்புகள் ஆக்கப்பட்டிருப்பது பெரும் மகிழ்ச்சி.

படைப்புகள் கல்வியின் இருப்பை  யதார்த்தத்தை கட்டுரையாக,கவிதையாக,கதையாக சொல்கிறது.மாற்றம் கோரும் சூழலிற்கான படைப்புகள்,கேள்விகள்,விவாதங்கள் இல்லாமல் இருப்பது குறைபாடுதான்

வலுக்கட்டாயமான போதனாமுறை சிந்தனையை அழிக்கிறது எனில் இதன் மாற்றுதான் என்ன?நாம் கடந்து வந்த பழைய திண்ணைகளுக்கோ மரத்தடிகளுக்கோ காடுகளுக்கோ செல்வது மாற்றா?இயற்கையை புரிந்து கொள்வது கல்வியின் மிக முக்கியமான அம்சம் எனில் புரிந்து கொண்ட இயற்கையை மானுட வளர்ச்சிக்காக மேம்படுத்துவதும் அதனோடு வினை செய்வதும் அவசியம்

.வினையும் எதிர்வினையும்  மானுடத்திற்கும் இயற்கைக்கும் தேவை.இயற்கையின் காலில் விழுந்து புலம்புவதை விடுத்து இயற்கையை மானுட வளர்ச்சிக்கு ஆற்றுப்படுத்துவதே காலம் தோறுமான வளர்ச்சிக்கு ஏற்றது

கல்விக்கான மாற்று என்று விவாதிக்கும் பொழுது பாவ்லோ ஃபிரைய்ரே தவிர்க்க இயலாத ஆளுமையாக நம் முன் வரவேண்டும்.இதழில் ஃபிரைய்ரே குறித்த கட்டுரைகள் இல்லாதது குறைபாடே.எனினும் நேசமித்ரன்,கார்த்திகைப்பாண்டியன் மீது நம்பிக்கை இருக்கிறது;பெயர்தலிற்கான வலசையாக இன்றி பேசு பொருளாகவும் வலசையை மாற்றுவார்கள்.வலசை 4 ஐ எதிர்நோக்குகிறேன்.

மாற வேண்டிய சாகித்ய அகாதமி

சாகித்ய அகாதமி நிறுவப்பட்ட நாளை சென்னையில் வரும் 12 ஆம் திகதி  அகாதமி, பாரதிய வித்யாபவனில் விழாவாக நடத்துகிறது.இது மக்களின் வரிப்பணத்தில் இயங்குகிற அமைப்பு.

 பல்வேறு மொழிகள்,பண்பாடு,சிந்தனைப் போக்கு,இலக்கிய போக்குகளின் மேடையாக செயல்பட வேண்டிய அமைப்பு.யார் ஆட்சியில் இருந்தாலும் அவர்கள் பின் செல்லாது,இலக்கிய வளர்ச்சியை முன்னிட்டு இயங்க வேண்டிய அமைப்பு.விருப்பு வெறுப்பிற்கு அப்பாற்பட்டு பலரையும் இணைக்க வேண்டிய அமைப்பு.

இந்த சிந்தனை இல்லாமல் (அகில இந்திய அளவில் எப்படியோ) ஆனால் தமிழ்நாட்டு அளவில்  சிந்தனைத் தெளிவு இல்லாத கரடு தட்டிப் போன,ஆளும் கட்சிகள் சார்ந்த இலக்கிய  பிரமுகர்களுக்கு முறைவாசல் வேலை செய்கிற, பிரபலங்களுக்கு  சொறிந்து விடுகிற திண்ணையாக இருக்கிறது.

அகாடமி பெயரில் தமிழ்நாட்டில் நடைபெறும் விழா அழைப்பை பார்த்தால் தொடர்ச்சியாக சில பேர்களே பொதுக்குழு உறுப்பினர் என்ற அளவில் தன் பெயரை வறவேற்புரை,தொகுப்புரை,சிறப்புரை,ஆய்வுரை,கவியுரை என்று தங்களுக்கான வாய்ப்பை தாங்களே பங்குப் போட்டுக் கொள்கிற கேவலங்களின் கூடாரமாக இருக்கிறது.

நேரில் சொன்னோம்;அலுவலகம் பக்கம் போகிற போது அணுகுமுறையை மாற்றுங்கள் என்று சொல்கிறோம்.மண்டல அதிகாரியை பார்த்தப் பொழுதும் சொன்னோம்.ம்கூம்..மாற்றம் இல்லை.மீண்டும் அதே அணுகுமுறை,அதே கேவலங்களின் அரங்கேற்றம் என் தொடர்கிறது.

ஒர் அமைப்பு நிறுவப்பட்ட நாளின் விழா என்பது பல்வேறு இலக்கிய,சிந்தனைப் போக்குகளின் சார்பாளர்களை இது சார்ந்த படைப்பளர்களை அழைத்து கொண்டாடுவது என்பதே சரியானது.

மாறாக ஆளும் கூட்டணி,ஆளும் கட்சிகள் சார்பாளர்களை அழைத்து கொண்டாடுவ்து சாகித்ய அகாடமி தொடங்கப்பட்டதன் நோக்கத்தை குழி தோண்டிப் புதைப்பது ஆகும்

.இவர்கள் தமிழக அளவில் நடத்தும் அரங்குகள்,கூட்டங்களுக்கு நவீனப் படைப்பாளிகள்,இடதுசாரிகள்,பெண் படைப்பாளர்கள் ,அசல் தலித் படைப்பாளிகள், ஜனநாயக அணுகுமுறை கொண்டவர்கள் தொடர்ந்து புறக்கணிக்கப்படுகின்றனர்.அங்கொன்று இங்கொன்றாக ஊறுகாய் காரணம் காட்ட சில பேர்களை அழைத்திருக்கலாம்.

பொதுக்குழு உறுப்பினர்களை யார் திருப்தி செய்கிறார்களோ  அவ்ர்களை அழைத்து பேச வைப்பார்கள்;அவர்களை சுற்றி இவர்கள் நின்று கும்மியடிப்பார்கள்;ஆளும் கட்சிகள் சார்ந்த படைப்பாளிகள் அழைக்கப்படுவார்கள் என்கிற    நிலை தொடர்வதை எதிர்த்து, மக்கள் சார்ந்த படைப்பாளிகள் புறக்கணிக்கபடுவதை எதிர்த்து  மீண்டும் குரல் கொடுக்க வேண்டும்;போராட வேண்டும்.சாகித்ய அகாதமி பொது அமைப்பு;இதன் செயல்பாடும் பொதுவில் இருக்க விழைகிறோம் 

வரும் 12 ஆம் திகதி அமைப்பு நிறுவப்பட்ட நாள் விழாவிற்கு அழைக்கப்பட்டிருப்போர் யார்? யார்? அறிமுக உரை இராம குருநாதன்;பேச்சாளர்கள்:மாலதி செந்தூர்,அசோகமித்திரன்,சா.கந்த சாமி,அப்துல் ரகுமான்,இரா.வைரமுத்து,ஈரோடு தமிழன்பன்,மு.மேத்தா

சீற்றத்தை உள்ளடக்கியக் குரல்

பெண்ணியக் கவிதைகளால் தமிழ்க் கவிதை வேகம் பெற்று அர்த்தத்தில் அடர்த்தியில் புதுவீச்சோடு திகழ்ந்து வருகின்றது.பெண்மொழியால் தமிழ்மொழி புதிய புதிய பார்வையைப் பெற்று ஜனநாயகப்படுத்தப்பட்டு வருகின்றது.70களின் இரா.மீனாட்சி தொடங்கி 2008ன் கலைஇலக்கியா,ச.விசயலட்சுமி என புதியத் தடங்களை அவதானிக்கலாம்.

 ச.விசயலட்சுமியின் `பெருவெளிப்பெண்’ கவனத்தில் கொள்ளத்தக்க கவிதைத் தொகுப்பு.பெண்ணின் சீற்றத்தை உள்ளடக்கிய உரத்தக் குரலாக வெளிப்படும்  விசயலட்சுமியின் கவிக்குரல் சமுகம் சார்ந்த அக்கறை,பிரபஞ்சம் தழுவிய  அரசியல் குரலாகவும் ஒலிக்கிறது.

 ஜனநாயகமற்ற குடும்பத்தில் பெண் படுகின்ற பாட்டை,   பெண்ணின் சுயம்,அடையாளம் குறித்த தகிக்கும் குரல்களை  பதிந்து செல்கிறது தொகுப்பு.

சொற்களின் மாய விளையாட்டுகளை தள்ளி எளிய சொற்களின் வலிய அனுபவங்களை விசயலட்சுமி கவிதையாக்கி இருக்கிறார்.

மனுநீதி, ஆணாதிக்க அச்சில்களால்  வனையப்படுகின்ற பெண்ணின் தோற்றத்தை மறுத்து,தங்களின் உயிர்த் துடிப்பை உற்றுக் கற்றுக் கொள்ள  மொழிகின்ற, வேட்டை மிருகங்களின் வயிற்று இரையானாலும், செரிக்க மறுத்து உயிர்த்தலிற்காக போராடுகின்ற பெருவெளிப் பெண்கள் குறித்த நம்பிக்கைப் பதிவு.

குடும்பமும் சமுகமும் சூட்டும் பட்டப்பெயர், வசைப்பேச்சு கேட்டு புழுங்கும் பெண்ணாக இல்லாமல்,

`எல்லாவற்றிற்கும் நானே காரணம் என்ற/இரைச்சலுக்கு மத்தியில்/குத்தகை விட்ட யோனி மீட்டு/மீண்டும் உயிர்த்தெழுவேன்’என்று தன் சுதந்திரத்தை மீட்டெடுக்க முயலும் நவயுகப் பெண்களின் குரலாக ஒலிக்கின்றது.

`புணர்வுகளில் முலை வெடித்து/தாயெனும் பட்டம் என்னைத்/தேய்த்து தேய்த்து உருவங் கொடுக்கையில்/சேகரித்த உள்மனக் கொந்தளிப்புகள்/நான் யாரென/வினா தொடுக்கும் நான்’

ஆண்களின் நான் அகங்காரத்தின் வெளிப்பாடு.பெண்களின் நான் சுதந்திர வெளிப்பாடு.ஆணின் நானிலிருந்து பெண்ணின் நான் ப்ரமாண்ட வித்தியாசம் கொண்டது.பெண்ணின் நான் சுயத்தின் வெளிப்பாடு.

உலகமயமாக்கல் நகரங்களை மனிதர்களை வாழ்க்கையை சிதைக்கும் என்பதை `தெறித்த விலா’கவிதையில் உணர்ந்து கொள்ள முடிகின்றது.

பசியழித்து உயிர் வளர்க்கும் அமுதசுரபியே கிடைத்தாலும் அதை வைத்து உறுபசி போக்க எண்ணாமல் எண்ணெய் வயல்களுக்காகவும்,அணுகுண்டுகளுக்காகவும் பயன்படுத்தும் ஆதிக்க நாடுகளின் அசல் முகவரியை காட்டுகிறது பயணம் கவிதை.

கொசாவா,ஈழம்,ஆப்கன் என தொடர்ந்த போர்கள் ஆனாலும் அரசியல்,சாதி, மதம் சார்ந்த வன்முறை ஆனாலும் இலக்காகி பலியாகுவது உயிர்ப்புகளின் கருவூலமான பெண்களே.

இயற்கையின் வடிவுறுவானப் பெண்களின் மீது தொடரும் ஆண்களின் கால கால யுத்தம் உறுப்புகளை சிதைப்பதோ வல்லாங்கு செய்வதோ மட்டுமின்றி  பெண்ணினத்தையே கருவறுக்கும் போருக்கு எதிரான அறைகூவலை ஏற்று அழிய மறுத்து உயிர்ப்பின் அரசியற்குரலாக  வெளிப்படுகின்றது இப்படி:

`வரையறைகளும் குறியீடுகளும்

குறி வைத்தாலும்

யாம்

விழுங்கி ஒளிரும் சூரியக் கரும்புள்ளிகளாய்

உயிர்த்தலின்

தொப்பூழ்க் கொடியாய்த் தொடரும்

பெருவெளிப் பெண்’

என்று வெளிப்படும் குரல் ஆண்களால் பின்னப்படும் அழிமான வலைகளை அறுத்தெறியும் புதியக் குரலாக வெளிப்படுகின்றது.

 பெருவெளிப் பெண்,உயிர்ப்பு,நிரவல்,தனிமை,நட்பு,கதவின் ஓலம்,வழிந்தோடும் விசும்பல்,எல்லைகளுக்குள் இல்லை என சொல்லத்தக்க கவிதைகளால் நிறைந்திருக்கிறது பெருவெளிப் பெண்.

(நன்றி:புதிய புத்தகம் பேசுது/2008 நவம்பர்) 

காவற்பெண்டுகள் தோழிகளின் துயரம் சொல்லும் வஞ்சியர் காண்டம்

 இராதெ முத்து 

PublicFriendsOnly meCustomClose friendsarun bhagathSee all lists...ravi kumarrajukumar metturduraisamiranjakumar somabala smanoj kumarmahendra n celladuraisuresh thandapanisiva siva kumarantony sanskritgowdhama babukalai arasanசக்திவேல?kumar chomskyiniyavan haji mohameddhana sekarpon ayyanarஇராச ராச ?suresh balajiகலைஞன் கிகடலூர் சாjustin joseசாந்தி பாsivakumar muruganmeena ramarsundarkumaresankarunagavaskarpathiniyan sujanthanmuralidharan alagarkomala sruthygnana velmuthudurai kannangs dhayalanboutha ayyanar boutha ayyyugavarshini inthumathiபூவரசி இணpriya rameshsaravana kumarrahul thankarajkathiravan kathirkannan poovaibahath singhsezhiyan cndalavai sundaramgopidharan rangasamyuthaya kumarmani kandanpaarvathi priyathamburaj dharmarajபெங்களூர?வசந்தாஜீ?thirumavelan padikaramunisha rameshjaffarkathir nagarajankavitha muralidharankrishnakumar v.raneeraj sagayaradjesaravanakumar sundaresanswathi muhilvijaya lakshmikaruna prasadjoanne ponnienaveen kumarvaratharajan sarjanlalithanand poetதமிழ்நாடு முற்போக்கு எழுத்தாளர் கலைஞர்கள் சங்கம்Chennai, Tamil Nadu AreaCultural ActivistPeople's UniversityThe Central Law CollegeFamilyAcquaintancesGo Back

இளங்கோவடிகளின் சிலப்பதிகார வஞ்சிக்காண்டத்தை மறுவாசிப்பு செய்த முறையில் நிகழ்த்தப்பட்ட  நாடகம் பிரளயனின் வஞ்சியர் காண்டம்.

சேரன் செங்குட்டுவன் கண்ணகிக்கு கோட்டம் அமைக்க இடம் தேடியதும்,வடபுலம் சென்று கல் எடுத்து வந்தமையும்,கோட்டம் அமைத்தமையும் ஆன காட்சிகள் கொண்டது இளங்கோவின் வஞ்சிக்காண்டம்.

பிரளயனின் வஞ்சியர் காண்டமோ கன்ணகியின் செவிலித்தாய் காவற்பெண்டு,கண்ணகியின் தோழி தேவந்தி,ஆயர்சேரி மாதரி மகள் ஐயை ஆகியோர் வழி கண்ணகியின் தெய்வப் பிம்பம் கலைக்கப்பட்டு,அவளுள் கனன்ற எண்ணங்களை,மதிப்பீடுகளை,மனிதர்கள் குறித்த அளவுகளை அசை போடும் நிகழ்வின் வடிவம்.

நீர் கலசத்தோடும் முளைப்பாரிகளோடும் கூட்டம் கூட்டமாக மக்கள் குடவாயில் கோட்டம் காணச் செல்கின்றனர்.இவர்களோடு கோட்டம் காண செல்கிறார்கள் காவற்பெண்டு,தேவந்தி,ஐயை.

தேவந்தியும் ஐயையும் கண்ணகியின் சிறு பருவம்,அவளின் வளர்ப்பு முறை,மாதவி குறித்து கண்ணகியின் உயர்மதிப்பீடு ,புகாரில் தனிமையில் கண்ணகி வாழ்ந்த அவலம் ,மதிரையில் கோவலனோடு வாழ்ந்த துயரம் என காவற்பெண்டிடம் விவாதித்து விவாதித்து தாங்கள் அறிந்து கொள்ளும் முறையினூடாக பார்வையாளர்களுக்கு ஒரு புதிய கண்ணகியை,இதுவரை அறியப்படாத நவீன கண்ணகியை நம்மோடு உலவவிட்டிருக்கிறார்கள்.

 நாகநாட்டிலிருந்து புகாருக்கு,மதுரைக்கு  காவற்பெண்டுகள் தாங்கள் அடிமையாய் வந்த வரலாற்றை கண்ணகிக்கு முந்தைய மூன்று தலைமுறைகளின் வரலாறு தொட்டு பேசுவதும்,மாசாத்துவான் மகளுக்கு பால் ஊட்டுவதற்காக காவற்பெண்டுகள் வணிககுலத்தாரால் கருவுறச் செய்யப்பட்ட கண்ணீர் கதையையும்,தன் மடியில் வேல்கம்பு தாங்கி வெதுவெதுப்பான குருதியை ஓடவிட்டு உயிர்துறந்த தலைக்கோலியான தன் காதலனை நினைத்து காவற்பெண்டு அழுவதும் அரற்றுவதுமான காட்சிகள் வழி ,இலக்கியத்தில்,நாடகத்தில் பதியப்பெறாத காவற்பெண்டுகள்,தோழிகளின் துயரக்கதையை நாடகம் நம்மோடு பகிர்ந்து கொள்கிறது.

கணவனுக்காக பிறந்த வீட்டிற்காக ஊருக்காக தனது ஆசைகள் விருப்பங்கள் நசுக்கப்படுவதையும்,தன் துயரம் மாறி நல்வழி பிறக்க தீர்த்தமாடி கோயில்கள் வழிபட்டு வரவா என தேவந்தி கண்ணகியிடம் கேட்குமிடத்தில் `உன்னைவிட்டு பிரிந்த உன் கணவனுக்காக எத்தனை தீர்த்தமாடினாய் உன் கணவன்உன்னிடம்  வரவில்லையே;கோவலன் மட்டும் எப்படி மீண்டு வருவான்’ எனக் கேட்டு கண்ணகி சொல்லும்`உன் அகத் தீர்த்தமாடி உன்னையே அறிவது நல்லது’என்கிற இடம் மூடத்தனத்தை,தெய்வமின்மையை விமர்சிக்கும் இடமாக துலக்கமுறுகிறது.

பட்டறிவால் சுயசிந்தனை கொண்ட பெண்ணாக, சமுகத்தை உணரும் பென்ணாக ,மாறிய கண்ணகியை பாண்டியனிடம் தேரா மன்னா செப்புவது உடையேன் என்று சிலம்பை உடைத்து நியாயம் கோரிய பெண்ணாகிய கண்ணகியை ,இயக்கி என்றும் கொற்றவை என்றும் காளி என்றும் மாற்றி, பின் தொடரும் சமுகத்தை மூடத்தனத்தில் ஆழ்த்தும் திருப்பணியை செய்த சேரன் செங்குட்டுவனின் அதிகார முகத்தை கிழித்தெறியும் புதிய புனைவாக அழகியலோடு வெளிப்பட்டிருக்கிறது வஞ்சியர் காண்டம்.

தேசிய நாடகப்பள்ளி,மண்டல வள மையம்-பெங்களூரு,தென்னக பண்பாட்டு மையம்-தஞ்சாவூர் இணைந்து நடத்தும் ஒருமாத கால உண்டு உறைவிட நாடகப் பயிலரங்க பங்கேற்பாளர்கள் வழங்கும் வஞ்சியர் காண்டத்தின் இயக்குநர் பேராசிரியர் ராஜூ,நாடகப்பனுவல் பிரளயன்.

மேடையில்:க.பிரியங்கா-கண்ணகி/சே.அஜிதா-காவற்பெண்டு/ம.வித்யா-தேவந்தி/ஆ.ரூபா-ஐயை/சு.நந்தினி-மாதரி/த.மகேஸ்வரி-கண்ணகியின் தாய்/மதியழகன் -மாநாய்க்கன்/ச.மணிகண்டன் -கோவலன்/சாரதி கிருஷ்ணன்-கூத்தன்/மா.மோகன்-உவச்சன்/பிரகதீஷ்வரன்- பூசகன்

2013 பிப்ரவரி 12 அன்று சென்னையில் நாடகத்தை நிகழ்த்த மேடை அமைத்தவர்கள் தமிழ்நாடு முற்போக்கு எழுத்தாளர் கலைஞர்கள் சங்கத்தின் திருவல்லிக்கேணி கிளை மற்றும் பொதுப்பள்ளிக்கான மாநில மேடை மற்றும் கல்வியாளர்  பிரின்ஸ் கஜேந்திரபாபு. 

தி.பரமேசுவரியின் ஓசை புதையும் வெளியை முன் வைத்து பெண்ணெழுத்தின் ஓர்மையும் ஓசையும்

எனக்கான வெளிச்சத்தைத்  தொடர்ந்து தி.பரமேசுவரியின் இரண்டாவது கவிதைத் தொகுப்பாக வந்திருக்கிறது ஓசை புதையும் வெளி.வெளிவந்து ஓராண்டு ஆகிவிட்டது.இலக்கிய வெளியில்,ஆய்வு வெளியில் தொடர்ந்து இயங்கிக் கொண்டிருக்கிற இவரின் இந்தத் தொகுப்பு இதுவரை கவனிக்கப் படாமல் இருப்பது வருத்தத்திற்குரியது என்று மட்டும் சொல்ல முடிகிறது.

ஓசை புதையும் வெளி என்கிற சொற்களின் கவித்துவமும் அது உணர்த்தி நிற்கும் வெளியும் ஆயிரமாயிரம் கேள்விகளையும்,பெண்வெளி குறித்த  புரிதல்களையும் கிளர்த்துகிறது.

மானுட சமூகத்தின் வரலாற்று ஓர்மை குறித்தப் பதிவு,பண்பாடு,அரசியல்,பொருளாதாரம் குறித்தப் பதிவுகள் ஈராயிரம் ஆண்டுகளாக புழங்கப்பட்டு வரும் மொழியின்  பெண்வெளியும் ,பெண்மொழியும் ஆண் மைய சட்டகத்தினூடாய் வனையப்படுவதும்,வனைதலின் நிர்ப்பந்தம் தொடர்ந்து நீடிப்பதும் தொழிற்நுட்ப ரீதியிலான வளர்ந்து வரும் ஓர் இனத்தின் மேம்படாத அகத்தின் மறுபக்கத்தை காட்டி நிற்கிறது.

தி.பரமேசுவரியின்  வெளியெங்கும் பெண் சுயம்,பெண் விருப்பு,பெண் தேடல் புதைக்கப்படுதலும் சுயத்தை மீட்டுக் கொள்வதற்கான ஓர்மையும் ஓசையும் கவிதைவெளி எங்கும் காணப்படுகின்றன.பெண் சுயமும்,பெண் விருப்பும் அது சார்ந்த கிளைத்தலும் எப்பொழுதும் வெளி சார்ந்தும்,வெளி தொடர்புடைய காலம் சார்ந்துமே காணப்படுகின்றன.

பெண் உணர்வுகளின் நுண்ணறைகளில் புதைந்து கிடப்பதை, அவர்களன்றி யாராலும் புரிந்து கொள்ள இயலாதவைகளை, தொடரும் ஆணுலக நெருக்கடிகளில் இருந்து தம்மை மீட்டெடுப்பதற்கான செயலாக, நவீனப்பாடினிகள் தான் அறிந்த மொழியில் தன்னுணர்வைப் பதிவு செய்து வருகின்றனர்.இங்கு பரமேசுவரி முத்தங்களால் ஆனது தன் உலகம் என்று தான் கட்டமைத்திருக்கும் பெண்ணின் அவசமான பரவசத்தை வெளிப்படுத்துகிறார்.

இந்தப் பெண்ணின் உணர்தலில் ”நிரம்ப நிரம்பத்  தளும்பாத ஆதிக்கிண்ணத்தில் சுழன்று கொண்டிருக்கும் உடல்கள் கனன்று கனன்று கறுத்த இரவுகளில் வெளிச்சத்தை படர்த்துகிறது” என்றும்,இரவை ஆடையாகப் போர்த்திக் கொண்ட தன்னை முத்த உமிழ்நீரில் எரியும் பனிக்காடாய் மாற்றியதன் வழி ஒவ்வோர் முறையும் தான் உயிர்ப்பதாகவும் சொல்லிப் போகும் கவிதையில் இரவு அன்பின் பற்றுக்கோடாய் படிமமாகிறது.நினைவெனும் கொடும்பறவை எனும் கவிதையில்  யாருமற்றப் பகல் பொழுதில் குற்றுயிராய் கிடக்கும் தன்னை  ராஜாளி போலுமான தனிமை உடல் பரத்திக் கொத்துகிறது என்று,பகல்பொழுது பதியப்படுவதன் நிமித்தம் பொழுதெல்லாம் காமமும் காதலும் உடனுறைய உருகுகிறது மொழி.

காதல் சார்ந்த அன்போ,நட்பு  சார்ந்த அன்போ வலியை வெளிப்படுத்தினாலும் அதனை விட்டு விலக இயலாத மென்மனம் கொண்டமை உதிர ஓவியம்,செம்மலர்,என்றும் பெயர் போன்ற கவிதைகளில் காட்சிப்படுத்தப்பட்டு,உருளும் கண்ணீர்த்துளிகளை உணவாக்கிக் கொண்ட மனங்கொத்திப்பறவையின் கூரிய வசைச்சொற்களை தாங்க இயலாததுடன்,ஏமாற்றி அணிவிக்கப்பட்ட சங்கிலியுடன் வறட்டு ஓலமிடும் நாயென அடையாளப்படுத்தப்படும் பொருந்தாத திருமண உறவு மனங்கொத்திப் பறவை,சங்கிலியில் திரியும் சுதந்திரம் கவிதைகளில் விரிகிறது.

மரபார்ந்த குடும்ப வெளி அல்லது  உறவு வெளி பெண் மனதை புறக்கணிப்பதையும்,பெண் மனதின் விடுதலை கிளைப்புகளை தாண்டிச் செல்வதுமான மனதைக் கொண்டிருக்கிறது.உதிரப் பெண் மனதும் கூட சக பெண் மனதின் அகச்சிக்கல்களையோ அல்லது மலர்ச்சிகளையோ ஏற்றுக் கொள்ளாமல் மரபார்ந்த குடும்ப வெளியில் வதைபட தருதலை தொகுப்பினூடாய் வாசிக்கிற பொழுது  அதிர்கிறது மனம்.

பெண் இருப்பின் பிரக்ஞை  உணராத ஆண் மனம் போகம்  பாவிக்கும் இடமென பெண்ணுடலின்  மீதான  ஊர்தலை உணர்வற்ற மரவிரல்களெனவும்,நனைவின் புதைமணற்வெளி எனவும் அவதானிக்கிற பெண் சுயம்,வீடு தாண்டிய வெளியின் புரிதலின் போதாமையினால்  குடும்பச் சட்டத்தினூடாய் பயணம்  செய்ய நினைக்கின்ற, தொடர்ந்து தொடுக்கப்படுகிற   கற்சலனத்தினால் ,வாசல் தொடுகிற மனதை மீட்டெடுத்துக் கொண்டு ,ஊர்கூடி இட்ட நுகத்தடியின் கயிறு அறுத்து தன் போக்கில் பயணித்து திரியும் பெண்வெளியிலான  சுயத்தை பரக்கப் பார்க்கலாம்.

சுதந்திரத்திற்கு பிறகான ஆண்டுகளில் பெண் கல்வி,பெண் முன்னேற்றம் குறித்து தொடர்ச்சியான அவதானிப்புகள் மற்றும் இலக்கியப் பதிவுகளினூடாய்,ஏற்பட்ட வளர்ச்சிகள் அல்லாமல் தொண்ணூறுகளுக்குப் பிறகான பொருளாதார புதுப்பித்தல் வெளியின் தேவை சார்ந்து அரசு சாரா பணியிடங்கள் பெண்களுக்கு கிடைத்தப் பொழுதும்,பெண் குறித்தப் ஆணுலகப் பார்வையில் பாகுபாடு நீடிக்கின்றது.இந்தப் பாலினப் பாகுபாடு உலகமயச் சூழலில் சுழன்றடிக்கிறது.குடும்பங்களில் சமத்துவமற்ற வேலைப் பிரிவினைகளால் அதிகபட்ச சுமைகளைப் பெண்கள் சந்திக்கின்றனர்.

ஓரளவு பொருளாதார சுயச்சார்பு ,கல்வி காரணமாய் பெண் தன்  சுயம்,இருப்பு,சூழல் குறித்து கவனம் கொள்கிறாள்;கேள்விகளை  எழுப்புகிறாள்;சுயத்தின்  மீதான பாகுபாட்டை குலைத்துப் போட முயல்கிறாள்.வீடுகளில் அவள் மீதான எழும் கேள்விகள் முடிந்து போய்விடவில்லை.கணவராதிக்கக் குரல் சில இடங்களில் உயர்ந்தும் வேறு சில இடங்களில் தாழ்ந்தும் காணப்பட்டாலும்,அந்த ஆதிக்கக் குரல்கள் தொடர்ந்து கொண்டே இருக்கின்றன

இந்தச் சூழலில் தன்னுணர்வுக் கொண்ட பெண் மொழிகளில் தலைகீழ் மாற்றம் ஏற்படுகிறது..தன் இருப்பை புரிந்து கொள்ளும் மனங்களில் தன் விருப்பை ,அன்பை பதியனிடுகிறாள்.ஊர்பாட்டை பெரிதாய் செவி மடுப்பதில்லை.தன் பாட்டையை விரிவாக்குகிறாள்.சுயம் செல்லும் பாதையில் த்ன்னை விதைக்கிறாள் இப்படி:

கொதிக்கும் உலையை
உற்று நோக்கும் கண்கள்
உள்ளிருக்கும் ஈரம்
முழுவதையும் வெளியேற்றுகிறது
இறுகிப் பாறையாகிறேன்
மோதும் காற்றிலிருந்து எழுகிறது
பறையோசை
திசையெங்கும் அதிர்வுகளாய்
ஊழிக்காலம் தொடங்குகிறது ரெளத்ரமாய்(உள்ளிருக்கும்  ஈரம்)

ஓசை புதையும் வெளி
தி.பரமேசுவரி
வெளியீடு
வம்சி புக்ஸ்
திருவண்ணாமலை

விஸ்வரூபம் :சர்ச்சையும் சந்தேகமும் 4

விஸ்வரூபம் தமிழ்நாட்டில் 7 ஆம் திகதி வெளியாகவிருக்கிறது என்பதை கமல் அறிவித்துவிட்டார்.

சென்னை உயர்நீதிமன்றத்தில் தாக்கல் செய்யப்பட்ட வழக்கை கமலும்,நீதிமன்றத்திற்கு வெளியே தமிழகஅரசின் தலைமையில் கமல்,இஸ்லாமிய பழைமைவாத  அமைப்புகள் பங்கேற்ற முத்தரப்பு பேச்சுவார்த்தையில் உடன்பாடு ஏற்பட்டதை அடுத்து அரசு தரப்பும் படத்தை திரையிட தமக்கு ஆட்சேபனையில்லை என்று நீதிமன்றத்தில் தெரிவிக்கப்பட்டதை அடுத்து இது குறித்த வழக்கு நடைமுறைகளை முடித்து வைப்பதாக நீதிபதி இராஜேசுவரன் அறிவித்துவிட்டார்.

ஆனாலும் கேள்வி நீடிக்கின்றது.தமக்கு ஒத்து  வராத ஒரு கலைஞர் என்றால் அவரை பிடிக்காத நடிகராக்கி காட்டுவதும் ஒரு திரைப்படத்தை உடனடியாக முடக்குவதும்,அந்தக் கலைஞரை தம்மை அண்டி நிற்க வைப்பதும் என்பதான  அரசாங்கத்தின் தொடரும் அராஜக நடைமுறைக்கு மாற்றம்  தேவை என்ற கேள்வி தொடர்ந்து எழுகிறது

மத்திய அரசின் சினிமேட்டோ கிராஃபி(1952) சட்டத்தின் 10 ஆம் பிரிவை ஒட்டி மாநில அரசு(1957)ஆண்டில்  ஏற்படுத்திக் கொண்ட சட்டப்படி  பராசக்தியில் ஆரம்பித்து தண்ணீர் தண்ணீர் வழியாக இன்று விஸ்வரூபம் வரை தேவைப்படும் பொழுதெல்லாம் பிடிக்காதவர்கள் மேல் இதனை ஆயுதமாகப் பயன்படுத்தி வந்திருக்கிறது.

 எம்.ஜி.ஆர்.ஆட்சிகாலத்தில் கோமல் சாமிநாதனின் தண்ணீர் தண்ணீர் நாடகத்தை இயக்குநர் பாலசந்தர் திரைப்படமாக எடுத்தார்.இதை தனது இலட்சிய படம் என்றார் பாலசந்தர்.அப்போது செய்தித்துறை அமைச்சராக இருந்தவர் பெரியாரின் சீடர் என்று இன்றளவும் பேசிக் கொண்டிருக்கும் ஆர்.எம்.வீரப்பன்.இவர்கள் தான் தண்ணீர் தண்ணீர் படத்தை தடை செய்ய முயன்றார்கள்;மீறி இந்தப் படம்  வந்த பொழுது ஆங்காங்கே ஆள் வைத்து மிரட்டினார்கள்.படத்தை  எதிர்த்து கருத்துகள் சொன்னார்கள்..ஆனாலும் படம் வெற்றிகரமாக ஓடியது.

இவர்கள் படத்தை தடைசெய்ய முயலக் காரணம் படம் பேசிய அன்றைய  அரசியல். எம்.ஜி.ஆர் தன் படங்களில் அரசியல் பேசுவார்;கொடி காட்டுவார்.தானே முதல்வராக இருந்த பொழுது இன்னொரு படம் மாநிலத்தின் அரசியலை பேசினால் பயந்து அலறி தடை செய்ய முயல்வார்.இதே எம்.ஜி.ஆர் திரைப்படத்தை  தடை செய்யும் மசோதாவை 1987 ல் கொண்டு வந்த பொழுது பெரிய எதிர்ப்பை சந்தித்தார்.தமிழ்நாடு முற்போக்கு எழுத்தாளர் சங்கம் திரையுலகின் கோபத்திற்கு களம் அமைத்து சிறப்பு மாநாடு ஒன்றை சென்னையில் நடத்தியது.பின்னர் மசோதா கிடப்பில் போடப்பட்டது என்பது வரலாறு.

இதே பாதையில் ஜெயலலிதாவும் இறங்கி இருக்கிறார்.அதுவும் சட்டத்தின் ஓட்டைகளைப்  பயன்படுத்தி சட்டப்படி அடிக்கப் பார்க்கிறார்.
தணிக்கைச் சான்றிதழ் பெறாத படங்களை பொதுத் திரையிடுதலிலிருந்து விலக்கி அமைதியை காக்க வேண்டி மாநிலத்திற்கு பொறுப்பளிக்கப்பட்ட  `திரையிடுதலை முறைப்படுத்தும் சட்டத்தை  ,தானே தணிக்கை வாரியம் என்பது  போலவும் ,முழுப்பொறுப்பு என்பதாகவும் நினைத்துக் கொண்டு ,தணிக்கைப் பெற்ற படத்தை அமைதிக்கு குந்தகம் செய்யும் என்று சொல்லி பொதுத் திரையிடலிலிருந்து நீக்கி வைப்பது   சட்டத்தை தன் தேவைக்கேற்ப வளைப்பது ஆகும்.

அதிகாரம் பகிர்ந்தளிக்கப்பட்டப் பிறகு அதனுள் நின்று செயல்பட வேண்டிய அரசு அதை மீறுவது என்பது தவறான செயல்.அதிகார வரம்புப் பட்டியலை மாற்ற வேண்டும் என்று மாநில மக்களின் கருத்தையும் அறிந்த பிறகு மாநில அரசு இதற்கான இயக்கத்தை எடுக்க முன் வந்தால் அதை ஆதரிப்பது என்பது தனி.பிரச்சினை இப்பொழுது இதை ஒட்டி அல்ல.

விஸ்வரூபத்தை பொறுத்த அளவில் ஜெயலலிதா அரசு பொறுப்பை மீறி போக்கிரித்தனமாக நடந்து கொண்டது என்பதே யதார்த்தம். விஸ்வரூபத்தை15 நாட்கள் திரையிட தடை செய்ததை எதிர்த்து ஊடக உலகம,அரசியல் உலகம்,முற்போக்கு எழுத்தாளர் கலைஞர்கள் சங்கம்,திரை உலகினர்,பொதுமக்கள் கொந்தளித்ததை ஒட்டி சமரசம் செய்கிறேன் என்று இறங்கி வந்தார். மாநிலங்களுக்கு தணிக்கைச் சான்றிதழ் கிடைக்கப் பெற்றப் படங்களை தம் மாநில எல்லைக்குள் கொட்டகையில் திரையிட லைசென்ஸ் என்கிற அனுமதி தர அல்லது மறுக்க மட்டுமே இயலும்.படத்தை தடை செய்யும் அதிகாரம் இல்லை.

தணிக்கை பெற்ற படத்தை மறு தணிக்கைக்கு உந்தித் தள்ளுவது என்பதோ,சட்டம் ஒழுங்கிற்கு குந்தகம் நேரும் என்பதோ சொல்லும் இந்தக் காரணம் பெண்களை படுகேவலமாக சித்திரித்த பல தமிழ்ப் படங்களை எதிர்த்து பெண்கள் கொந்தளித்தப் பொழுது திரையரங்கின் முன் போராட்டம் நடத்திய பொழுது அரசு அசைந்து கொடுக்கவே இல்லை. பராசக்தி ,சிவப்புமல்லி,தண்ணிர் தண்ணீர் ,விஸ்வரூபம் என்று மட்டும் அரசு   விஸ்வரூபம் காட்டி நின்றது;நிற்கிறது.

குறிப்பு:நண்பர்களின் வருகையும் வாசிப்பும் உவப்பு தருகின்றது.
உங்கள் கருத்தை மேலும் தெரியப்படுத்துங்கள்;விவாதிப்பு பார்வையை துலக்கமாக்கும்;நன்றி

விஸ்வரூபம் :சர்ச்சையும் சந்தேகமும் 3

உலகநாயகன் என்ற பட்டத்தோடு மட்டும் இருந்தவரை மெய்யான உலகநாயகனாக்கியப் பெருமை தமிழ்நாட்டு முதலமைச்சர் ஜெயலலிதாவை சாரும். விஸ்வரூபத்திற்கான தடை நீட்டிப்பு  ஒட்டி கமல்ஹாசன் ஊடகங்களுக்கு அளித்த பேட்டியின் தன்மை,செய்திகள் மனசாட்சி உள்ளோரை உலுக்கி விட்டது.

இந்தியா முழுவதும் செய்தி தீயாக பரவி விட்டது. இனி கமல்ஹாசன் ஆழ்வார்பேட்டை ஆண்டவன் மட்டுமில்லை  என உணர்த்தி விட்டன ஊடகம்.

தமிழ்த் திரைஉலகு சார்ந்த பல கலைஞர்கள் குறிப்பாக பாரதிராஜா,மனிரத்தினம்,ரஜினிகாந்த்,விஜயகாந்த்,சிம்பு,ராதிகா,குஷ்பு,பார்த்திபன்,செல்வமணி,கே.ஆர்,பிரபு,சிவகுமார்,வைரமுத்து,அரவிந்தசாமி,எஸ்.ஏ.ராஜ்கண்ணு போன்றோர் நெருக்கடியான இந்த கட்டத்தில் கமலஹாசனோடு நிற்கிறார்கள்;வாழ்த்துகள்.

 இந்தப் படத்தை தமிழக அரசு அணுகிய முறையை கடுமையாகச் சாடி இருக்கிறது தமிழ்நாடு முற்போக்கு எழுத்தாளர் கலைஞர்கள் சங்கம்

பரமக்குடி கலவரம்,தர்மபுரி கொடூரம் என அண்மையில் தமிழகத்தில் நிகழ்ந்த அதிமுக்கிய நிகழ்வுகளில் ஊடகத்தை சந்திக்காத ஜெயலலிதா,விஸ்வரூபம் பிரச்சினையில் இன்று மதியம்(ஜனவரி 31) ஊடகத்தை சந்தித்திருக்கிறார்.

ஆறு நாட்களாக பேசப்பட்டும் எழுப்பப்பட்டும் வருகின்ற இப்பிரச்சினை சார்ந்த  பல கேள்விகள்,விமர்சனங்களுக்கு முதல்வர் ஜெயலலிதா பதிலளித்திருக்கிறார்.கூடவே  கமலஹாசன் பற்றி அவர் வைத்திருந்த கருத்துகள் அவர் கொண்ட கோபத்தால் வெளியேயும் வந்துவிட்டன

கமல்ஹாசன் இந்தப் பிரச்சினையை ஏன் கோட்டிற்கு கொண்டு சென்றார்?அவர் ஏன் என்னிடம் முறையிடவில்லை?அவர் சொத்தை இழப்பதற்கு என் அரசு எப்படி பொறுப்பேற்க முடியும்?வேட்டி கட்டிய தமிழன்தான் அடுத்த இந்திய பிரதமர் என்று இவர் சொல்வதற்கு இவர் என்ன கிங்மேக்கரா?

என்று ஜெயலலிதா தொடுத்த பல எதிர் கேள்விகளால் தன்னைத் தானே அம்பலப்படுத்திக் கொண்டார். இதுவரை ஊடகங்களும் பொதுமக்களும் விஸ்வரூப சிக்கல் குறித்து முன் வைத்த விமர்சனங்கள்,கருத்துகள்  சரி என்று இன்று ஜெயலலிதாவால்  நிரூபிக்கப்பட்டுள்ளது.

எவர் ஒருவரும் தன்னை நாடி நிற்காமல் போனால் இந்தக் கதிதான் என்று  ஏனைய திரைக்கலைஞர்களை விஸ்வரூப தடை வழி  மிரட்டியிருக்கிறார் ஜெயலலிதா. இவர் என்ன கிங்மேக்கரா என்று கேட்பதன் வழியாகவும் ஒவ்வோர் குடிமக்களுக்குமான கருத்து  வெளியிடும் உரிமையை மறுத்து தனது காழ்ப்பை  மெய்ப்பித்திருக்கிறார் தமிழக முதல்வர்.

கூடவே இந்த பேட்டியில் ஜெயலலிதா உண்மைக்கு மாறானவைகளை  சொல்லி இருக்கிறார்.ஜெயா தொலைக்காட்சிக்கு விஸ்வரூப படத்தின் செயற்கை கோள் ஒளிபரப்புரிமை கிடைக்காததாலேயே இந்த சிக்கல்  என்ற கருத்திற்கு ஜெயலலிதா பதில் சொல்கையில், ஜெயா தொலைக்காட்சியில் தான் எந்த பங்குதாரரோ, பொறுப்போ வகிக்கவில்லை என்றும் இந்த தொலைக்காட்சி அதிமுக வை ஆதரிக்கிறது என்றும் சொல்லிக் கொண்டார்.

 நாளாக நாளாக விஸ்வரூபம் திரைப்படம் குறித்த சர்சைகளும் சந்தேகங்களும் நீடித்துக் கொண்டிருக்கின்றன.புரியாத புதிர்கள் புரிய தொடங்கி இருக்கின்றன.அடுத்தடுத்து கூடுதல் தகவல்களோடு இந்த பத்தி தொடரும்.



.